عبد الله جعفر/أبشر يا البشير

قصيدة ثوريّة غير مكتملة كتبها عبد الله جعفر، على وزن "درّاج عاطلن"، يعود تاريخها لـ 11 أبريل 2019، أو قبله، ونشرها على صفحته في فيسبوك في صبيحة 24 يناير 2020، في ذكرى استشهاد الشهيد عبد العظيم. مربّعات القصيدة من لزوم ما لا يلزم، مرتّبة على الحروف الأبجديّة.

النص

}}

(ت)

أبشر يا البشير الليلة يومك تم

والمنشور صدر واسقاطك اتحتّم

ولسانك بلخبت في الكلام تمتم

المنظر صعِب والرؤية تتعتّم

(ث)

مالك في الكلام شايفك بتتلعثم

ترجف من هتافم ناس عُلا وهيثم

ما عادلك رجا، ما تقول هناك وثم

أجهز للهروب اتغتغت اتلثّم

(ج)

زي عبد العظيم، نتعب وما بننجم

الحريّة حق لا نرضى تتحجّم

ولا يمكن نسيب أفواهنا تتلجّم

ح نتم الطريق لي آخر المنجم

(ح)

(خ)

الجيل الجديد بي وعيو ما بتخم

لا تحاول تلف راس الشباب تلخم

ولا تنفخ كلام فاضي وتتمّوا زخم

عارفين الحقيقة وكيف بتتصخّم

(ء)

أذّن للجهاد سنهوري، صالح أم

(ب)

راكزين الولاد صوت القنابل بم

والبنبان كمان بيناتنا يتبمبم

(ت)

أبشر يا البشير الليلة يومك تم

بتهضرب براك ولسانك اتّمتم

(ث)

ما تنضم كتير ما تقول هناك وثم

أشرد من سكات اتنكّر اتلثّم

(ج)

حبّك يا بلد في قلوبنا وافر جم

يتدفّق صور ومعاني ويترجم

(ح)

ندخل في فداك عزّة الوطيس الحم

نصبر نعتصم في نار هجير تلحم

(خ)

الحق اتعرّف ودّعنا عهد الخم

لا توم لا حسين يلهينا لا يلخم

(د)

يا عمر البشير البينّا بينك دم

جاييك الحساب اتغتغت اتدمدم

(أبيات مبعثرة)

ما تنضم كتير ما تقول لعلّ وثم

حبّك يا بلد في قلوبنا وافر جم

ندخل في فداك عزّة الوطيس الحم

الحق اتعرّف ودّعنا عهد الخم

عدمان الضمير ما يكفّي فيك الذم

ألهج يا لسان أنثر كلامك رم