«عبد الله جعفر/مسدار العبور»: الفرق بين المراجعتين

المراجعة الحالية بتاريخ ١٧:٥٧، ٢٧ أبريل ٢٠٢٢

كتبه عبد الله جعفر مع إرهاصات انقلاب البرهان في أكتوبر 2021. كتب المربّعات بصورة منفصلة ونشرها تباعا على صفحته في فيسبوك ما بين 2021-10-18 و2021-11-24، مستخدما هاشتاق #مسدار_العبور.

تقديم

كتبه المؤلّف على صفحته في فيسبوك

بهذا المربّع افتتحت مسدار الخلاص، في ٢١ ديسمبر ٢٠١٨، أي بعد يومين من انطلاق شعلة الثورة في عطبرة؛

وختمته بوصول قطار النصر لعطبرة، في ١٩ ديسمبر ٢٠٢٠، معلناً نهاية الحلقة الأولى من عمر الثورة!

منذ البداية كانت رؤيتي لهذا النصّ أن يكون توثيقاً حيّا لأحداث الثورة؛

حدثاً بحدث؛

وكنت موقن بالنصر، ما اهتزّ يقيني قط؛

لحدّي ما وصل المسدار ٣٠٨ مربّع: ١٢٣٢ بيت من الشعر، تحكي عن مشوار الخلاص، نهديها للأجيال التالية.

وبعد؛

تواطأت الظروف، واتّفقت الأحداث، على أن يكون #أكتوبر٢١، ٢٠٢١، ضربة البداية للحلقة التالية من سلسلة الثورة: العبور من ظلمات الجهل إلى نور الوعي؛

وبهذه المناسبة، نبدا نكتب #مسدار_العبور.

النص

[١]

يا عبد الوهاب، اسمعني يا البرهان

ياخي الحق تبيّن ما بدور برهان

والجاب الهوان لي شعبو يوم بتهان

والشعب العظيم ما بخوضوا ضدّو رهان

[٢]

يا وطني العزيز نارك تجلجل حيّة

ما بطفيها خاين بي سواتو النيّة

في ابريل انتصرنا قطعنا راس الحيّة

ولعبد الوهاب بكرة بنخلف الكيّة

[٣]

في درب النضال خابرين طريقنا سِلِكنا

رغن انف الأرادل والبقولوا هِلِكنا

ماسكين في فكينا وما بنخلّي سِلِكنا

والقايد الكبير حمدوك حبيبنا مِلِكنا

[٤]

يا عبد الوهاب مالك بقيت تتكبكب؟

انت براكَ خلّيت الأمور تتكركب

اركب زي بشيرك ما ركب، قوم اركب

ارحل، ما نشوفك تاني في ها الكوكب

[٥]

يا عبد الوهاب اصلو الايام بتدور

ف شنو، تقوم تخرمج، سوّي زي ما تدور

كُشّ السفرا جت، قولّيهم يخلوا الدور

واوعك تنسى ياخ تطلق سراح غندور

[٦]

أذّان الفجر حسّع نده نبّاهو

اصبر يا الغشيم والجاك ما تاباهو

سبتو العالي قدرو البيهو كان تتباهو

جبتو التوم هجو، لا مؤاخذة، وأشباهو

[٧]

يا عبد الوهاب ما بتلقوا زول جهبوذ

بقبل يشتغل في خدمة #المنبوذ

المليان عُقد، كل مرّة مادّي البوز

وحتّى وقت يشوت اشتر بشوت بالبوز

[٨]

يا حليل الرجال، شوف الشنب والهيبة

يا ود الاصول الما بتعَرْف العيبة

أسبوعين كتير يا غالي وين الغيبة

يقدل بي وراك عملا السواد والخيبة

[٩]

كلمتك آب شنب، خلّت حميدتي يتمتم

ينضم مرّة ويسكت ومرّة يبدا يشتّم

ويكلفت سريع فوق انقلابو يتمتم

أرفدك، أطبعك، امضاكَ، أكتب، ختّم

[١٠]

أقلب كم حجر كان تلقى ليك وزير

وجيب كم توم هجو، لا مؤاخذة، وخنزير

وداك ليو كوم ارادل راقدة تحت الزير

والكيزان مدلدلة فوقو بالجنزير

[١١]

يا عقّار لقيت بعد البطولة بطالة

"لاقينا الرفيق"، قال، "حالتو ما بطّالة"

باري اردول وديل زيد العطالى عطالة

حيطة الثورة عالية ومافي خاين طالا

[١٢]

جبريل استحقّ براهُ لقب #الواطي

خبث ودهنسة وخسّة وغرور وتواطي

غرقان في النذالة المافي ليها شواطي

ناس تاطا الجُمر لي غرضو فوقم واطي

[١٣]

يا عبد الوهاب البينّا أصبح دم

جايينّك هناك اتغتّى واتدمدم

وحميدتي الوراك قول ليه شيل واندم

يوم تلقى البنيتو اتهدّ واتهدّم

[١٤]

.. صدقوا الشباب اللقّبو(ه) #الوسخان

البايع ضميرو وباع عهودو وخان

أسيادك هناك بيقولو ليك برخان؟

النار لسّة جاية الشفتو دا الدخّان

[١٥]

اتحدّى الكجر قالُّم بدور نتباطن

الحُر الكلس، جد قولو ماهو غلاطاً

وبفد كلمتين خلّى المكن تتراطن

احتاروا الكلاب لامن رؤوسم طاطن

[١٦]

ما قصّرتي تب يا مريم المنصورة

خلّي الصوت يصل، بالصوت كمان والصورة

أعصري ها الكلاب اكتر هي ما معصورة

سقطت وانتهت بس راجية ينفخوا صورا

[١٧]

ليه راكبين حصين دام انتو ذاتو حصين؟

ومتحدثّكم أهبل والمعاه رصين؟!

قال قال ما سمعنا! إنتو وين؟ في الصين؟

قوم، قامت قيامتك؛ نحن ما ناقصين

[١٨]

حمدوك انسخت، خذل الجميع بي فعلو

يرقد تاني ساي لحميدتي ويمسح نِعلو

والهانو الكريم بين العباد ما بِعلو

شلنا الفاتحة فيو عزّينا فوقو الزِعلو

[١٩]

مدّينا العِنب واختار يياكل الموز

ومن كان ليهُ هيبة اختار يكون أراجوز

ويبقى مع الأرادل والخسيس الكوز

مع عبد الوهاب، اتلمّوا جوز اللوز