«مستخدم:عبد الله جعفر/سيما الوسيمة»: الفرق بين المراجعتين

المراجعة الحالية بتاريخ ٠٨:٥٤، ١ مايو ٢٠٢٢

بمناسبة صورة شاركتها سيما الجاك على صفختها في فيسبوك، كتبت لها بعض المربّعات؛ ثمّ دعوت شلّة مساجلات الزينة الرزينة لإثراء الأبيات، فكانت هذه التشكيلة. جمعت الدفعة الأولى في هذه الصفحة، وقدّمتها لها كهديّة في عيد ميلادها.

[١] عبد الله:

سيما الوسيمة الللقلوب حصّادة

دي الصيدة الوديعة الصايدة كل الصادا

والنجمة التلالي الجهجهت رصّادا

كايسين شوفتا وبنخاف نقيف في قصادا

[٢]:

سيما الوسيمة الللقلوب هرّادة

كضّاب البقول شاف صورتا وما رادا

أدّينا الفروض في ريدا بي أورادا

ربّنا يحفظا ويتّمّ ليها مرادا

[٣]:

سيما الوسيمة الللقلوب جيّابة

كضّاب البقول ما بهدلنّو تيابا

حتّت اتونا حت، وآساتنا بي شُيّابا

سامّين عشرة واتسيّكنا سيك اليابا

[٤] أمنية:

خليك انت، ياخي الجكس ذااااتو اتكسر

في الطرف النعس والجفنو فوقو مكسر

دي ما بسمة نصاح مذيودة جردل سكر

حاجة تفرهد اللي الموت سنين هو محدر

ما شاء الله ❤️

[٦] حسبو:

دا نص عمرو ضايع اللي ما شاف سيما

خايفين نظلما لو قلنا غادة وسيمة

في سباق الجمال فاقت بنات السيما

كسحت فاتتن.. والحالة بالتقسيمة!!

[٧] عبد الله:

اجتاحت حصون افكارنا بي مكسيما

لحدود القلب قالت يعاد ترسيما

رضيان الّا بس كايس الكفاف لاسيما

ما خلّتلي حق النبضة في تقسيما

[٨] حسبو:

من صبحا" بكير الليلة هب نسيما

وغليان القلب بس تنقصو التلقيمة

أنا داخل الغريق حت لو تشيلني الشيمة

وخايف انفجر زي قنبلة هيروشيما!!

سيما:

عبدالله خلاص بس عرفنا ذوقك وموديلك.

انت عجبك حق ناس زماااان 🤣

تسلم ياخ لكن انتظر انزل صورة ابديتيت

بعدين انشرها عشان يشوفوا النيو لوك 😎

[٩] عبد الله:

ما بفرق معانا ان كان قديم ونيو

يا سيما الوسيمة القصّة ياخ إن يو

ما طال الزمان انتي الجمال مينيو(ه)

والذوق ان لينيكس ح تكوني جي ان يو(ه)

[١٠] عزّة:

سيما حليوة جد والله عاد ووسيمة

سبحان من خلق واداها احلى رسيمة

كاسيها الحسن الخالي من تعسيمه

ومنثورة الدرر وتقول دي احلى بسيمة

[١١] عبد الله:

حبّاها الجميع ما عرفنا ليها خسيما

ترتاح الصدور ان مرّ بيها نسيما

إلا بس العيون بتصيب اصابة جسيمة

بتملّ القلوب فوق العذاب وتسيما

[١٢] عزّة:

من زينة ورزينة الليلة جاتنا وسيمه

فخرالدين وحسبو وعبدالله قاعد ديمة

يا عمرابي قول اشجينا بالتقسيمة

جيب منو وتعال قولو الشعر في سيما

[١٣] فخر الدين:

زي مطر الرشاش مرسال حضورا نسيما

فرة فاها تشلع بي البروق في بسيما

تحكي الموجة في الفدعة ومياس قِسيما

الريش والحرير ما لحقو نادي جسيما

[١٥] عزّة

جاريت الجمال بالقول وبالتقسيمة

ودوزنت الشعر اديتوا شنة وقيمة

شفنا درر تلالئ الليلة زاد تبسيما

مبسوطة البنية ان شاءالله يارب ديمه

[١٧] حسبو:

سيما الجاك كريمة وواعدة ب new look

أقلب صفحة أقرا سطر وأفتح book

بالغ في الكرم واستخدم افضل cook

عضلاتك أفردا .. زي المصارع Rock

[١٨] عبد الله:

راجين الجديد يظهر، نشوف ونـ look

وحتّى حينه، نعجن شِعِرنا نلُك

إلّا الحاضرة للمنظورة بتدلُّك

واضحة الصورة ما محتاج تكون شيرلوك

[٢٠] فخر الدين:

في الجد والهزل مزج العسل لهجاك

يا عيد الفرح يا الكل زول برجاك

من فيض السماح مادحك كأنو هجاك

والقال يوم حواك يا دوبو بتهجاك

[٢١]:

المولى الكريم من عين خلوقو حجاك

يا الوجهك صباح والديس بحاكي دجاك

غرقان يا ام سماح أنا في بحور داعجاك

يا زينة البنات يا الصيدة بت الجاك

[٢٣] حسبو:

ما دام بقت سيما الترند

ومع كل أول ليهو إند

قول ليها ما تطول غياب.. تعمل أتند

ركويستي دستو ب آد فريند!!🥇

[٢٤] مجاهد:

سيما الوسيمة الللقلوب خطافه

جننت ناس عبد الله اخوي وكل الشافها

الخلاني ادوبي اجر النم وارتل اوصافها

فديع القصار الناعس مايقها وضامر هافها

[٢٥] سليمان:

سيما مبطَّرة.. سمحة طباع وعديلة

سيما معطَّرة.. وشايلة الدليل منديلا

سيما مَتَبَّرة.. فارعة ومتَمَّن كيلا

فاتنة معبِرة تملا العيون وتكيلا