«مروة بابكر/بائع الفواكه»: الفرق بين المراجعتين

قايم مع الفجر الصباح
ساكي الرزق
راصيهو حبة برتكان فوق الارض
احلامه بس دكان
صغير.. ووطن كبير
يملانا بالطول والعرض ..
وببيع حلال
راجينه ناس البيت هديك
راجل ولا سيد الرجال
اشرف من أكواز الضلال
ما ببيع حلال
ديل العدال
ديل الغبش شم الجباه

والتاني داك..
التاني يصحى من الصباح
صفا انتباه صفا انتباه
جاهزين تفكو الطلقة
باسم الاله
جاهزين تعذبو في الخلوق
دون اشتباه
الليلة في بحري المروق
وحزمت أسلحتك مشيت
كمين رصاص كمين عصي
غازا مسيل للدموع
فكيت ولا هماك زول غلبه المشي
فكيت وفي نص الخلق
بائع شريف
ساكي الرزق
عما كبير
مارق عشانك ياوطن
بايد جنودك يختنق؟؟؟
ادينا يا أبويا السماح
دي عمايل الشالوا السلاح
زرعوا المفاسد والهلاك
فاضت رويحتك كالملاك
فاضت رويحتك للعظيم
ووصية بس يا ابوي هناك
سلم على عبد العظيم ..