«يوسف محي الدين/بابور الفزع»: الفرق بين المراجعتين
ط (نقل Abdalla صفحة يوسف محيي الدين \ بابور الفزع إلى يوسف محيي الدين/بابور الفزع: تحويل القصائد إلى صفحات فرعيّة للشعراء) |
|
(لا فرق)
| |
مراجعة ٠٥:٠٥، ٢٥ ديسمبر ٢٠٢٠
قصيدة ثوريّة كتبها يوسف محيي الدين بمناسبة وفود قطار عطبرة لدعم اعتصام القيادة. في قالب المسادير، نشر مربّعاتها مجزّأة على صفحته على فيسبوك، مروراً بالمحطّات: عطبرة - الدامر - الزيداب - العالياب - المحميّة - أم على - كبوشية - التراجمة - شندي - جبل جاري - الرويان - الجيلي - القبّة - الكدرو - بحري - الخرطوم؛ ثمّ نشرها مجتمعة في 26 أبريل 2019.
النص
بابور الفزع........ قام بي حديدو ونارو
أب نفسا سخن ....متل الجرارق الثارو
الصنفور وقف.... خلى الخلوق يتجارو
في السكة الحنين راجين هناك اخبارو
عَصَر القضيب........قالت فلنكتو ووب
اطناشر ضهر. ... فوق دامر المجدوب
انجمّ و سَدَر .... شويم تجاهو جنوب
في وداعة الكريم عارف القدر مكتوب
اتنهَّف شخَر .........ميَّل على الزيداب
بُوريهو الحنين...... طراني عود زرياب
دخانو العَكَل ....في الجو تكنّو سحاب
ختّاف المسافة ان فات تشوفو رِهاب
في العالياب وقف ممشوق وليهو مهابة
اتمغّى وعطس...... دخانو جاب عطرابة
شقّاق الوعر.... جَبَّال.... قَوَزَّن..... وغابة
.....فوق ضهرو بيشيل الكُحلهم دِنقابة
انقسم النهار..والناس عطش مروية
قام كاتل ملف..عجلاتو دافعة الدِّية
العوضاب عموم راجنو في المحمية
نحرو امات سنام وياها دي المحرية
لاح جبل أم علي....فوق الرمُل متشتّح
بابور الفزع .........طالق عجاجو يكتّح
في ليل في نهار...... سواقو ديمة مفتِّح
الخابر العطشجي والفوق قَمَرتو مسطِّح
...قام ناظر كبوشية وقلبلو الشوكة
تاكينلو الكُباشة وحامية نار الدوكة
تنكيهو انسرف.. جُلّة عجلتو دبوكة
دخانو اتربط في راسو متل التوكة
دخل التراجمة.... تروسو سوّت كَرعة
فاض بيهو الحنين نونايو شق التُّرعة
سواقو الهميم من شوقو زاد السرعة
مكتول بالشجن لاحق حسين بازرعة
قام ناوَر جِهِز .....صعّد مقابل شندي
سواقو انسطل.... بي ريحة الباشندي
إن ما الاعتصام..... راجيهو للجربندي
كان عايز مبيت الخدُّو يوسف افندي
عمال الدريسة راجنّو تب في جاري
سواقو الشفت قام بيهو فاتح جاري
ماقرّب يصل؟ ..شفقان اناغم جاري
بي طعم النصُر الفاق سلا وقنجاري
فات حجر العسل شارف على الرويان
بي حب الوطن....... وترابو قام مليان
قفلولو الطريق ....العمدة جاو حفيان
حاتم طي هناك... انشاف عيان وبيان
....استعدل نفخ نار غُبنو فوق بَفَّاتو
قادل بالعديل..الجيلي شاف مصفاتو
السكة الحنين خابراهو عارفة صفاتو
كم شال الهموم وحفظ الجميل للفاتو
قشَّاش الطريق...دخل العِصير القبة
...حرية وسلام وعدالة جوفو معبّى
الفوق السطوح ثايرين و عاملين ربّة
ناصرين الهناك ..جنب القيادة انصبّ
المنقة استوت والموز مخَدِّر شَدَرو
خيراتن كتار بانن هناك في الكَدَرو
فرسان الوعر الفي الغياهب سَدرو
العزو البلد ....لا خانو تب لا غَدَرو
الشمش انتكت....والناس صبُرهٌم قطَّ
يا بحري السلام.... باقيلنا تاني محطّة
ود النُّص* كتب.... لا ساب سطر لا فطّ
في دفتر هواك... يا عزة عارف الخُطّة
يا السايق القطار سُقت القلوب في السِّكَّة
خلِّيت القُلامة ..........متل العيون تتبكّى
يوم قطرك دخل.............جوة القيادة وركّ
راجياهو الجموع......فرحانة زي يوم مكة