«قواعد الذوق الأربعون»: الفرق بين المراجعتين

مراجعة ١٥:١٦، ١١ ديسمبر ٢٠٢٠

سلسلة نصائح في الذوق العام صاغها محمد ميرغني، وعرضها على صفحته في فيسبوك، مستخدما هاشتاق #قواعد_الذوق_الأربعون

المحتوى

[١] ليس من الضروري أن تبدي رأيك في كل شيء، لاسيما إن كان قد يؤذي آخرين.

2/ ما تنصح زول قدام الناس أياً كان غلطو، احترم مشاعرو عشان يحترم نصيحتك^FB

ولو الغلط بسيط فالتجاوز أفضل.

3/ لمن زول تفلت منه كلمة أو يعمل حركة مُحْرِجَه قدامك ويخجل من روحه.. تظاهر بإنك كنت مشغول بشي تاني و ما سمعت ولا شفت شي ^FB. حركة بسيطة لكن حتجبر كسر كبير في نفسه..

4/ لمن زول يحاول في شي كتير ويفشل ويستعين بيك فقبل تنجز الأمر تظاهر بإنه صعب (مهما كان ساهل بالنسبة ليك).^[١]

مثلاً لو أمك استعانت بيك تدخّل الخيط في الإبرة فتظاهر بالفشل قبل تدخّل الخيط عشان تطمنها انها لسه صغيرة ونظرها كويس.

حاجة صغيرة خالص لكن أثرها في النفس كبير.

#إحسان

5/ لمن يكون عندك زول بِحتاج خدمة منك من وقت لآخر، فإنت برضو أطلب منه حاجات بسيطة في إمكانه (حتى لو ما محتاج ليها) بس عشان ما يتحسس لمن يحتاج ليك ..^[٢]

وأنا واثق إنك لو عملت كدا لوجه الله فحيجزيك ثواب كأنك متصدق برضو.

#إحسان

6/ ما تعمل "هاها" لبوستات جادة.^[٣]

#فيسبوك

7/ ما تعلق سلباً على شكل زول أو وزنه (أو أي شي ما بيده تغييره) أياً كانت قرابتك بيهو وأياً كان قصدك من التعليق.^[٤]

ما دام ما عندك كلام طيب يبقى تسكت بس.

#بديهيات

8/ ما تسأل ناس متزوجين بقيتوا تلاتة ولا عشرة.. ما بخصك.^[٥]

ما تسأل الخاطب العرس متين كل شوية؛

ولا تسأل أنثى (أياً كان عمرها) ماف حاجة في السكة يابت؟ وحتقعدي كدا لمتين؟

ما قاعدة في بيت أبوك هي 😒؛

الزواج والإنجاب دي حاجات بيد الله وحده وسؤالك محرج وسخيف لكن هم حيجاملوك في الاجابة لأنهم ظريفين ما زيك 😒.

#احترام

9/ ما تنتقص من حاجة أثٌرت على مشاعر زول سواء فرح أو حزن مهما كانت الحاجة دي بسيطة في نظرك و ركّز على مشاعره ما على الأسباب.^[٦]

مثلاً:

زول فرحان بإنه دخل الجامعة ما تنتقص ليو من الإنجاز بكلام زي ما عارف الراجيك وبتاع..

كل مرحلة عندها إنجازاتها.

زول زعلان من حاجة ما تقول ليو هسي دي حاجة تزعّل؟ وعينة الكلام الزي دا..

زول حزين من حاجة ما تتفه ليو سبب حزنه

ركّز على طمئنته وتقويته هو بدل تطّلعه ضعيف وبحزن من حاجات ما بتستحق..

احترامك للشخص بفرض عليك تحترم مشاعره وتقدّرها وما تشوف كل شي من زاويتك انت براك.

#جبر_الخواطر

10/ الريجكشن مسج أبدا ما عيب ولا حاجة محرجة إطلاقاً، المحرج والسخيف إنك تخلي الزول متعشم لفترة طويلة من الزمن ومنتظرك ..^[٧]

رجاءً يا أصحاب الـ Events كلّموا الناس الما تم اختيارهم بطريقة فيها ذوق وراعوا لمشاعرهم في طريقة نقل الخبر برضو.

#عمل

وصلات ومراجع

1. ↑ البوست الأصلي للقاعدة 4
2. ↑ البوست الأصلي للقاعدة 5
3. ↑ البوست الأصلي للقاعدة 6
4. ↑ البوست الأصلي للقاعدة 7
5. ↑ البوست الأصلي للقاعدة 8
6. ↑ البوست الأصلي للقاعدة 9
7. ↑ البوست الأصلي للقاعدة 10