«عبد الله جعفر/مسدار لاهاي»: الفرق بين المراجعتين
(أنشأ الصفحة ب'تصنيف:أشعار الثورة كتبه عبد الله جعفر مع تنامي الحديث في يناير 2020 حول تسليم البشير لمحكم...') |
(لا فرق)
|
المراجعة الحالية بتاريخ ٢١:٤٨، ١٠ أبريل ٢٠٢٢
كتبه عبد الله جعفر مع تنامي الحديث في يناير 2020 حول تسليم البشير لمحكمة الجنايات الدوليّة في لاهاي. كتب المربّعات بصورة منفصلة ونشرها تباعا على صفحته في فيسبوك في 2020-01-12، مستخدما هاشتاق #مسدار_لاهاي، ثمّ قام في العام التالي بنشر الأبيات مجتمعة في 2021-01-12.
النص
أسد افريقيا قالوا يسلّموه لاهاي
على قدر المقاس، لا جاتو لو لا هاي
سلّم لي علي الدوليّة قولّا هاي
وهاي كانت نهاية القصّة كلّا هاي
القال "جزمتي" ختّوه تحت الجزمة
والشعب ابتسم رغم الصفوف والازمة
ما نقصان سيادة ولا البلد منهزمة
إلا بس البشير ما عادلو عندنا لزمة
أسياد الوجع قالوا البشير يتسلّم
اتحسم الكلام،، يا اخوانّا ما بنتكلّم
العامل أسد، الليلة عاد اتبلّم
ان شا الله الضباع البي وراو تتعلّم
وين زمن البشير اتحدّى كان أوكامبو
واتنتّر كدي،،،، وصرّح، وعامل رامبو
إلا طلع بتاع "هوت دوق" وبيرقر جامبو
واحرج ناسو بي ظرف القروش القامبو
كوبر للرجال يا اخونا ما للزيّك
اجهز يا البشير والبس نضيف واتشيّك
وبلاقوك هناك ويقولوا ليك ازّيّك
السمّيتا عشرة الليلة عاد اتسيّك
ما مصدّق تكون عاد يا البشير مخلوع
هه، ٣٠ سنة،،، وبرضك بقيت مخلوع
كوبر، قلت خير، لاهاي دا ما مبلوع
من لاهاي دي تب ماف تاني ليك طلوع
ايّام البشير صبحت قصص، وحكاوي
نتطعمج ننكّت نحكي بيهُ نكاوي
من ميسّي وفنيلتو لصرفة البركاوي
في لاهاي نشوف ان عندو تاني شكاوي
قايلينّك أسد جبنا الحبال والشرعة
إلّا طلع ورل تتجارى جنب الترعة
يلّا بلاش كلام، لاهاي نفر، بي سرعة
وان بتدور رفاق، في كوبر أعمل قرعة
الخبر الاكيد طمّن قلوب شكّاكة
منّ الخوف بكون في هدومو سوّى الكاكا
والليلة الجداد الكان بكتكت كاكى
شاهدين آلبشير أوكامبو جد سكّاكَ
منفوخ بالكضب رافع نخرتو وهوّش
الّا طلع بتاع غمتات ولقّط حوّش
احرج ناسو سوّى فضيحة ما تتشوّش
آسك يا البشير الليلة عاد اتبوّش
وينك يا الامام الحقنا ياخ بي شملة
شان عمر البشير في هدومو عامل عملة
دا العامل أسد، فلّينا متل القملة
على لاهاي طويل، تفرغ عيونو وتملا
[١٢] بشّة يكتب:
يا حليل الوفا وعهد الزمالة الهان
بعتوني برخيس يا حميدتي والبرهان
ولي لاهاي كمان؟ ياريتا كان أوهان
الموت كان اخير، سبتوني شان اتهان؟
😪😪😪
ياخوانّا البشير حسّع بكون مزنوق
ممكون باقي لي بي عبرتو ومخنوق
قايلا مسرحيّة، وهه، طلع مشنوق
لو لاهاي مهانة ولو قعد مشنوق
[١٤] حميدتي والبرهان يردّان:
بيناتنا شي؟ يا اخونا مالنا ومالك
اتوظّفنا بي مال البلد ما مالك
بالرخيس؟! يا بشّة هوي، راسمالك
ما ترميها فينا ارميها في إهمالك
[١٥] وداد تكتب:
محبوبتك وداد يا بشّة بتقول هاي
بشّة ف ذمممتك ودّيني بس لاهاي
أمدرمان كعب، وهناك سجن هاي هاي
ورّوني الصور، والله شغل شهّاي
كل حاجة بأوانا، وحسّة آن أوان
الاسد يتنقل لحديقة الحيوان
في لاهاي هناك ما بين ذل وهوان
دا محلّك هناك، ضوق العذاب ألوان
لا عز الملوك لا حكمة النـُظّار
لا هيْبْة الرجال البحسروا الأنظار
قايلينّك نبي، تاريك بشير الظار
على لاهاي طويل خارجنا مافي هظار
عشمان البشير يلقى الحصل لمبارك
الّا الشغلة جاطت حسّة ما بتتدارك
كل واحد فريدة نهايتو ما بتتشارك
اجهز تمشي لي لاهاي وتاكل نارك
أجهز يا البشير كان ترضى كان دبرست
لي لاهاي هناك تمشي ومعاك نص دستة
ح تقشّو الدرب يا حبّة تعملوا تستة
حتّى نشوف كمان برهان، وباقي اللستة