«مستخدم:عبد الله جعفر/سيما الوسيمة»: الفرق بين المراجعتين
ط |
عبد الله جعفر (نقاش | مساهمات) |
||
| سطر ١: | سطر ١: | ||
| − | بمناسبة صورة شاركتها [[سيما الجاك]] على [https://www.facebook.com/MayaAhmed/posts/10159214288948771 صفختها في فيسبوك]، كتبت لها بعض المربّعات؛ ثمّ دعوت شلّة [[مستخدم:Abdalla/الزينة_الرزينة|مساجلات الزينة الرزينة]] لإثراء الأبيات، فكانت هذه التشكيلة. جمعت الدفعة الأولى في هذه الصفحة، وقدّمتها لها كهديّة في عيد ميلادها. | + | بمناسبة صورة شاركتها [[سيما الجاك]] على [https://www.facebook.com/MayaAhmed/posts/10159214288948771 صفختها في فيسبوك]، كتبت لها بعض المربّعات؛ ثمّ دعوت شلّة [[مستخدم:Abdalla/الزينة_الرزينة|مساجلات الزينة الرزينة]] لإثراء الأبيات، فكانت هذه التشكيلة. جمعت الدفعة الأولى في هذه الصفحة، وقدّمتها لها [https://www.facebook.com/abdalla.gafar.3/posts/10165456299160707 كهديّة في عيد ميلادها]. |
مراجعة ٢٠:٢١، ٢٩ أبريل ٢٠٢٢
بمناسبة صورة شاركتها سيما الجاك على صفختها في فيسبوك، كتبت لها بعض المربّعات؛ ثمّ دعوت شلّة مساجلات الزينة الرزينة لإثراء الأبيات، فكانت هذه التشكيلة. جمعت الدفعة الأولى في هذه الصفحة، وقدّمتها لها كهديّة في عيد ميلادها.
سيما الوسيمة الللقلوب حصّادة
دي الصيدة الوديعة الصايدة كل الصادا
والنجمة التلالي الجهجهت رصّادا
كايسين شوفتا وبنخاف نقيف في قصادا
[٢]:
سيما الوسيمة الللقلوب هرّادة
كضّاب البقول شاف صورتا وما رادا
أدّينا الفروض في ريدا بي أورادا
ربّنا يحفظا ويتّمّ ليها مرادا
[٣]:
سيما الوسيمة الللقلوب جيّابة
كضّاب البقول ما بهدلنّو تيابا
حتّت اتونا حت، وآساتنا بي شُيّابا
سامّين عشرة واتسيّكنا سيك اليابا
[٤] أمنية:
خليك انت، ياخي الجكس ذااااتو اتكسر
في الطرف النعس والجفنو فوقو مكسر
دي ما بسمة نصاح مذيودة جردل سكر
حاجة تفرهد اللي الموت سنين هو محدر
ما شاء الله ❤️
سيما الوسيمة الللقلوب لوّاحة
ريدتا في الأزل مكتوبة في اللوّاحة
بندور ننستر، عِلّا العيون لوّاحة
من جنّة نعيما منانا بس لو واحة
اللوّاحة في البيت الثاني صيغة جمع للوح.
[٦] حسبو:
دا نص عمرو ضايع اللي ما شاف سيما
خايفين نظلما لو قلنا غادة وسيمة
في سباق الجمال فاقت بنات السيما
كسحت فاتتن.. والحالة بالتقسيمة!!
اجتاحت حصون افكارنا بي مكسيما
لحدود القلب قالت يعاد ترسيما
رضيان الّا بس كايس الكفاف لاسيما
ما خلّتلي حق النبضة في تقسيما
[٨] حسبو:
من صبحا" بكير الليلة هب نسيما
وغليان القلب بس تنقصو التلقيمة
أنا داخل الغريق حت لو تشيلني الشيمة
وخايف انفجر زي قنبلة هيروشيما!!
سيما:
عبدالله خلاص بس عرفنا ذوقك وموديلك.
انت عجبك حق ناس زماااان 🤣
تسلم ياخ لكن انتظر انزل صورة ابديتيت
بعدين انشرها عشان يشوفوا النيو لوك 😎
ما بفرق معانا ان كان قديم ونيو
يا سيما الوسيمة القصّة ياخ إن يو
ما طال الزمان انتي الجمال مينيو(ه)
والذوق ان لينيكس ح تكوني جي ان يو(ه)
[١٠] عزّة:
سيما حليوة جد والله عاد ووسيمة
سبحان من خلق واداها احلى رسيمة
كاسيها الحسن الخالي من تعسيمه
ومنثورة الدرر وتقول دي احلى بسيمة
حبّاها الجميع ما عرفنا ليها خسيما
ترتاح الصدور ان مرّ بيها نسيما
إلا بس العيون بتصيب اصابة جسيمة
بتملّ القلوب فوق العذاب وتسيما
[١٢] عزّة:
من زينة ورزينة الليلة جاتنا وسيمه
فخرالدين وحسبو وعبدالله قاعد ديمة
يا عمرابي قول اشجينا بالتقسيمة
جيب منو وتعال قولو الشعر في سيما
[١٣] فخر الدين:
زي مطر الرشاش مرسال حضورا نسيما
فرة فاها تشلع بي البروق في بسيما
تحكي الموجة في الفدعة ومياس قِسيما
الريش والحرير ما لحقو نادي جسيما
[١٤]:
يوم خلقو الجمال كان المثال تجسبما
فارع جيدا ما شانت السماح تعسيما
النور درها المنظوم و نارها السيما
شحتف روحي شوق اللابدة جوّا إسيما
فخر الدين:
السيما حلوى تشبه بها الشفاه.
إسيما تصغير إسمها.
[١٥] عزّة
جاريت الجمال بالقول وبالتقسيمة
ودوزنت الشعر اديتوا شنة وقيمة
شفنا درر تلالئ الليلة زاد تبسيما
مبسوطة البنية ان شاءالله يارب ديمه
[١٦] سليمان:
يا عزة الجمال عند سيما واحد وناين
وكل الناس مقهية فوق بسيما تعاين
في الصور القديمة رايقة زينة وفاين
ريِّح بالنا قول يا بيري "شي إز ماين"
"بيري" يقصد عبد الله، كانوا pair في لابات الجامعة.
[١٧] حسبو:
سيما الجاك كريمة وواعدة ب new look
أقلب صفحة أقرا سطر وأفتح book
بالغ في الكرم واستخدم افضل cook
عضلاتك أفردا .. زي المصارع Rock
راجين الجديد يظهر، نشوف ونـ look
وحتّى حينه، نعجن شِعِرنا نلُك
إلّا الحاضرة للمنظورة بتدلُّك
واضحة الصورة ما محتاج تكون شيرلوك
أكان يا روحي من نفحة نسيما الجاك
تخطّطي لي نجاتك وتدرسي ملجاك
سوّت فيك سوات روز الجسيمة لجاك
حوريْة السما السمّوها سيما الجاك
عبد الله: أنا افتكر مفروض اعتزل بعد القافية دي 😌😌😌
حسبو:
ما تعتزل .. ولا تختزل
اجدع حروف.. أشتل شتل
لا هايد انت ولا جيكل
سافر كتير.. أعمل shuttle
تلقى المعاملة بالمثل!!
قال اعتزل
[٢٠] فخر الدين:
في الجد والهزل مزج العسل لهجاك
يا عيد الفرح يا الكل زول برجاك
من فيض السماح مادحك كأنو هجاك
والقال يوم حواك يا دوبو بتهجاك
[٢١]:
المولى الكريم من عين خلوقو حجاك
يا الوجهك صباح والديس بحاكي دجاك
غرقان يا ام سماح أنا في بحور داعجاك
يا زينة البنات يا الصيدة بت الجاك
[٢٢]:
حليل ليم القبيل بي قوقو قال واشجاك
وبي الدل والدلال من غير حديث حجاك
هزاك بي الجمال حرق حشاك خجاك
وسهم المقلة صابك في الفؤاد سجاك
سارّة عبد الله: الترجمة لو سمحت؛ بعرف قوقو الملابس
فخر الدين: القوق ترخيم للقوقاي وهو صوت القمري.
[٢٣] حسبو:
ما دام بقت سيما الترند
ومع كل أول ليهو إند
قول ليها ما تطول غياب.. تعمل أتند
ركويستي دستو ب آد فريند!!🥇
[٢٤] مجاهد:
سيما الوسيمة الللقلوب خطافه
جننت ناس عبد الله اخوي وكل الشافها
الخلاني ادوبي اجر النم وارتل اوصافها
فديع القصار الناعس مايقها وضامر هافها
[٢٥] سليمان:
سيما مبطَّرة.. سمحة طباع وعديلة
سيما معطَّرة.. وشايلة الدليل منديلا
سيما مَتَبَّرة.. فارعة ومتَمَّن كيلا
فاتنة معبِرة تملا العيون وتكيلا