«مستخدم:عبد الله جعفر/نونيّة ست الهنا»: الفرق بين المراجعتين
عبد الله جعفر (نقاش | مساهمات) |
عبد الله جعفر (نقاش | مساهمات) (←النص) |
||
| سطر ٨٢: | سطر ٨٢: | ||
{{بيت|وكم صاغ قصايد كم نظم|رتّب حروفو وقرّنا}} | {{بيت|وكم صاغ قصايد كم نظم|رتّب حروفو وقرّنا}} | ||
{{بيت|ووكتين يجد وكت الشعر|تلقى الحروف ما أحرنا}} | {{بيت|ووكتين يجد وكت الشعر|تلقى الحروف ما أحرنا}} | ||
| − | {{بيت|فتّش شياطين الشعر|تاريها ليكِ | + | {{بيت|فتّش شياطين الشعر|تاريها ليكِ مقرّنة}} |
مراجعة ١١:١٥، ٢٦ يناير ٢٠٢٤
قصيدة أمّيّة كتبتها لشريكة حياتي هناء عبد الحفيظ، ونشرتها في صفحتي على فيسبوك في 2022-08-03.
النص
(أ)
"يا غالية" يا ست الهنا
"بعتزّ بيك" واهواك انا
ودّعت بي شوفتك عهود
ضاعت مآسي وأنأنة
"إنت الأمل وانت الرجا"
وانت الأمان والطمأنة
روحك محل روحي استوت
واتحكّرت جوّة الأنا
(ب)
زي زول لقى الدرّة الفريـ
ـدة الغالية صُدفة وصبّنا
إنت المقام السرمدي الـ
ـما بطولو زول مهما بنا
في شان لقاكِ البلقى ليو
قربة دهب كان عربنا
وفي شان رضاك البقدر يقـ
ـسم روحو ليك كان قربنا
(ت)
يا "جنّة" "حيّاها الغمام"
وسقاها "طل" أو هتّنا
وكأنّو رضوان بي رقبتو
القام علي روضا اعتنى
واحنا البنصرخ "أن أفيضوا"
وخلّوا لينا البشتنة
لو حبّي ليك أدّوه قا
هِرة المعز كان كرتنا
(ث)
لله كم ردّيتي روح
من فك منايا وبرثنا
ولله كم خلّيتي ناس
ممنونة تلهج بالثنا
يا طب نفوسنا الطيّبا
وعالج قلوبنا وهّلثَنا
"يا واعية يا دارسة الكتاب"
يا تاج أثّينا الأثّنا
(ج)
أرواحنا "نحن مع الطيور"
بي طيرا ريدك سجّنا
وافكارنا كانت جامحة لمـ
ـّن "طاف خيالك" دجّنا
وامخاخنا كان توزن بلد
خشّت مجالك لجّنا
وقلوبنا كان متل الحديد
هدّاها حبّك كوجنا
(ح)
يا السمحة جار بينا الزمن
وأفكارنا حارت محّنا
وتعبنا من شيل الهموم
وضهرنا طقطق وانحنى
جيناك كايسين الحنان
يا الملكة لو قلبك حنا
عندك بور بانك القلوب
أدّينا وصلة النشحنا
(خ)
يا الملكة هدّانا الدهر
عمّق جراحنا وأثخنا
كسّر ضلوعنا وسولبا
وعذّب نفوسنا وسخّنا
وخلّانا لامن ما بنحس
موّت جلودنا وتخنا
وامخاخنا من كتر الحساب
حرقانة بتدور مدخنة
(د)
إلّا الأمل عاودنا وكتين
بنتِ بي قربك دنا
من وحيك انسابت لحون
وشجون ونوبة ودندنة
واجترّت أنغام السنين
"قرويّة" ديكي و"هودنا"
والشوق بعد شوفتك مسك
صاحب رويحتي وفردنا
(ذ)
ريدك دا لا شاورنا لا
نبّه عقولنا وآذنا
بس قال "بما أنّو" وسكت
فطّ البراهين لي إذنا
اجتاحنا عسكر في قلوبنا
وخشّ توش ما استأذنا
أحياها بي نارا ومسيدا
واقام صلاتا وأذّنا
(ر)
الواحد يتعب بالسنين
طوّع معاني ومرّنا
وكم صاغ قصايد كم نظم
رتّب حروفو وقرّنا
ووكتين يجد وكت الشعر
تلقى الحروف ما أحرنا
فتّش شياطين الشعر
تاريها ليكِ مقرّنة
(ز)
"أنا بيك سعادتي مؤكّدة"
ودنياي بلاك ما أحزنا
"يا غالية يا نبع الحنان"
زاد المحبّة ومخزنا
يا أعذب ألحان القلوب
أنا قلبي داير دوزنة
و"يا ألطف إنسان أعرفو"
ويا "زينة" عاد ما أرزنا
(س)
لله يا شمس المعاني اد
يني من نورك سنا
يا حكمة في "اللوح" القديم
منسوخة "باخد باحسنا"
"فرحانة بيك كلّ النجوم"
بي مدحك يلهج ألسنا
يا جنّة الله في الأرض
يا روض ربيعا وسوسنا
(ش)
إنتِ الجمال سووه ليك
يا السمحة وادّونا الشنا
وانت "الزمرّدة كوكبك"
واحنا البنحضر "آكشنا"
وانت الرزانة بتشبهك
وادّينا نحنَ التنشنة
وعلى العلينا الريد مسك
شوشو قلوبنا وكشّنا
(ص)
برقيك بي كلّ السور
ومن المعوذات أحصنا
حاولت أكتب ليك في
أحلى القوافي وأرصنا
والقاني خانتني الحروف
والحاني ضاربة الصنصنة
والله غالبني الكلام
والقافية عدمت في "صنا"
(ض)
خلّينا راحة البال برانا
وجينا كايسين الضنا
في شان دواكِ ووصفتك
حبّينا نحنَ المرضنة
تلقانا نوصف في العلل
بي لاكناتنا وأيضنا
والزول بدل يصرف دواو
ماسك الروشتّة وحضّنا
(ط)
يا "عجوة" في "عسل" النحل
رويانة منّه "معطّنة"
هيبة ورزانة وطيبة بي
حبّة شقاوة وشيطنة
والريد كسر جوّانا عشـ
ـعش في قلوبنا استوطنا
خلّل خيالي اتخلّلو
وخلخل خلاياي سرطنا
(ظ)
ما أظنّه برجك بنطلع
بس ما بتفيد الظنظنة
ومحال مقامك ينلحق
لكن نجرّب حظّنا
ما سبنا حيلة نحاولا
وما سبنا خطّة مديظنة
ليك المقام والاحترام
والشان ولينا الطرظنة
(ع)
ووسّطنا بي كلّ الأسانيد
من رواية معنعنة
شان نحكي ليكِ ونشكي
ليك مما نعانيو من عنا
أرواحنا راحت في الدروب
هيمانة والشوك طعّنا
الدنيا من دونك ظلام
يقطع سنينا ويلعنا
(غ)
يا درّة في سفر الكرام
اسمك عن التعريف غنى
يا وازنة كلّ القايمة بي
عبد الله جعفر مرغنا
محفوظة من عين الحسود
الكال حسادتو وأضغنا
ليك السلام والفين سلام
لينا الجهاد والأفغنة
(ف)
البلقى في جرفك ضراع
سلّك بذورو ودفّنا
والبلقى في سيجتك ركن
قفّل كلابو وعفّنا
والبلقى فوق ارضك شبر
غسّل رويحتو وكفّنا
والبلقى لي روحك ورد
بسلك طريقو إلى الفنا
(ق)
ريدك متل ملح الوريد
داوى النفوس الحقّنا
نورك شلع بين الدروب
نوّر قلوبنا ويقّنا
علمك طلق بين العباد
فتّح عقولنا ولقّنا
يا الفي هواك راقدين رقادنا
وفي حماك واقفين قنا
(ك)
يا الله من لعنة كيويبد
ومن سهامو الشكّنا
اتخطّى أبراجنا الحصينة
وساق جيوشو ومكّنا
وفي أعمق أعماق القلوب
قرّش مواكبو وبركنا
يا الساكنة قلبي بدل رويحـ
ـتي أريتو قلبك مسكنا
(ل)
سقطت! وجيش الاحتلال
كوّن حكومتو وأعلنا
سلّمنا واستسلمنا بس
قاعدين نفرفر جعلنة
يا حليل حبايبنا الزمان
وحليل زمن لينة ولنا
يا حليلك آ جبل الحديد
الخلّو ليك الضبلنة
(م)
يا غالية في خمرة هواك
أنا قلبي فد كاس وادمنا
واسّسلو صفحة لمعجبينك
قام عليها وأدمنا
هيمن عليو حبّك غلب
دي أريتا نعم الهيمنة
مضمونة ليك ريدة العمر
يا ريتني ريدتك بضمنا
(ن)
نحكي الحكاية من أوّلا
ونعزف لحونا مرنّنة
إنسان صدف إنسانة شال
ليها المحبّة وأكننا
وقفل عليها تلات طِبل
شال المفاتيح فنّنا
لا أرخى للعذّال سمع
لا قيل وقالَ وعكننة
(هـ)
إن شا الله كلّ القلتو ليك
ورّى المحبّة وبرهنا
ولو بعرف أرهن روحي ليك
في شان رضاك كان برهنا
"دابت قلوبنا عليك حنان"
ما بين صبابة وولهنة
وقدّمنا ليك سلطة قلوب
معمولة بالحب، بالهنا
(و)
في كوني كم كانت نجوم
وانت السديم الكوّنا
بهواك يا نور الدجى
النوّر حياتي ولوّنا
بهواك يا بلسم جرو
حي الزال صعابي وهوّنا
ويا ستّي كضاب البقول
شاف قلبي في ريدك ونى
(ي)
يا حليلا شخصيتي الحديد
السال حنانك ليّنا
وحليلا هيبتنا الزمان
ادّوني هيبة اتْديّنا
ان كنت كان قلبك قفل
مفتاحو زولة معيّنة
فد كلمة نختم بيها يا
سيدي، الملخّص: حييينا