«عمر مصطفى أبو منّة/سياط العسكر»: الفرق بين المراجعتين

صبِي الحوبات و دُخرِينا
عليو امل البلد معقود
مرق يتفقّد احوالنا
صحينا، لقينا هو المفقود
ولد داخرِنّو للأيام
مَدسدَس لليالي السُّود
رقد
شاف الوجع راقد
وحيل ارض الجدود مهدود
مَرَق
في كتفو
شال حتفو
وليلو يضِج بِروق و رعود
مصير لا حي ولا ميت
بحر لا بر
ولا حدُّود
بِصُد،، بِــ يعود
حليل امك
تكوس ما خابرة وين جِيهتك
(بصُد بـِـ يعود)
تعال واحشاني تصبيحتَك
(بِصُد.. بِــ يعود)
هداك شوقَك محل فُتّو، علي الباب واقفة تلويحتَك
(بِصُد،، بِــ يعود)
رفاقتك ماتوا، راضية الموت
تعال بس انّشُم ريحتك
(بِصُد،، بِــ يعود)
متين ح يعود؟!!
أيااا مثبِّت فؤاد ام موسى
يا جامّ الحشا المهرود
براك شايِف ظُلُم نَمرود
براك شايِف سياط العسكر الطالت قفانا عُقود
واياديهو الملطّخة دم
متين.. تصحى المشانِق كم،
ويعود بلدي الرضي المريود
تنوم عين أُم
ويعود ال مِن زمن مفقود
يعود ال من زمن مفقود