«يوسف محي الدين/بابور الفزع»: الفرق بين المراجعتين

! عطبرة ! بابور الفزع .. قام بي حديدو ونارو أب نفسا سخن .. متل الجرارق الثارو الصنفور وقف .. خلى الخلوق يتجارو في السكة الحنين راجين هناك اخبارو

! الدامر ! عَصَر القضيب .. قالت فلنكتو ووب اطناشر ضهر .. فوق دامر المجدوب انجمّ و سَدَر .. شويم تجاهو جنوب في وداعة الكريم عارف القدر مكتوب

! الزيداب ! اتنهَّف شخَر .. ميَّل على الزيداب بُوريهو الحنين .. طراني عود زرياب دخانو العَكَل .. في الجو تكنّو سحاب ختّاف المسافة ان فات تشوفو رِهاب

! العالياب ! في العالياب وقف ممشوق وليهو مهابة اتمغّى وعطس .. دخانو جاب عطرابة شقّاق الوعر .. جَبَّال .. قَوَزَّن .. وغابة

.. فوق ضهرو بيشيل الكُحلهم دِنقابة

! المحميّة ! انقسم النهار .. والناس عطش مروية قام كاتل ملف .. عجلاتو دافعة الدِّية العوضاب عموم راجنو في المحمية نحرو امات سنام وياها دي المحرية

! أم علي ! لاح جبل أم علي .. فوق الرمُل متشتّح بابور الفزع .. طالق عجاجو يكتّح في ليل في نهار .. سواقو ديمة مفتِّح الخابر العطشجي والفوق قَمَرتو مسطِّح

! كبوشيّة !

.. قام ناظر كبوشية وقلبلو الشوكة

تاكينلو الكُباشة وحامية نار الدوكة تنكيهو انسرف .. جُلّة عجلتو دبوكة دخانو اتربط في راسو متل التوكة

! التراجمة ! دخل التراجمة .. تروسو سوّت كَرعة فاض بيهو الحنين نونايو شق التُّرعة سواقو الهميم من شوقو زاد السرعة مكتول بالشجن لاحق حسين بازرعة

! شندي ! قام ناوَر جِهِز .. صعّد مقابل شندي سواقو انسطل .. بي ريحة الباشندي إن ما الاعتصام .. راجيهو للجربندي كان عايز مبيت الخدُّو يوسف افندي

! جبل جاري ! عمال الدريسة راجنّو تب في جاري سواقو الشفت قام بيهو فاتح جاري ماقرّب يصل؟ .. شفقان اناغم جاري بي طعم النصُر الفاق سلا وقنجاري

! جبل الرويان ! فات حجر العسل شارف على الرويان بي حب الوطن .. وترابو قام مليان قفلولو الطريق .. العمدة جاو حفيان حاتم طي هناك .. انشاف عيان وبيان

! الجيلي !

.. استعدل نفخ نار غُبنو فوق  بَفَّاتو

قادل بالعديل .. الجيلي شاف مصفاتو السكة الحنين خابراهو عارفة صفاتو كم شال الهموم وحفظ الجميل للفاتو

! القبّة ! قشَّاش الطريق .. دخل العِصير القبة

.. حرية وسلام وعدالة جوفو معبّى

الفوق السطوح ثايرين و عاملين ربّة ناصرين الهناك .. جنب القيادة انصبّ

! الكدرو ! المنقة استوت والموز مخَدِّر شَدَرو خيراتن كتار بانن هناك في الكَدَرو فرسان الوعر الفي الغياهب سَدرو العزو البلد .. لا خانو تب لا غَدَرو

! بحري ! الشمش انتكت .. والناس صبُرهٌم قطَّ يا بحري السلام .. باقيلنا تاني محطّة ود النُّص* كتب .. لا ساب سطر لا فطّ في دفتر هواك .. يا عزة عارف الخُطّة

! سائق القطر ! يا السايق القطار سُقت القلوب في السِّكَّة خلِّيت القُلامة .. متل العيون تتبكّى يوم قطرك دخل .. جوة القيادة وركّ راجياهو الجموع .. فرحانة زي يوم مكّة