«يوسف محي الدين/قصاصات»: الفرق بين المراجعتين

المراجعة الحالية بتاريخ ٠٦:٠٠، ٢٨ مارس ٢٠٢١

قصاصات أشعار ثوريّة كتبها يوسف محيي الدين.

النصوص

2019-01-08، بمناسبة موكب أمدرمان الأوّل الموعود في اليوم التالي:

(١)

يا البقعة أم لهيب جاني طيفك طايف

سقطت خلاص وسقط الشعار الزايف

يوم دق النحاس باكر يشوف الشايف

قيدومة النصُر في أم در أمان الخايف

(٢)

أم در الأمان...... وأم در حقيبة فنّي

بي سيرتك زمان امّاتي بيك حجَّنّي

....يوم باكر بشوف الما بخيِّب ظنّي

الصقّار تحوم... ومهيرة فيكي تغنّي

(٣)

فخر أم در قديم مو داب سرور وكرومة

تشهدبو الطوابي ويشهدبو شارع الدومة

قيدومة الخلاص..... يا البقعة باكر يومها

يتهنّا الخليل ........وعدوك تغلبو النومة

(٤)

من ابروف بشوف جات العلايل.....يللا

من ود البصير..مكي..وسبيل خلف الله

باكر يا ام زمام........ ريقنا النشف يتبلّ

راكزين للدواس...... وكتين تفور الجُلّة

2019-01-10

(٥)

2019-01-15، بمناسبة موكب الكلاكلة

(٦)

الليلة ابكريق ........فوق الكلاكلة مكرِّج

البخمش عديل..... خَبَتيهو تب ما بصرِّج

حوِّد يا الخسيم في القيف اقيف متفرِّج

يا بلعك عديل..... يا جيت كمان متضرِّج