«عبد العظيم البنّا/من سبتمبر لي ديسمبر»: الفرق بين المراجعتين

مراجعة ٠٨:١٣، ٦ ديسمبر ٢٠٢٠

النص

خمسة سنين والناس منتفضة

مابي جراب أحلامهم يفضى

شارع نحو الشارع أفضى

ثورة، فورة، رفضاً، رفضا

تنمو وتسمو وتعلو وتكبر

خمسة سنين والدم السايل

ينزف ويعمل فينا عمايل

يشعل روح الثورة فتايل

تحرق ساق الشجرة المايل

من الفاشر غاية بربر

بعنا الروح خليها قروشنا

يبقى تراب شارعنا عروشنا

هل يقدر جلادك يحوشنا

ونحن الموت مرسوم في وشوشنا

قضرف غصباً عنك وعطبر

خمسة سنين والناس منتظرة

تكبر في الأرحام البذرة

تولد بعدَ مخاضٍ عسرا

تصرخ ضد الخوف والحسرة

ضد الظالم والاستكبر

خمسة سنين من ديك الهَبَّة

والسودان باللهفة مَعبّى

نهضة عدالة سلام ومحبة

وتار شهدانا الما بِتخَبَّى

جسراً للحرية ومعبر

خمسة سنين والليلة حصادنا

نمشي نصيد الموت الصادنا

يا الواقفين بي غادي قصادنا

واقفين ليكم بي مرصادنا

جامعة ، وسوق ، وكنسية ومنبر

كُلْما سوط الموت هَوَّبني

ولا ضمير الخوف أنَّبني

ناداني التاريخ يا إبني

لازم تهدم قبّال تبني

تمسح وسخ الزمن الأغبر