عبد الله جعفر/مسدار الخلاص
كتبه عبد الله جعفر لتوثيق أحداث ثورة ديسمبر والتعليق عليها، مع تعليقات على الوضع القائم أو السابق. كتب المربّعات بصورة منفصلة ونشرها تباعا على صفحته في فيسبوك، في الفترة من 21 ديسمبر 2018 وحتّى 19 ديسمبر 2019، مستخدما هاشتاق #مسدار_الخلاص، ثمّ قام بنشر الأبيات مجتمعة على صفحته في 22 ديسمبر 2019.
النص الكامل
يا عمر البشير الدنيا ما دايمالك
تنظيمك وقع من طوله ما بتمالك
والحولك نفض إيديو، مكنكش مالك؟
اتفكفك سريع لا تلاقي شر أعمالك
الشعب الكريم .. ذلّيتو الله يذلّك
باكر يا البشير مِتْل النميري نسِلّك
لا روسيا بتفيد لا سوريا ما بتحلّك
جايِنّك قريب أرجانا بس في محلّك
ما دار ننتقم .. مطلبنا إنّك ترحل
كلّفتا البلد ياخي ورحيلك هو الحل
أرحل ياخي فوت قبل الأمور تستفحل
الناس بالغبن بكرة بتهيج وبتسحل
الشعب الكريم ضاق الهوان واتذلّ
صابر بالسنين رافع الكفوف لي الله
يارب يا كريم من البشير نتحلّ
نرفع راسنا فوق بين البلاد نتعلّى
يا عمر البشير ارحل .. سنينك ولّت
أرحل يعني فوت .. قبل الأمور تتفلّت
الناس ياخي ضاقت والبلاد اتشلّت
أرحل بي كرامتك قبل ما تتشلّت
الناس من زمن راجين كلام الصادق
بس ما فاضي هو، ما بين حِنَن وجراتق
الصادق كَذَب .. والشعب هوّ الصادق
الشعب العظيم الما بتحوشو بنادق
أفشيتوا الظُلُم وامعنتوا في الإفساد
خايفين ننخَسِف منّ الفساد الساد
ومسئولكم يصرّح قال شغل موساد
يا قول الشباب والله ذِس إذ سو ساد!
قال ثورة جياع ثورة شبابا عاطل
وين العيب عشان نقعد نرد ونماطل؟
ما أحلى الشباب والله شجاع ما باطل
والجوع ماهو عيب، عيب الأكل بالباطل
الله ينتقم من كلّ كوز متدسّي
مأكل في النظام شارب كمان متكسّي
ناس "وين البديل، ورّوه لي من أسّي"
ما بنعدم بديل لي زول فانيلّة ميسّي
تحرق يا البشير ان شا الله ما تتبرّد
تتكتّف براك، تلقى الحوالك عرّد
يا الخلّيت قلوب الأمّهات تتهرّد
والناس يا تموت يا تغترب تتشرّد
الجوّة البلد رافع نخرتو اتبختر
حايم في البلاد للشحدة ما قاعد يفتر
عامل ليو مزاد كايس البيدفع أكتر
حسّة بتاع قطر أداه داير اتنعنتر
منعولة الجزيرة إذاعة الأخوان
ما جايبين خبر للموت ولا عنوان
ما فيهم رجا ديل للبشير أعوان
أعوان كلّهم في الإثم والعدوان
شكرا يا تميم الفيك خلاص اتعرفت
أموالك كتير للمجرمين اتصرفت
وجزيرتك دي في غش الشعوب احترفت
أصبر .. عن قريب تحصد يداك ما اقترفت
سيبوا الاختلاف .. الناس أخير تتوحّد
من أقصى اليمين للعندو دين للألحد
في وش البشير راس الفساد الـ للحد
الخلّى البلد فقرانة لامن تشحد
أفعالكم محن كل الشعوب بتدينا
كرّهتوا الخلق في مسجدا وفي دينا
نشّفتوا البلد من ثروتا وتعدينا
واسّة بتشحدوا وما فضّل البدّينا
من دار الهلال جمهورنا طالع هاتف
لي كلّ البلد ناقل الصور بالهاتف
المرّيخ وقف ساند الهلال متعاطف
في مشهد عظيم كلّ البلد متكاتف
العالم وقف ساكت علي البقمعنا
والقنوات دي إتواطت عدييل بالمعنى
نحن اسياد بلدنا ومافي زول بيمنعنا
نقلع حقّنا وسودانّا هو البجمعنا
بي حبّة وعود قالوا البشير اتكلّم
أرحل قلنا فوت ياخ اتّعظ واتعلّم
يا زي بن علي القال ليم فهمت وسلّم
يا مِتْل العقيد بعدين يمين تتبلّم
باكر يا شباب نتلاقى في اب جنزير
نطلع من قيودنا ونقطع الجنزير
كسر الخوف وجب ماف داعي للتنظير
زي حال ام حمد للتور شبك في الزير
لي كلّ الشعوب سودانّا فعلا قدوة
جاية الانتفاضة التالتة أقوى وأدوى
الزعما العرب خايفين تجيم العدوى
ياهمّ الزمان قاعدين في دار الندوة
الشعب العظيم حرّك حصانو وقال "كش"
ودّ الميرغني "فضّ المشاركة" فركش
وما زال البشير ما داير يفهم، كنكش
يا شيخ كش ملك يعني الملك راح يتكش
من بلد الحديد الشعلة قامت لافّة
طافت بالمدن بين الأقاليم كافّة
ونظام البشير أسّع وقف في الحافّة
في الخرطوم قريب راياتنا تصبح رافّة
دخِّلنا الحراسات أصلو ما تتردّد
نتوسّد يمينّا وفي الأرض نتمدّد
أحسن من نشوف سودانّا خيرو اتبدّد
ونشوف الظُلُم في كلّ يوم بتجدّد
يا ود يا نجيض حاشا الجُبُن ما شانك
لسّع في صباك .. إلّا العقل نيشانك
الضابط سأل، حاقرك، مقلّل شانك
اتظاهرتا ليه؟ قت ليو عشاني وشانك
السودان بخير والناس دي لسّع شهمة
رغم انف البشير رغم الظلام والدهمة
ما نخلّي البنات شان يضربوهن مهما
دقّونا الكجر .. أو لفّقولنا التهمة
الناس حالا ضاق والله جت مغبونة
من صف القروش راجيك صف طابونة
والله يا البشير كان هجنا جد تابونا
أرحل ياخ فوت، ياخ انتا كنتا ابونا؟
من حال البلد بتلاقي قلبك قابض
جيشنا الفي اليمن باعوه قاعد رابض
من قصص "التحلّل" للحرامي القابض
أخزيتونا ياخي، الدبلوماسي يقابض!
يا محجوب شريف ليك السلام في الجنّة
بي شعرك ربينا وقمنا واتعجّنا
في حبّ البلد .. مهما الظلام اتجنّى
أحرار للأبد ماف زول قدر دجّنّا
#تسقط_بس، وبس، الليلة دا الهاشتاق
نشروه الشباب بينم لأعلى نطاق
بي فيسبوك، تويتر، شا الله بالنتّاق
تسقط بس عشان حكمك دا ما بنطاق
حسّع في المطار ودّعنا نورنا الحارن
حالك يا بلد أفكارنا ذاتن حارن
طاشّين في البلاد من باردن لي حارن
وتلاقي البشير لسّع مكنكش حارن!
خرّبتوا البلد وتقولوا عبد الواحد
ود دارفور وود العاصمة دمّوم واحد
السودان أهل والشعب جد متآحد
والخارب البلد معروف هو أصلا واحد
"حيّ على الصلاة" أذّان بلدنا بنادي
أبناء الوطن لبّوه دونَ عناد
"أنا ولد البلد" صوت بدر يهتف نادي
ويجيب صوت أمل "بنت البلد" دي أنا دي
دوشكا وتاتشرات ضدّ الشباب الأعزل
آلاف الكجر .. ناس الجهاز الأرذل
والخوّاف أكيد ليم في الحوافز أجزل
برضك يا البشير عرشك خلاص اتزلزل
قاموسنا الحديث قال "الحكومة الساقطة"
تسقط من "سقوط"، في الامتحانات ساقطة
تسقط من "سقط"، دايرة القروش بالساقطة
#تسقط_بس، بقت مطلوقة أصلا ساقطة
يوم بكرة المِعاد صينيّة القندول
ما زال متّصل حبل النضال مجدول
الظلم استبدْ إلاّ الأيام بتدول
فاصل وانتهى وبكرة الستار مسدول
قلنآ ليكا فوت ردّيت بأغرب جُملة
كان داير القصاص يبقى القصاص بالجملة
قتلاك بالألوف .. لسّع صحايفك تملا
والتاريخ مدوّن كلّ واقعة وعملة
السفّاح ظهر تاني بيخاطب الشرطة
قال آية القصاص؛ أبدعتا ياخ نظّرتا
تصريحك بِدينك ياخ بقيت في ورطة
والبكا ما بفيد خلّيو كمان العرطة
ناس "الزول كويّس بس بطانته" اتطمّوا 😒
ما ناقصين وهم يا اخوانّا؛ ما من همّه
تصريحو الأخير للشرطة حسّة بذمُّه
كل الاتكتل شايل كِفِل من دمُّه
تصريحات تحيّر .. كلّ يوم تتخبّط
الما عندو دين في الفتوى قام اتلبّط
ناوي على الكَتِل، صرّح، وشرّو اتأبّط
ماضين في النضال بي عزم ما بتثبّط
استقلال شنو، ولسّة البلد محتلّة
بي دمّ الألوف أرض الوطن مبتلّة
ح ندلّي العلم لمّا البشير يتدلّى
ويعمّ السلام، عمّا قريب، يآ الله
نكّسنا العلم في قلوبنا حِد للماتوا
في وشّ الظلم، وارتاحوا من ظلماتو
كلّ واحد يضمّد لي أخوه كَلماتو
ويعبّر يبث أحزانه في كلماتو
عقدوا المؤتمر شايف مبارك وغازي
آآي غازي ذاااتو، الكان زمان إنقاذي
اتلمّوا الموائع بين سايل وغازي
يا ربّي الصبر يا روحي لا تتغازي
محتاجين طبيب نفساني شان نستوعب
كيف الكوز دا عايش بين عقد تتشعّب
مجنون عظمة × عُقَد اضطهاد، والأكعب
يسقط عقدو في الباقين عشان ما يتعب
اتلمّوا العُمد .. قالوا البشير اتزحَّ
كنكش ما بفك قال أصلو ما بتنحّى
الإمداد قطع تب والموارد شحّة
والمركب غرق، يا تضحّي يا تتضحّى
ما أحلى الشباب برجى الظروف الأنسب
يختار بي عقل ميدانه ويلعب ويكسب
ورّاك آآ البشير من أمره ما لم تحسَب
ما قُتْ ما بتخاف مالك قفلتا الواتساب 😏؟
ما تتنازعوا يا ناس وتذهب ريحكم
الفُرقة بتغُم والوحدة هي البفرِحكم
كل زول فينا حُر، ارتاحوا للبيريحكم
التخوين كعب، ما تقولوا: بس داير يحكم
حاول ياخ كمان في البيت تكون متظاهر
علّق ليك علم، أبيض، مرفرف، باهر
#تسقط_بس تكون مكتوبة بي خط ظاهر
حتّى وكت ننوم يفضل شعارنا مساهر!
كل زول ياخي حُر في منهجه وأربابو
الداير يمثّل روحو نحنا احبابو
والبختار ممثّل هوّ حر وأسبابو
والداير يمثّل غيرو برضو حبابو
مالنا أنحنا بيك إن كان طلعتا سقالة
وللا كسرتا سنّك .. أو فتحتا بقالة
ما تعمل ظريف، قصصك ملانة ثقالة
#تسقط_بس وما تبرانا قيلا وقالا
#تسقط_بس عشان نقرا الجرايد؛ طيّب:
نرتاح من سخافْة الهندي ياخ والطيّب
إعلام حُر، وهل يسوى الخبيث بالطيّب؟
نافخ كيرو بالنافح شذاه الطيّب
عانقنا الأمل .. وعيونّا في المستقبل
نحترم الجميع .. للإختلاف نتقبّل
نحنا حلمنا ما هوت دوق وأكل يا أهبل
غايتنا الوطن .. وأحلامنا أسمى وأنبل
تلفونك ضرب، شلتو، وفتحتو، وردّك:
قلتا: "معاي منو؟" ياخ إنتا واعي بجدّك؟
ماف واحد معاك، يا بشّة، كلّنا ضدّك؛
#تسقط_بس عشان لازم تقيف عند حدّك
وزير صحّة وبِدِير مستشفياتو المِلكو!
وزير الخارجيّة، سفيرة مرتو ف سِلكو!
كل مسئول عمل شركاتو دايرة ف فُلكو
أفسد من فساد كلّ الشعوب الهِلكو
قول ياخ شلتا بكري وجبتا معتز موسى
الزول البديل شايل عصاية موسى؟
تغيير الوجوه دي سياسة بلّها موصا
تغيير النظام معناو فروق ملموسة
جايبين لينا ركشة تقول "علاج مجّاني"
"باكر في مخيّم"، خير، خلاص أرجاني 😏
وين كان الدوا، ليه من زمان ما جاني؟ 🤷🏽♂️
ما دايرين علاج، دايرين نحاسب الجاني
كلماتك دهب وكلام عدوكا سِناجي
من كلّ القلوب ندّعى ليك ونناجي
تسلم يا بطل وتعود لأهلك ناجي
ما أحلى الشباب زاد الحراك وعمادو
أمثال فكي علي، وحسام قريش، وأمادو
طالعين وحدهم في وش كلاب اتمادوا
والموكب صمد .. غلب النظام إخمادو
ربّيتوا الكروش، رطّبتوا يا ضبّاط
وأدّيتوا الولاء لحكومة الربّاط
ما سامعين كلام ريّسكم الجلباط؟
حالتكم تحيّر .. تدعو للإحباط
يا "فرّق تَسُد"، ما عاد في زول بفرِقنا
وحّدنا العدو، عارفين منو البِسرقنا
في كلّ البلد، من غربنا لمشرِقنا
واطين الجمر من نارك البحرقنا
شاعرنا العظيم عبد العظيم البنّا
لي هم البلد قُبّال همومو اتبنّى
وأمثالو الشباب، منّ الطبيب للبنّا
نادونا: الوطن! لبّينا ما اتجابنّا
مفخرة البلد أسد البراري القرقر
رافع راسو فوق طول السنين ما دنقر
أركزوا يا شباب صنم النظام تب صقّر
من برّة، وخلاااص من جوّة عضمو اتقرقر
قالولنا الـ 'نُقَطْ' ناوين يمرقوا مسيرة
ناس ما بتتّعظ، عميانة، مافي بصيرة
أفكار العقيد في ليبيا، نفس السيرة
والعود الكبير أنا ما بجيب ليو سيرة 🙊
ألحق يا الجداد ديل ناس أنونيماس تاني
ناوين يضربوكم كلّ يوم والتاني
يا زوول ناس شفوت قال ليك شغل شيطاني
لمّا تقول كفاي، الروب، خلاص أختاني
شوف دكتور سيوري وشوف معاه رفاقو
واضح مبدا حُر أيقظ ضميرو أفاقو
من حبسة مضوّي وهمّو بيو واشفاقو
لي وقفة أمس ما شفنا منّو نفاقو
بكرة على المحاكمة لفّقولنا قضيّة
يا حليل القضاء يا حليلو دم عوضيّة
ما همّانا ماشّين بي نفوسنا رضيّة
#تسقط_بس شعارنا، والقضيّة قضيّة!
والساند النظام دايما ضميرو معذّب
مهزوز في كلامو وجوّة قلبو مذبذب
شاف الحق عديل لكن أباهو وكذّب
واختار دنيتو ومصلحتو سكّ القنزب
موكبنا العظيم الليلة سار في قضارف
وبكرة السيل على ام درمان مدفّق جارف
حكمك يا البشير واصل نهايتو مُشارف
عارف يا 'نُقَط'، وللا بتكون ما عارف؟!
أرقص يا البشير باكر وتم العرضة
واتنتّر كدي، كِضْبك بِقالك مرضة
حكمك ما خلااص نخرت عضامو الأرضة
بنشيلك قريب، عاد كان أبيت كان ترضى
يا عمر البشير عينك هدااك لمعمّر
القال كتّلوا الجرذان وقام اتأمّر
عينك ليو ركب خازوقو فوقو اتسمّر
أحسن ليك تفوت بالحسنة ما تتنمّر
إركب يا بُنَيْ مَعَنا الفُلُك .. لا تخاصم
الطوفان طغى وجبل البشير لا عاصم
إن ساد الفساد أمر الله قاضي وقاصم
والحق اتّضح .. ما فيه أيّ طلاسم
الواحد زمان ما كان غليظا أو فظ
علّمتونا قدّام البنات نتلفّظ
فاضل بس نسب الدين وما نتحفّظ
ياروحي الصبر يا ربّي سلّم واحفظ 😤
في وادي الحمار خطب البشير الأرعن
وعلي عثمان كمان الليلة قام اتفرعن
تحتار في البقول بس طاعتو واجب شرعاً!
راعيهم كمان .. سيب البهايم يرعن 💁🏽♂️!
يا ناس الإمام القال بِدور اتبخّر
يا ناس سيدي داك اللسّة نايم شخّر
يا الشعبي الكتير زي حال أخوك تتمسخر
الموكب مضى وما برجى زول يتأخّر
الذالينّو بالدوليّة قام اتنتّر
الفار انتا دا وما تسوّي روحك عنتر
والذلّوهو بي ضربة مبارك هستر
أعصابك! دحين يا شيخنا ما تتوتّر
ما بنشيل سلاح، شايلين ورود وسنابل
والكوز المريض بسمع هتافنا قنابل
"حرّيّة" و"سلام"، نهتف، "عدالة"، مقابل
الرافع السلاح، رصّاصه يمطر وابل
يتراقص براو، والحولو وقف اتفرّج
ناس ما بتستحي، والله ما بتتحرّج
أرقص يا البشير عرشك خلاص اترجرج
اتهدّ النظام، روحو ابتدت تتخرّج
التشخيص بسيط، لكن معقّد، هاهو:
الكوز بتوهم .. إنّو الخلق كارهاهو
بيقوم يكرهم .. لاوعيو بِعمي نُهاه
بعدين بقهرم .. وضميرو ما بنهاه
#تسقط_بس عشان ما نستعيد المسجد
دار للمجتمع .. من الصغيّر للجد
مهموم بالقضايا ولي حلولا بينجد
ويقود الشباب ويحرّكم وقت الجد
في درب الحفر سايقنا عمّك تنقو
فصلونا الـ 'نُقَط'، لا عاشوا ديل يا منقو
خلّوا الكل حزين والعبرة دايرة تخنقو
الباع الجنوب مجرم ويلزم شنقو
#تسقط_بس كمان يا مدعو عبد الحي
الـ "قلّة القليلة" .. ديل رجال الحي
يا بايع ضميرك، لو ضميرك حي
قال "ما للسيّاسة"، وغزّة؟ رابعة؟ احّي 😤
أنزل يا حبيب سيب الـ في إيدك بالفي
جيب صاحبك معاك، دايرينّو موكب ألفي
نتنسّم بخور بمبان وناخد سيلفي
في وشّ الكجر، والجكس يهتف خلفي
فيران البشير لو دايرة جد تنتحري
بس واحدة الضهر طالعينا بكرة ف بحري
يا سرّ الهوى ورّينا فيك المحري
عربات الكجر إن شا الله جت تندحري
زغردي يا أمل، يا بدر أرفع راسك
"أنا ولد البلد" مكتوبة في كرّاسك
طابور الوطن ناداك ضرب أجراسك
حبّك للبلد والوعي هم حرّاسك
ما اتخلّف نَفَر شاف ليو عُذر واتذرّع
البقدر يمش لحق المواكب سرّع
والحال دونو حايل بي دماه اتبرّع
والبرّة البلد شارك برايو وشرّع
الطاهر ظهر .. الليلة بيّن أمرو
كوز من يومو كان؛ زول البشير طول عُمرو
عايش في رعايتو وبئتمر بي أمرو
ما فاهم هتافنا، حليلو، ضاع نص عمرو!
موكب بحري جاب أفكار جديدة وشرطة
بي قوقل كمان القصّة جابت خرطة!
ورّونا المسار، وين البيوت، والشرطة
وان شا الله البلان لا فيه شق لا شرطة
الفاتح دا بس غالبني أكتب عنّو
ويهدّد كمان قال قال أقيفوا استنّوا
زول ما عندو قيمة وفجأة يطلع أنّو
راس البرلمان، بالتالي فكّت منّو!
زغردوا يا بنات، خلّوا الولاد تتجسّر
أهتف يا ولد، خلّي البنات تتكسّر
أمرقوا كلّكم .. حتّى القعد بتحسّر
اتبرّع بدمّو ومالو .. بالبتيسّر
أثبت يا جنا أُكل الضرب واتحمّل
أركِز للبطان لا أح ولا تتململ
فوضى وبلطجة وحال البلد بتهمّل
#تسقط_بس عشان سودانّا يصبح أجمل
الطاهر جا قال "كاميرات حديثة خطيرة" 🤔
قَوقِل "ريكو ثيتا" .. القصّة ماها خطيرة 🤷🏽♂️
ما تقعد تحنّك بي حكاية فطيرة 😏
سوّوك ضحكة عاد شوف ليك محلّة تْطيرا!
#تسقط_بس عشان ذاتو البنات تتحرّر
من ظلم الرجال الكلّ يوم بتكرّر
قانون النظام الأصلو ما بتبرّر؛
يتساوى الجميع، ما فينا زول يتضرّر
يا الطاهر حسن .. وَتَتَي و ووب والليلة
قالوا توينتي فور تي ڤي سقوطا الليلة
دي الداعمة النظام وتبث نهارا وليلا
#تسقط_بس خلاص، بَبَّح، ولا يا حليلا
الطاهر حسن بوق النظام واللايكو (like him)
الشغّال يطاعن فينا طالق مايكو
أنلايكلو ياخ (unlike)، خلّيو جدادو يلايكو
لايكات الشمار سيبوها في جو سايكو
ما تعمل حريف في الصفحة تقفل تفتح
أقفلا وافتحا .. لامن صباعك ينتح
مارقين كلّنا .. ما تلقى ليك التكتح
#تسقط_بس خلاص، أسّع بدت تتّرتح
"وصّف لي" مكان موكب عشان أمشيهو
منبرشاتـ"ـنا جيبن أمنجي بوشّيهو
يا "الدعم السريع" جيبي الخبر تِشّيه
#تسقط_بس شعار في كل قروب نفشيه
لا تستنّوا زول .. لا تقولوا لي زول أقنع!
البرجع براو ما تقولوا لي بتتصنّع
الدايرنا مرحب مافي حاجة بتمنع
والمابينا بختار النهاية الأشنع
في عدّة مدن، البارحة سار الموكب
سقطت يا البشير القصّة ماشّة تكركب
ما زال الـ 'نقط' ما داير يفك، متعشكب
عامل فيها ثابت إلا تب متكبكب
اليوم الحداد، كتلوا الولاد في برّي
الصف اتفرز، والكوز صبح متعرّي
الما اتبرّا منّوم لسّة حسّة بورّي
ما يشيل فاتحة فيني ومنّو تب متبرّي
يا الشرطي البتنفي .. إنت دورك تثبت!
مين كتل الضحايا ومين بيضرب في البت
مين لوحاتو مافي، مغتّي وشّو، وبِلبت
واجبك تحمي شعبك، ما النظام، ما تلخبت
يا موالي النظام ما تبقى زول متردّد
الحق أصلو واحد والضلال متعدّد
لي راحة ضميرك قول معايا وردّد:
"#تسقط_بس"، وننهي الباطل المتمدّد
أولادك هديل، كل دفعة تتلو بيانا
بالأسماء عديل، ماضين عيانا بيانا
كل الناس دي حرّة ف دعمها وأبيانا
شان الحق يبين، تلقى الحقيقة بيانا
محتاجين Wiki، نكتب عليهُ نْدوّن
ننقل فيو حقايق لا ندس لا نهوّن
باللنكات ومن غير راي ونبدا نخوّن
وعي الثورة لازم نبدا فيهو نكوّن
يا زين الشباب يا تاجنا يا سامحنا
عينك في فدانا، وعينّا ليك؟ سامحنا
قولك يا ابني خالد بصمة في ملامحنا
"الناس فقدوا روحهم، فقد عين ما محنة!"
غالبني الكلام من شفتا صورة مصري
يا رمز الصمود زينة شباب العصرِ
من غير كف هداك رافع علامة النصرِ
مين غيرك يقود موكبنا نحو القصرِ؟
محجوب اتحجز يوم في الجهاز واتكركر
استشهد من التعذيب 😣، وكلّهم أنكر
ملعونين وما بِتْناهو قط "عن منكرٍ
فعلوه" .. ما بين أمنجيّة وعسكر
حتّى مواكب التشييع بقت مقموعة!!
آآآه .. صُوَر الدَهِس بكّت رجال بدموعا
لعنات الله والناس والمَلَك مجموعة
تغشاكم؛ ودعوة مَن ظُلِم مسموعة
زول باع ذمّتو .. ليه بي وراه تصلّي
الخطبة بتجيو من زول عليه بملّي
فتّش ليك إماماً بالصدق متحلّي
بِيمُرقَ النصيحة وللحقيقة بجلّي
مرحب بالإمام مرحب بكل أنصارو
والسيّد كمان لو داير يجيب أنصارو
مكسب للحراك، لا شك بزيد إعصارو
مخسر للنظام، لا شك بزيد في حصارو
سامح جاب مهر لي جيجي أغلى قلادة
لا كردان دهب لا كوم جواهر لا دا
قدّم ليها جنّة تربّي فيها ولادا
لمّن كان بيفدي بي عيونو بلادا
دي إرادة السما، جابت بلاكاً آوت
في دعم الحراك يُحسَب وِذ آوت أ داوت
أطلع يا شباب قول علّي صوتك شاوت
#تسقط_بس خلاص، الوطني يطلع آوت
في طب الجزيرة بقى الكلام آلاف
والأرقام تزيد، ما زال بيانم لاف
دي ولادة الهنا وتاج راسنا ما في خلاف
"مندسّين" منو المتدسّي يا أجلاف؟!
الصادق مرق، دوّر إيفيكت الدومينو
جرّ وراو نهار، الجايي يا رب دا منو؟
والفكّة الصغار والشبعوا ديك والسَمِنوا
#تسقط_بس بدت يلقوها مِمّن أمِنوا
يا عمر البشير أرحل خلاص خارجنا
("أرحل" بالفصيح، "خارجنا" بي دارجنا)
حايم ياخي تشحد في البلاد خارجنا
ما خلّيْت بلد،، دايما عليك حارجنا
مارك ود زوكريبيرغ عزّيتنا بي فيسبوكّك
اتواصلنا بيو واثقين بدون نتشكّك
انهار النظام قرّب خلاص يتفكّك
القصّة انتهت، إلّا البشير بتلكّك
ويا مارك زوكريبيرغ شكرا علي واتسابك
البي المجتمع بتلمّ فيو وِاْتْسابك
ألحق عمّنا ويا جدُّو سويّ حسابك
إلّا ملان جداد لو ما عملتا حسابك
ما تقعد تشيّر ساي بدون ما تفلتر
الزور والكذب والباطل المتستّر
إن حابّي الشمار ماف عوجة بس ما تكتّر
أخبار الجداد دايرالا زول مستهتر
الأخوان أبَوك قلتا النشوف الجارة
رايح من قطر توش لي مصر تتجارى!
يازول إنتا جنّيت وللا لافّي سجارة؟
الليلة الجزيرة بتردمك حُجّارة 💁🏽♂️
"تعبنا ولا احد في المعركة بيستلقى"
قال عبد العظيم تلك العبارة الطلقة
بعد الاعتقال عاد شان يلاقي الطلقة
ولراحة الخلود الروح سمت منطلقة
قال لينا التجمّع في بيانات صادرة:
شارع الأربعين، حيث المواكب الهادرة،
اتسمّى "الشهيد عبد العظيم"، في بادرة
لي تخليد عظيم قدّم بطولات نادرة
يوحي بعضهم لي بعض قول اتزخرف
آ دكتور فلان آ باشمهندس آ بروف
يصرفوا لي بعض ألقاب كبار، والأظرف
إنّوم صدّقوا وتلقى الوهم بتشرّف
ما تعمل حريف تطلق سراح نص دستة
شان تعمل دعايات وللا تعمل تستة
مبروك للمرق، شرّفتنا وآنست
(١٢٢)
أساتذة جامعة الخرطوم رفعتم راسنا
وقفة، مبادرة، وسامعين تدق أجراسنا
الحصّة الوطن، والدرس في كرّاسنا
#تسقط_بس تعود دور العلم نبراسنا
#تسقط_بس بقت للكل شعار معروف
#تسقط_بس بقت هي الأمر بالمعروف
#تسقط_بس بقت تتقال في كلّ ظروف
#تسقط_بس بقت شورتكت تلاتة حروف!
يا بت الضرير آمنت بيك إيمان
يا دكتورة يا والدتنا يا إيمان
واضح مبدئك ما بتخلطي الكيمان
تسلمي للبلد ويسلم أخوك كمان
#تسقط_بس بقت بين الجميع تتناقش
#تسقط_بس بقت نص الكلام تتطاقش
#تسقط_بس بقت زينة تياب تتراقش
#تسقط_بس بقت تثمر أزاهر، ما قش
البنبان وقع في أماني بوّظ عينا
من بعد الظلم والقهر طلّع عينا
ما ياهو الظلم والقهر دي البي عينا
خلّتنا بنقول للسلطة طظ في عينا
(١٢٨)
لو بِـ ـيْدك تقص عمر النظام لا تبخل
الحولك كمان وصيه شان يتدخّل
قدر المستطاع رازوهو كان اتخلخل
بالعدم أدِّي زول كمامة مبلولة بخل
(١٢٩)
يا ساكت كفاك قول النصيحة اتشجّع
بتحنّك منو؟ عامل حزين، تسترجع
المجرم هداك كل يوم يصرّح جعجع
واتذكّر معاك إنّه البموت ما برجع
(١٣٠)
ستاذ احمد كِتل وانكسرت الطبشيرة
واتهان، ااااه، اتهانت وراه عشيرة
الله ينعل الإنقاذ ويجازي بشيرا
وينعل كل عساكرا من عريف لمشيرا
(١٣١)
ديل ألفين طبيب وألفين مهندس وقّع
والأعداد تزيد، قالوا النظام يفرنقع
احتار البشير في أمرو دنقر صنقع
مندسّين، هناي، ياخ أصلو ما متوقّع!
(١٣٢)
النصر العظيم يوم ٧ من فبراير
الموكب هدر في العربي دفّق ساير
ديل "من كل فج جوك" الشباب الثاير
#تسقط_بس دي عاد كان دُرتا كان ما داير
(١٣٣)
والديّامة زي نار القيامة القايدة
مارقين بالميات واللمّة لسّع زايدة
الديم من زمان في الثورة أصلا رايدة
واليوم تنتظم في الدوري رجعت عايدة
(١٣٤)
ثائرنا الضكر في البوكس رافع علمو
قدّام الكجر الغتّى وشّو بْبلمو
راكز للضرب ما اتهزّ حامل ألمو
زي دا البضربوه؟ حقّك تدق الظلموا!
(١٣٥)
احمد لسّة حي من جوّة قبرو بقاوم
ناظم لسّة حُر من جوّة سجنو بداوم
سامح لسّة فاتح عينو ما متناوم
#تسقط_بس شعارنا وأصلو ما بنساوم
(١٣٦)
بكرة أماني بي عينا بتشوف أخواتا
واخوانا الرجال بكرة بتبين نخواتا
عاد راس الكجر بكرة بنخَوتو خواتة
#تسقط_بس بدت تتهدّ من رخواتا
(١٣٧)
أركِز يالكجر جاييك في الدفّار
بي عكازي بس ما معاي تلاتة أنفار
لملم لي رجالك واعمل استنفار
ما شُفنالنا أسداً خافلو من كم فار
(١٣٨)
مُش "عيب" يا أنس؟ أحرجتا عبد الخالق
البلمسلو بت ساي مرتو عندنا طالق
خلّيو تقبضن فيهن عساكرك طالق
تتلبّت كمان قاشر مِكَفكِف حالق
(١٣٩)
الله يخيّبك؛ راجل كبير وتكضّب؟!
يا رب خوّفك واحد وراكا مهنضِب؟
يا ربّي اشتروك؟ بي كم تكون متوضّب؟
وللا تكون شريك بي كلّ دم متخضّب؟
(١٤٠)
#تسقط_بس دي ما سابت وراها حَصانة
لا رحمت بروف كانت مكانتو مُصانة
لا خلّت أديبة ملت كلاما رصانة
يا تُنْضم عديل يا تتردم خرصانة
(١٤١)
ما بقولولو "أخ"، مجرم بكتّل جامح
ليش شان المُشير نخسر شبابنا الطامح
وعيون البشير ما أغلى من عين سامح
دم أولادنا غالي وفوقو ما بنسامح
(١٤٢)
قوش رسّل جداد قال ليهو أمشي اتجسّس
حوم بين الشباب جيب الشمار اتحسّس
الديك اقتنع بالثورة لمّا اتحسّس
أمّن سألو قوش قال ليهو تسقط بسْسَس!
(١٤٣)
بمبان الكجر شغّال يخبّت دل دل
اتخيّل تقوم الناس تَجِر تتبهدل
عرفولو العيال غمتوهُ ليك بالجردل
والبلحق بِفوح بنشمُو مِتل الصندل!
(١٤٤)
"#قم" يا شيخنا لا تكون لي ضميرك بايع
"#يخس" عليك يا بروف ها الكلام المايع
دا القالو(ه) الشباب القالوا صايع ضايع
ديل أمل البلد، عكس الزمان كان شايع
(١٤٥)
وين القال بِجِز؟ قايلينّو شايل المنجل 😏
الأسبوع عمل شهرين دحين استعجل
ما شايف المواكب والهتاف الجلجل
مزنوق قالوا لي بتكون شربتا الحرجل
(١٤٦)
يطبع في القروش قال ليكا رب رب رب رب
الدولار فتح من التمانين قرّب
الاسعار غلت والاقتصاد اتخرّب
احتار الوهم وين الغلط واستغرب 😕؟!
(١٤٧)
بكرة مڤلتنين في الموكب، أمرق قاشر
والبسي أحلى شي لكاميرا الجزيرة مباشر
في حبّ البلد راح ندّي غيرنا لكاشر
حب يملانا جت من بورتسودان للفاشر
(١٤٨)
السوّاق دا عيب يركب وراه مبارك
إلا بلدنا ساقا الما عرف مقدارك!
الولد الشجاع لي أهلو عزّ وشارك
آ الأم حصّنيو ولدك عليكي مبارك
(١٤٩)
تحتار في الـ بِثير حول التجمّع شبهة
ويسيب البشير ويخلّي ناس الجبهة
قايل الناس حمير بتفتّش البركبها؟
وللا الود خطير والناس دي ما منتبهة؟
🤷🏽♂️🤷🏻♀️🤷🏽♂️
(١٥٠)
البِلدى المحن لابد يلولي عيالو
والبارى الجداد ودّا الكُوَش لا يالو
والبسعى الكجر يوم بِفجخو(ه) أفيالو
واللمّة التلاتة بشوف نهايتو حيالو
(١٥١)
موفور التهاني الحلوة والتبريكة
موكبنا العظيم شفناه في أمريكا
شان يدّي السنت والكونغرس تحريكة
حتّى ترامب كمان، والله ما يُدريكا؟
(١٥٢)
باكر يا رفاق بتجينا أحلى تهاني
أوّاب يبقى حُر، ونهنّي بيهو تهاني
والوطن الكبير سودانّا يصبح هاني
أصمدوا يا شباب، فيكم عقدتا رهاني
(١٥٣)
إم تي إن وزين، وقفات تسر الناظر
قولوا لمصطفى، عبد الحفيظ، الحاظر
الفيسبوك دا والواتساب، بأمر الناظر
#تسقط_بس وناظرك نحنا ما بنهاظر
(١٥٤ جرية الكجرابي)
الليلة الكجر خوّاف لقيتو تراهو
البوكس اتشبك، للخلف قام جرّاهُ
خشّ الخور وِحِل، ورّط رقبتو براهُ
فتح الباب جرا، وساب بنطلونو وراه 🙀
(١٥٥)
الكجر الجبان جاب لي رفاقو السمعة
سكّوهو العيال، جابولو وجع الإمعا
إتلقي بكرة معذور من صلاة الجمعة
والمكنة بترترت طافية ليك كم شمعة
(١٥٦)
الزول الرخيس المشترينّو شراية
لا ليو في فنون العسكريّة دراية
لا بعرف يسوق، لا بحمل الحرّاية
إلا كراع تعجبك، في الدواس جرّاية
(١٥٧)
ما لحق البشير سوّى الطواري وأعَلن
الأحفاد غِلن فيها البنات وانفعَلن
اتحدّن قوانين الطواري ونَعَلن
لا خافن كجر لا عبّرن لا سَعَلن
(١٥٨)
تاريخ البلد حسّع بيُكتب ذاخر
آما شُفنا أبطال ياما شُفنا مساخر
أهو دا البستقيل وأولادو بيهو تفاخر
أهو داك الثقيل البِرفدو(ه) في الآخر 💁🏽♂️
(١٥٩)
في الدولي الحدانا الأم بكت مفجوعة
أطفال تتدهس؟! كل البلد موجوعة
التغيير وجب كلمتنا ما مرجوعة
#تسقط_بس قبُل ما الناس تموت بي جوعا
(١٦٠)
احفظ يا جنا الهاشتاق وريّح بالي
#قم بتقولا لي شيخ للحصل ما بْبَالي
#يخس تقولا لبروف اشتغل طبّالي
#طز دي تقولا لرموز النظام البالي
(١٦١)
أهل الفن شتول الوعي بِجنوا حصيدا
كل حاجة بتمُر مروة بتصيغا قصيدة
كل فكرة رسم تجريدي بشرى بصيدا
أثريتوا الحراك والثورة زدتوا رصيدا
(١٦٢)
والإبداع كمان في يد بُثينة أسامة
دي بتكتب قصص فنّانة جد رسّامة
بتزيد الوعي تخلّي العقول تتسامى
لي دعم الحراك والثورة شاهرة حساما
(١٦٣)
كلّنا مسلمين ما دام نقول سلميّة
والإسلامويين ديل كَسِر في الميّة
دايرين دولة تحكم بي أسس علميّة
حرّيّة وسلام وعدالة مش ظلميّة
(١٦٤)
قانون الطواري الليلة يا همبات
إلّا تموصو موية وتشربو(ه) شربات
الموكب طلع من بُرّي لي شمبات
لي كل البلد دفّق ملا الجنبات
(١٦٥)
يا عمر البشير أمرق عديل بي دربك
آ زول البلد حسّع بدت تتدربك
أمرق بي سلام ريّحنا ياخ من حربك
اتخارج سريع قبل الأمور تتشربك
(١٦٦)
الكنداكة ثايرة وهاتفة رافعة الفنقر
رافعاو في جسارة وبي تحدّي وأنقر
في وش ظالم اتحكّر في دارنا وصنقر
وُفْ وش كلّ راجل وطّا راسو ودنقر 🤷🏽♀️
(١٦٧)
ما تشيّر كلام تكتب تحت "منقول"
اتبيّن مصادرو وقول منو البيقول
واتحرّى الخبر واتخيّر المعقول
شان نختا الجداد أو ناس "بلادي حقول"
(١٦٨)
الدول الكبار بتسوّوا، أوو ماي قوش 🤦🏽♂️
دايرين البشير يمشي ويخلّفوا قوش 💁🏽♂️
سبنا البسكويت شان ناكل القرقوش؟ 🤷🏽♂️
#تسقط_بس جميع أشكال حكم قرقوش! 🙅🏽♂️
(١٦٩)
لا خانت بلد، لا سمسرت، لا سرقت
لا شالت سلاح، لا خرّبت، لا حرقت
فد أصبع طبظ عين الطواري، اتخرقت
اتفشّت قلوب مغبونة ياما اتحرقت
(١٧٠)
ما شافوا الدفاع الشعبي روسنا اتحلقت؟
أو شافوا القهر كيف العيال اتعلقت؟
أو شافوا الفساد الفيو بلادنا انزلقت؟
بس شافوا الصباع؟! وخلاص أضانّا اتفلقت 🤦🏽♂️!
(١٧١)
حُرّية وسلام وعدالة يعني اجتنبوا
إنّو تحاسبوا زول بالحولو أو بالجنبو
المجرم خلاص، ذنبو بيكون على جنبو
إلا حرام كمان ناخد ولادو بذنبو
(١٧٢)
طاف موكبنا سار بين البلاد متسلسل
من أمريكا للطرف الأغر لبروكسل
الجوّة البلد قاد النضال مستبسل
السافر بعيد كان لينا خيرَ ممثّل
(١٧٣)
محمود معتصم زينة شباب اتربّوا
بي حبّ الوطن شربوهُ ممّا شبّوا
بالحق واليقين مالين قلوبم عبّوا
محمود بين رفاقو،، معتصم بي ربّو
(١٧٤)
الشعب اتّفق قال بكرة لازم نضرب
شان ما نستعد للقاضية بعدو ونضرب
منّ السيرة ساي تلقى النظام بيهضرب
صوموا عن العمل من الصباح للمغرب!
(١٧٥)
على وجه الخصوص عاجباني صفحة سيّد
ما النوع البتلقاو للشمار متصيّد
بل لازم حدود الوعي بيو متقيّد
يختار الخبر ومعاهُ تعليق جيّد
(١٧٦)
شوف بت البلد زينة البياض في توبا
توب توتل جديد ما تياباً اتغتّوبا
حصّناها بي يس وهود والتوبة
#تسقط_بس عشان أنا قلبي قال: التوبة
😍😵😭
(١٧٧)
قالوا كمان نغيّر صورة البروفايل
وادّونا الصور نزّل معاك الفايل
"أنا مضرب" ورافع صورة فوق مينوايل
ياخي شغل مرتّب راقي لكن، هايل
(١٧٨)
زينة وهيبة يا بتّي التياب البيضا
تتحدّي الطواري احتاروا في قبّيضا
فكرة جميلة حيّرني البطلّعا بيضة
قون جبناهُ في مرمى النظام بالبيضة
(١٧٩)
نتذكّر معانا حمادة عبّاسيّة 💁🏽♂️
شارك في الحراك بي كلمتو الماسيّة
قوْلْة "احيّا" بس منطوقة بحساسيّة 🙊
لي فرعون فَصَل بي صورة فيها أسيّة
(١٨٠)
موكبنا الكبير أوّل خميس في مارس
نتحدّى الطواري ولي حقوقنا نمارس
شمبات بُرّي جبرة ام بدّة لينا مدارس
الحصّة الوطن واستاذنا فارسة وفارس
(١٨١)
أرتال الكجر للبنطلون جات كايسة
فرحانين شديد، "إجتحنا برّي درايسة"
والأهبل بصوّر والأبنصات دايسة
الله يخيّبم، بئس الرجولة البايسة
(١٨٢)
#لو_سقطت_سريع حمّى النظام بتّاور
الكوز الخسيس بلتفّ تاني ويناور
كانت أغرت جميع النفسو فيها تساور
#تسقط_بس جميعا أصلو ما بنحاور
(١٨٣)
#لو_سقطت_سريع ما اتلمّوا بشرى ومروة
واسّسوا لينا من أجمل فنونم ثروة
فن تجريدي في إبداع يفوق الذروة
ممزوج بالقصايد واحنا ننهل نروى
(١٨٤)
#قم يوم بكرة ماف، يوم بكرة أقعد قنّب
عصيان مدني بكرة، يعني تكِّل جنّب
ما تخذلنا تمشي وليك ضميرك يأنّب
وأيّ دفع قروش خلّيكَ ليو متجنّب
(١٨٥)
#قم يوم بكرة ماف، بكرة القعاد في البيت
وأيّ دفع قروش قول ليهو مافي أبيت
أقعد دوبي ساكت أرمي ليك كم بيت
لا بنبان كجر، لا دق، ولا خبّيت!
(١٨٦)
العصيان نجح .. هنّينا بيو باركنا
من شدّة نجاحو الليلة مارك شاركنا 💁🏽♂️
الفيسبوك تقيل واقف أخد ليو ركنة 🤷🏽♂️
و"الموكب غدا"، من أسّة دي اتحرّكنا
(١٨٧)
اتلوّمتا عاد آ مارك حميتنا ندوب
اتصلّحنا لي "#طز في الرموز" يا دوب
دار نرسم كمان زي بشرى جبنا أدوب (Adobe)
بعد ايلا وكفاءاتو الخبوب وكدوب
(١٨٨)
ما تشيّر كلام مضروب بدون ما تفكّر
الواتساب كمين فيهُ الجداد بيعسكر
الفيسبوك كمان مليان جداد متنكّر
#خدبالك شعار شان تبقى بيو متذكّر
(١٨٩)
بو تفليقة قال بطّل خلاص اترشّح
إلّا بفوت متين 🤔 أنا قايلو داير يتشرشح
"مبروك" تنتظر لمّا التفاصيل ترشح
#تسقط_بس دي معناها النظام اتكشّح
(١٩٠)
الكوز الـ ’نُقَط' قال الحشود انحسرت
ورّوهو الصُوَر، بالله عينو انكسرت
ختّ رهانو في الباطل إرادتو اتأسرت
والرَاهَن غلط ندمان ونفسو اتحسرت
(١٩١)
بتّنا في القوام بتقول فريع البان
إلّا وكت تثور بترجّع البنبان
لا بت لا ولد ما بتلقى فينا جبان
#تسقط_بس حكومة الباطل الجربان
(١٩٢)
في برُي اتعمل أكبر علم واتشال
ديل حب البلد لابسينّو عمّة وشال
صوتم بالهتاف في القبلي عبّا وشال
#تسقط_بس حكومة السارق النشّال
(١٩٣)
ديل أبروف وود نوباوي حسّة اتلاقوا
بالشجرة وببيت المال علي إطلاقو
الشعب العظيم اتجلّى بي أخلاقو
#تسقط_بس حكومة الكوز ويلم عولاقو
(١٩٤)
منعول البشير من جانا واتّلحنا
كنّا ولاد صغار وحلاتي ما أفلحنا
ودّر لي شبابنا ملانا شيب جلّحنا
ودّر خير بلدنا السمحة جت شلّحنا
(١٩٥)
يا الطاهر حسن يا التوم هديل أحبابك
الثوّار خلاص وصلوكا لي عِن بابك
اتكلّم تعال ورّينا قول أسبابك
واتفضّل كمان لكشِرنا برضو حبابك
(١٩٦)
ناظم لينا ناظم في التفاني عقود
ناظم يا حسن يا خيرة العنقود
ناظم يا بشير للخير دوام بتقود
ناظم يا سراج بحرق حياتو وقود
(١٩٧)
العلم اترفع .. لكن بمعنى جديد
معنى الانضمام للثورة والتنديد
بحكومة البشير المجرم الرعديد
"#تسقط_بس" مؤكّد، عن قريب، indeed
(١٩٨)
القبضوكا ديل حقِّق معام يا محمّد
مين شاف الفساد قدامو لكن غمّد؟
مين شاف الظلم لكن ضميرو اتجمّد؟
مين العاجبو حالنا وكيف بلدنا اترمّد؟
(١٩٩)
وفد الأمريكان ما أظنّو للخير جايب
والناس اللي فيو ما باقي ليّ نجايب
زار البرلمان في جولة طايف جايب
جابت همْبْتي دمْبْتي القصّة واليس وعجايب
(٢٠٠)
زي زكريّا ناديت "رَبِّ إِنِّي وَهَنَ"
شان ما يرُد كرامة أمّتي الممتهنة
ويحرّر إرادة المسلم المرتهنة
#تسقط_بس جميع أشكال حكومة الكهنة
(٢٠١)
وانتا تحوش لسانك، تنتقي وتتحرّص
يطلع ليك حسين ود خوجلي ويتغطرس
ويجيلك مدردق .. والكلام يترصرص ..
#تسقط_بس عشان .. يا زول أخير ليك تخرس
(٢٠٢)
ما راح ننخدع لو قالوا تاني "شريعة"
ما دايرين نسيب بورانا أيّ ذريعة
#لو_سقطت_سريع فالنكسة برضو سريعة
#تسقط_بس تموت فد مرّة تبقى صريعة
(٢٠٣)
دكتور همْبْتي دمْبْتي، إنتَ ذاتك #يخس ِ
مدّينك وسام تاريكَ؟ يا للرخصِ
زول الكونغرس سايح بوصفو الشخصي
سمّيتوه وفد، بعتو(ه) بثمنٍ بخسِ!
(٢٠٤)
عيد الأم بنهديو لامّهات شهدانا
لي أم كلّ حر قادنا لحقوقنا هدانا
سايرين في طريقم، أمّهاتنا، هدانا
ثايرين ما رجعنا ولا للحظة هدانا
(٢٠٥)
"#تسقط_بس" شهادة بننطقا وإقرار
كل البنطقا بْخش جنّة الأحرار
والماقالا حُر، مسجون ومالو قرار
تسقط بس وتسقط بس مع الإصرار
(٢٠٦)
صور أحرارنا تعلو وفي سمانا تحلّق
في إجلال جميع الناس عليها تعلّق
وتنزل في الحضيض صورة الدني المتسلّق
الباع القضيّة وللنظام متملّق
(٢٠٧)
يا عمر البشير مالك جريت من تونس؟
يخسي على العرب خلّوك براك دون مونس
منبوذ في العراء، لازماك دعوة يونس
واليقطين نهيي، بس جرّب البقدونس
🤷🏽♂️🤷🏽♂️🤷🏽♂️
(٢٠٨)
ماضين في النضال ضد النظام ونصارع
واليوم الإمام بي روحو نزل الشارع
#تسقط_بس بدت خطواتنا ليها تسارع
الماضي انقفل، والأمر حسّة مضارع
(٢٠٩)
موعدنا الكبير يوم ٦ من أبريل
دا اليوم الزمان الحِلْم أصبح real
أركزوا يا أسودنا وزغردن يا ريل
تحرسكم ملايكة ربّي لي جبريل
(٢١٠)
أبريل ما نهاية سعينا المتدرّج
لا تهوّل براك لا تقيف كمان متفرّج
نحترم القيادة ومافي حدّ يسرِّج
ما نفك كلّ أوراق النزول ونعرّج!
♥️♠️♦️♣️
(٢١١)
حيي انا يا البشير، ليه ما مشيت؟ هرشوكا 😏؟
وللا تكون خلاص منّ القمم كرشوكا؟
وللا مقاطع القمّة، الصهاينة رشوكا؟
أركز للنهاية الجات مجرجرة شوكا
(٢١٢)
بي موكب كبير ودّعنا شهر تلاتة
في رحم النضال ثورتنا تنمو حلاتا
أولادنا وبناتنا ونحنا ذاتنا اللاتا
#تسقط_بس بنتلو بي وراها صلاتا
(٢١٣)
في ابريل الكبير #قم نمشي لا تتقاعد
ونّسّق: دفع، جيران، أهل، نتواعد
ونحوم في كتل متماسكة ما نتباعد
فيفتين ع الأقل (15+) نسند بعض نتساعد
(٢١٤)
التنسيق مهم، من شانو أوعى تقلّل
لو نسّقنا لي كل الصعاب بنذلّل
نبقى مع بعضنا ونَفْرز المتسلّل
ونْفُرز الجداد الداير يشكّك يضلّل
(٢١٥)
لو زول بفتكر دي الثورة وقفت حالو
اتكلّم معاو بالحسنى لا تشيل حالو
قول ليهو التظاهر والمواكب حالوا
ما دون الغلا في عيشو أو ترحالو
(٢١٦)
يوم ٦ المواكب جاية هادرة متينة
#تسقط_بس شعارنا الضوّى لينا رتينة
ومَكَنْةَ النظام يوم 6 قاطعة كتينة
على قولة حسين طالع كمان ميتينا [١]
(٢١٧)
كالعادة البشير أخلف وعودو وكضّب
التمساح مرق، ألبت في جحرك يا الضب
الأمر انقضى، من حسّة أبدى اتوضّب
البل والعَصِر، جهّز شعورك، والضب
(٢١٨)
مش عيب يا البشير نرجاك وتطلع شنقة؟
يا الله بتكون العبرة خانقاك خنقة؟
وللا ملازم الحمّام وضارب الزنقة؟
#تسقط_بس وجاك البل عديل يا منقة!
(٢١٩)
للحفل الكبير ح نكبّر الصيوان
ونزيّن سمانا بكافّة الألوان
نجتاز الخلاف يبقى الجميع أخوان
من أقصى اليسار لي ملتقى الأخوان
(٢٢٠)
قلنا ليكا "غور" طنّشتا واتجاهلتا
"اتخارج سريع يا بشّة"، اتمهّلتا
"الموقف خطير"، بسّطتو واستسهلتا
البل يا البشير، حسّة بتكون اسـ 😁 ـا
(٢٢١)
الصاج جنبي حار الليلة داير اتطعمج
في الكيزان عموما وفي حسين الاسمج
ما اشوف لي كويز، على قول حميدتي، اْتمجمج
يا حليلكم خلاص القصّة دار تتخرمج
(٢٢٢)
هيثم مصطفى، ليك السلام يا "سيدا
الكابتن بقود الناس يسوقم سيدا
كنتا ف ملعب الوطنيّة برضك سيدا
والعجب العجب! كمّل معاك تجسيدا
(٢٢٣)
الليلة الجداد بمرض بجيهُ سمير
والبفضل مصيرو الشيّة والتحمير
بيهضرب براو قايلنا ياخي حمير
عاد خلّي اليونّس بعضو يبقى سمير
(٢٢٤)
قول يا حسبو برضك وينو عبد الحي
مات بالخجلة ساكت وللا لسّع حي؟
اتخلّفتا وحدك دون أهالي الحي!
#قم كانت زمان، اسّة اقعد اتحَيْحَي
(٢٢٥)
ياخي شرطتا عينّا الليلة يا عبّاس
لابس الكاكي ساي تاريك طلعت لباس
ألبت في القيادة وكبّر الترباس
لما يجوك أسود أحرار شداد الباس
(٢٢٦)
كلّ الناس حضور، وبراكا إنتا الغايب 😰
آ ربّي السفر كان القرار الصايب 😭؟
ومتين يا وطن برجع لحضنك آيب
اتنسّم هواك ما بين رفاق وحبايب
(٢٢٧)
الشعب انتفض وانتا بتشوفو شريحة
واحنا نشوف نظامك يا البشير دا سريحة
بالملقاط نسلّو وبي طريقة مريحة
والتعقيم مهم بنبُخ وراكم ريحة
(٢٢٨)
ماك زول الدواس، شغلك جدادة تكاكي
جابوك بالغَسِب، وملبّسنّك كاكي
أرتال الكجر، الديش وكت سكّاكِ
عاد جري السواد، شوف عيني تسبق كاكي
(٢٢٩)
مفخرة البلد سيد الرجال يا حامد
يشهد ليك جميع الشعب شاكر حامد
إنّه ضميرك أبيض، حي، وقلبك جامد
وانّك ما خذلتا شباب بلدنا الصامد
(٢٣٠)
المنظر رهيب، إلّا العيون تتعامى
دا الشعب العظيم خاض المخاطر عاما
والكوز اللي كان ساند نظامو دعامة
ويستأسد، بشوفو الليلة ببقى نعامة
(٢٣١)
نترحّم كمان يا اخوانّا على روح سامي
فارسنا الشجاع العالي قدرو وسامي
برّ بقسمو ما خاف من رتب وأسامي
واختار يرتقي بي أشرف الأوسام
(٢٣٢)
يا رب يا لطيف تحفظ دماء أولادنا
من إجرام شديد ما كان يدور في اخلادنا
البايتين براهم شان يحرسوا بلادنا
صامدين في ثبات ما شفنا منّم لادنة
(٢٣٣)
يا قوش أبكي ساي الليلة بس قول واي
الحدّاث زمان قالولنا مو سوّاي
لا تفرفر كتير وتكون كمان لاواي
ولو تعرف، بشوف في جرستك سلواي
(٢٣٤)
يا تاريخ دقيقة، نوقّف التسجيل
وننحني كلّنا إجلال لهذا الجيل
العلّمنا كيف نتساوى دون تبجيل
والحرّيّة كيف تؤخذ بدون تأجيل
(٢٣٥)
الكل منتظر للجيش بيان قال هام
طار لينا الشعر واتوقّف الإلهام
منتظرين نشوف والكلّ أصبح هام
#تسقط_بس عديل ما بنقبل الأوهام
(٢٣٦)
أفرحوا يا رفاق، فاصل قصير ونواصل
غنّوا وهيّصوا، لامن نعرف الحاصل
ح نواصل النضال، ما بنرضى حلّا ناصل
العرف الطريق للحق أكيد يوم واصل
(٢٣٧)
ما ح نشيل زبالة نجيب زبالة بدالا
ما دايرين حسين والتوم وكوع وندالة
دايرين شعب حر وعهود سلام نبدالا
حرّيّة وسلام، وعدالة يعني عدالة!
(٢٣٨)
شكراً يا عوض على خدمة ما بتتعوّض
كرفستو البشير جبتوه لينا مروّض
اتقصّ العمود بعدو النظام بتقوّض
بعد كدا الطريق لرئيس حقيقي مفوّض
(٢٣٩)
مش كان قلنا ليك يوم جيت تصرّح "قوم لف"
مالك تاني جيت، بتدور علينا تولّف؟
قوم لف يعني قوم، لف، مافي داعي نحلّف
ما ابينا البشير شان ضلّه يا متخلّف
(٢٤٠)
من شرقت صِبحنا موَتسِبين ونفيِّس
ونقول البشير اتشات وما عاد ريّس!
ح نواصل مسيرنا ولي أمورنا نسيِّس
شان عوض ابن عوف نعرف نشوتو كويّس
(٢٤١)
السفّاح شرد، خلّف وراه فلول
نفرح، نبتهج، نضحك، نوتسب لول
لكن ننتبه للمنطق المعلول
#تسقط_بس وما بنقبل عروض وحلول
(٢٤٢)
هه، عوض ابن عوف بالله يوم ما قعدو
اتفكفك سريع، خلّي النشوف البعدو
والشعب العظيم شفناه بضرب رعدو
#تسقط_بس قرارو وبيوفي بي ما وعدو
(٢٤٣)
فات عوض ابن عوف جابوا العوض برهان؛
ح يتم الشهر؟ نعمل عليهو رهان 💁🏽♂️
ديل نفس النظام ذات روحو، والبرهان
قال قوش "استقال"! ما راضي ليو اتهان؟
(٢٤٤)
الضب اتحشر في جحرو راح متلبّت
جهجهنا بوراو خلّالنا ضنبو يبتبت
واصلوا الاعتصام، ألزم مكانك واثبت
الساق اتقطع عِلّا الجذور بتنبّت
(٢٤٥)
العالم سجد من هيبة الكنداكة
في كلّ الصحف كان دا الكتب كان داكا
فيك يعجز لسان الفُصحا والرنداكة
أبشر يا بلد، بتّك معاك سانداكا
(٢٤٦)
غلوتيّة القرد، النشيل باقينا
ومعانا الرفيق كاروري جا يلاقينا
واتستّفنا فل بالويسكي من ساقينا
شيّر يا حسين ود خوجلي وتاقينا
(٢٤٧)
كل الجامعات انتخبوا ليها مديرا
ما دايرين ولاء، دايرين إدارة قديرة
الكوز يبتعد، يتجاب بدالو جديرا
وتعود لي صفاها بعد كتر تكديرا
(٢٤٨)
أملانا بْوُعود ونّسنا شان نتشحتف 😏
قول لينا السجن بكرة بنشوفو مستّف
ونشوف البشير في قيدو بكرة مكتّف
ونشوف الجداد مزعوط وريشو منتّف
(٢٤٩)
يتحلّ الجهاز، مازلت أطلب ذلك
ما شايف وراو غير الظلام الحالك
ان سبناهُ راح يحيا النظام الهالك
وان شلناو خلاص درب الخلاص صار سالك
(٢٥٠)
ونعود من جديد بين الأهل للدار
بعد المنفى، ما أصلو الزمن دردار
في درب الخلاص ما أطول المسدار
تمّ الألف بيت ما غطّى كل الدار
(٢٥١)
"زين العابِدين" عامل حريف أوهمنا
فاهمينّك شديد يا كوز أخير "تفهمنا"
جايب لينا غازي-الحاج عشان تقهمنا؟
#تسقط_بس عديل قلناها ما همهمنا
(٢٥٢)
الجابك تصرّح تاني ايه يا حاج
ما تخلّيها ياخ "مستورة" ليه بتحاج 😏؟
إنتو مع النظام ما الثورة يا ابو الحاج
لا طلتوا الجهاد لا ناس "سقاية الحاج"
(٢٥٣)
#رمضان_أحلى_في_الميدان خلاص هشتقنا
والكوز الـ 'نقط' قايلنا ياخ فرتقنا
لا بنبان ولا رصّاص عديل فرتقنا
نهتف، نقرا، خالطين، للعرس جرتقنا
(٢٥٤)
#بابور_الفزع الجانا صفّر ودّع
من بلد الحديد قام، صوتو مانع ردّع
شرّف في القيادة بشيش قدل واتجدّع
شيخ يوسف كتب وصّف مسارو وبدّع
(٢٥٥)
آ ناس ما بصح بعد النظام اتقوّض
إنّنا ننهزم تاني وننخ نتروّض
أصلا للتفاوض مافي حد مفوّض
الموكب وجب والفرصة ما بتتعوّض
(٢٥٦)
ربّنا يحفظك وِيْفْتح عليك يا مروة
لا شبعنا بلقاك لا عرفنا منّك نروى
لي بلد الغريب ودّعنا هذي الثروة
بس حُب الوطن بيناتنا أوثق عروة
(٢٥٧)
قالولنا السياسة بتعني فنّ الممكن
قلنا الثورة فنّ المستحيل، ما بنلكن
يبقى الإعتصام جوّة القيادة ويركن
والموكب يسير جوّة القَصُر ح نبركن!
✌🏽✌🏽✌🏽
(٢٥٨)
مبروك يا شباب، باكر خميسنا خميس
وموكبنا الكبير بكرة بيمر بالميس
لسّة الزحف ما جا، بس دا للتحميس
#تسقط_بس، بقى المجلس كلامو غميس
(٢٥٩)
قالوا حميدتي جاب مسرح عشان ذا النون
قام ذو النون خطب كسّر تلج ممنون
المستور ظهر واتكشّف المكنون
وبين الكاف يكون أمر الكريم والنون
(٢٦٠)
من جدّة السلام لي كلّ فردِ وفردة
لقيادة التجمّع، دون "قحت"، منفردة
شرّوا الاعتصام زيدوه أدّو(ه) فردة
وازحفوا للقصر، البل وجب يا فردة
(٢٦١)
أصبروا يا رفاق القصر ما هو بعيد
الميس الزمان، ح نصلّي فوقو العيد
#لم_تسقط_بعد، ح نواصل التصعيد
لا بنخاف ولا بثنينا أيّ وعيد
(٢٦٢)
أحزاب الحوار .. فات بشّة خلّي حوار
في ذات الكراسي اتبادلوا الأدوار
وف "ذات الكراسي" بيختموا المشوار
أخبتك أضربك، بالجد كبار وعوار!
(٢٦٣)
يا ناجي الأصم، خالد سلك، يا مدني
العهد اللي كان بيناتنا مجلس مدني
ليه بعتونا سلّمتونا مجلس سدني
ما دايرين ولو بِدّونا جنّة عدن!
(٢٦٤)
يا شجن الصباح طلّينا زيّ النسمة
وانثري فوق نفوسنا الكادحة أجمل بسمة
غذّي الروح بوجبة من العبارات دسمة
"نغلب فيكِ أسما وبرضو نراكِ أسمى!"
(٢٦٥)
السودان كبير إلّا الأئمّة صغار
القالولو #قم قنَّب قعد ما غار
والوارث الإمام ما صلّى يوم في الغار
#تسقط_بس يغور كُلُّم محل ما غار
(٢٦٦)
أرجع يا الإمام لي حُفرة الدخّان
خُدلك ساونا برضو ودش مع السخّان
هنا مافيش مكان للباع ضميرو وخان
قال مجلس سيادة رئيسو جنكيز خان!
(٢٦٧)
شبهك يا الإمام، أصلك دراما كوين
أبيض وللا أسود؟ بطّل التلوين
الموقف خطير ما بقبل التهوين
قال راس عسكري؛ دي خيانة ما تخوين!
(٢٦٨)
علي محمود رحل، حسنين، وخلّى وصيّة
قال واصلوا النضال ما تشوفوا حاجة قصيّة
ما تفاوض تلين الناس دي تبقى عصيّة
ما دايرين قحت تبقالنا عاملة وصيّة
(٢٦٩)
إضراب التلات يعني التلات إضراب
رغم أنف #الإمام_الخاين الخرّاب
وجوّة عيون حميدتي وحوّا والأغراب
ومهما كل عميل رمّى الكلام دُرّاب
(٢٧٠)
عبّاسيّة ورّي حميدتي قولْة "احيّا"
ما الراجل صبح واطيلو جمرة وحيّة
والكباشي زي ود الطهور قال "حيّا"
واتلقي قوش لبت في جحرو راس الحيّة
(٢٧١)
هوي لا تستفز الشعب ليهو تغضّب
إنت حميدتي ساكت لا فريق لا تكضّب
الإضراب ضرب راسك واخوك متهنضب
البل لسّة جاي خلّيك خفيف متوضّب
(٢٧٢)
آآ حليل الإمام الحرّر السودان
واب قرجة وطمل واب عنجة داك حمدان
أسّة حميدتي ساكت والإمام رمدان
يتراجف من الإضراب تقول بردان
(٢٧٣)
ما تعمل حريف وتلف تدور وتّكتك
عضو مجلس سيادة أبينا، ببّح، ماف، تِك
يا حميدتي اتّعظ دي القصّة ماشّة تخستك
اتخارج سريع قبّال نحرق اللستك
(٢٧٤)
"قالّوك المطار ولا طيرة فيو ما ركّت"
الشعب اللي كان قهران عليهم نكّت
اتكبكب حميدتي اللعبة حسّة اتدكّت
البرموه بايظ، ما الكروت اتشكّت!
(٢٧٥)
المابيك عاد ليك في الضُلمّة بيحدر
المجلس دا خاين لي عهودو وبِغدر
ويْتجرجر ويْماطل لي زمنّا بيهدر
ارجعوا للمواكب والملايين تهدر
(٢٧٦)
قم #قم_يا_التجمع بطّل الخذلان
قُم #قم_يا_الأصم قم جدّد الإعلان
#قم_يا_هاشكو كان أصلو الجميع وحلان
#قم_كلك وقُدنا الشعب قط ما لان
(٢٧٧)
#تسقط_بس رجع بيناتنا تاني شعار
في هتافنا وغنانا وقولنا والأشعار
المجلس جفل مِتل الحمار العار
باروا حميدتي جت ضبّاطو يا للعار
(٢٧٨)
يا شجن الصباح، بكرة الصباح ح يعود
ونتقابل هناك في الموعد الموعود
نتنسّم عبير "حرّيّة" مِتل العود
ويغنّي الـ"سلام"، "وعدالة" تعزف عود
(٢٧٩)
قادر يا كريم تبداها من بِقباشا
وحميدتي الوِسِخ جيبلو القيود كلباشة
والشلّة الوراو من قوشا لي كبّاشا
وتشلّع جنودا وعُصبتا وأوباشا
(٢٨٠)
شاحدك يا كريم، كوبر نشوفو مستّف
وحميدتي النجس، باكر تجيبو مكتّف
ومليشياتو جت فوقا الصقور تتختّف
وكمان الكجر بجدادو ريشو منتّف
(٢٨١)
يا ود الأصم ليه تاني دار تتنازل
وتقول "تسويات" للمجلس البتراذل
آزول أبقى جادّي وما بصح تتهازل
الموكب مضى وما برجى زول يتخاذل
(٢٨٢)
دا الخير اتفرز، أفرز مكانك، ودا الشّر
البرهان ظهر، وحميدتي نايبو، وكشّر
عبد الحي كمان سوء نيته بان، اتقشّر
الصادق بعد ساكت جا داير يتحشّر
(٢٨٣)
الشعب المصابر ما رأينا الزيّو
والكجر المكاجر لسّة عاد في ليّو
بي إذن الكريم راجيه باكر شيّو
والنار أولى بيو في شان تنجّض نيّو
(٢٨٤)
أمّ الجامعات سوّوها ياخي زريبة
وهدوم الكجر، مشرورة، حاجة غريبة
بس هانت خلاص شايف النهاية قريبة
في شان الخلاص ما تغلى أيّ ضريبة
(٢٨٥)
للثورة بنَتِم، ما بنرضى بي أنصاصا
نبذل من دمانا عشان نزيح مصّاصا
بالسلميّة بس بنقابل الرصّاصة
ما بنشيل سلاح والله ولا حصّاصة
(٢٨٦)
بنجيب ليكي عاد سمح الخبر يا عازّة
كنداكات تزغرد، فوقا فرسان هازّة
زي يوم الطواف ماشّة الجموع متلازّة
واحتارن شياطين الخسيم الوازّة
(٢٨٧)
مالياك العُقَد، بس إحنا مالنا وملّك
إن شفت الملوك جايينا دار تتملّك
الشعب اكتفى وما فاضي ليكا وملّك
البل يا حميدتي الليلة جاييك ملّك
(٢٨٨)
موكبنا الكبير ليه المواكب تدعو
دا الشعب العظيم لا يمكن أبدا ردعو
المجلس كلابو الليلة جت بتصدعو
وحميدتي النجس تلقاو بفتّش ودعو
(٢٨٩)
يوم ٣٠ بشوف كلّ البلد في الشارع
كنداكة وشِفِت، طالب، أفندي، مزارع
ألحق يا حبيب أحجز مكانك سارع
أمر الشعب ماضي، وبُكرة ببقى مُضارع
(٢٩٠)
برهان إن ضُرس، سوّس، بِدور القلعة
يااسود البراري 🤩 ويا "بِدُور القلعة" 😍
٣٠ يونيو قالوا الســ١ــاعة الطلعة
طالعين للوطن مو شان ريال واب صلعة
(٢٩١)
أركِز يا حميدتي الليلة لا تتجرّس
إن شُفت الشوارع كلّها بتتّرس
الشعب العظيم خابر النضال اتمرّس
السلميّة هيلتو في كامبريدج تتدرّس
(٢٩٢)
يا نِيل المواكب يا الهدرت قدلتا
تتدفّق تكب في القصر تعمل دلتا
يا حليلك حميدتي الليلة دي اتبهدلتا
يا قوش الكِويز دسناك واتمندلتا
(٢٩٣)
الليلة القلوب راح تترسم ملحومة 💔⬅️❤️
حنطوف بي شوارعنا الزمان ونحوما
ونشوف البلد مليانة جت مزحومة
ما واتساب وفيس، الناس دي جات بلحوما
(٢٩٤)
قال مربوطة قال، الليلة جاك الـ #سيك
متذكّر أتوك؟ الخلعة بتنسّيك
يا المنفوخ دحين الليلة بنفسّيك
في كوبر عُقُب يوم بكرة بنمسّيك
(٢٩٥)
١٣ يسير موكبنا ضدّ الجهلة
وْف آخر الشهر موكب نَعَملو بمهلة
أنهضوا يا شباب قودوا الجُهال والكَهَلة
أطلعوا كلّكم، خلّوا الكلاب في السهلة
(٢٩٦)
أكتبي يا شجن وانشِدنا يا دسّيس
السودان بشيل الشيخ مع القسّيس
نتجاوز عقدنا ولاختلافنا نسيس
#تسقط_بس سريع شان نبدا في التأسيس
(٢٩٧)
مبروك يا قحت، بعتونا يا واطين
ثورتنا المجيدة قلبتوا حِلوا طين
قولوا علينا متشاءمين وجوّاطين
ويلّا احتفلوا فوق دم الشهيد واطين
(٢٩٨)
شكلو الاتّفاق ماصوهُ موية اتقرطع
البرهان لبس دور الرئيس، اتقطّع
الكبّاشي عاود من جديد اتنطّع
أمّا حميدتي أصلا من زمانِك برطع
(٢٩٩)
شكرا يا منى، ومحتاجة تشكري برضو
ناس عمر الدقير الأصلو ما بعترضوا
من بعد التحايا، حميدتي يرأس؟ يرضوا؟!!
بس ما راضي هو، واقعين كمان في عَرضو!
🤦🏽♂️🤦🏽♂️🤦🏽♂️
(٣٠٠)
بي جاه اللمام، راس عسكري ومدنية!
منتصرين كمان، ما برضو لينا دنيّة
مآ بالنيّة عاد، برهان خلاص بدا نيّة
والموكب دا ليه 🤔؟ دي لِياقة بس بدنيّة!
(٣٠١)
آسك يا الدقير لو من زمانك، لو وش
يمكن كان بياكل، حسّة راح يتبوّش
أمّا بقت زريبة وكلّ واحد حوّش
الموضوع خِرِب والقصّة ماش تتقوّش
(٣٠٢)
هوي يا ناس قحت هوي مرّقوا المستور
ما تلهونا بي حبّة كلام مبتور
حسّة أمرقوا لينا وثيقة الدستور
شان الثورة تعرف تهدا وللا تتور
(٣٠٣)
ناس عدمانة دمّ وجلودا زايدة تخانة
مافي مواصلات، والدنيا تغلي سخانة
ورموز السيادة افتتحوا ليم سلخانة
فاضل الادبخانة القصّة كلّها "خانة"
(٣٠٤)
قال عبد العظيم وصّانا ما ننجمَّ
في نصّ الطريق اللسّة ما اظن تمَّ
لازمنا النضال يا اخوانّا لازم، لمّا
#تسقط_بس، وبس، يا ناس بلاش نتخمَّ
(٣٠٥)
ربّنا يشملك بالحكمة يا حمدوك
لو كان جيت وزير ماليّة كان كمدوك
المعجا وقحت اتّفقوا واعتمدوك
والناس ظنّوا فيك الخير وجت حمدوك
(٣٠٦)
الكيزان نظام بتشاطروا وبتذاكوا
في اْكتوبر كمان بتلبّطوا وبتباكوا
هِش تَك يا جداد، ما تزعجونا تكاكوا
ريشكم بتنتف، راح تتشووا وتتـ ـلاكوا
(٣٠٧)
الخبر الاكيد .. الوطني قالوا اتبلّ
والشعبي اتلقِي .. وسّخ تيابو وبلّ 😁
هذا ما جنيت، ماف زول عليك اتبلّى
والشعب الصدق .. كذّب نبوءة بلّة
(٣٠٨)
كلّ الناس أهل والبينّا عُشرة وخوّة
والسودان دا ساكن جوّة قَلْبَنا جوّة
فرّقنا العميل، لازم نسدّ الهوّة
والناس تتّفق، بالحسنة ما بالقوّة