عبد الله جعفر/مسدار الحل

كتبه عبد الله جعفر للدعوة لحل جهاز الأمن. كتب المربّعات بصورة منفصلة ونشرها تباعا على صفحته في فيسبوك مابين 2020-01-12 و2020-01-14، مستخدما هاشتاق #مسدار_الحل، ثمّ قام في العام التالي بنشر الأبيات مجتمعة في 2021-01-12.

النص

جهاز الامن بلوة وحلّو بس يتحلّ

شر ما عندو حد خيّم علينا وحلّ

ما تقول "هيكلة"، دايرين خلاص نتحلّ

من راس الفتن، بعدو العقد تتحلّ

يلزمنا اليقين، ما تلتفت لي شكّك

استعجل كمان، يا اخويا ما تتلكّك

العب ستّتين، ما تمشي لينا بيكّك

النلحق طوابي الامن شان تفكّك

خلّينا الخلاص منّ البشير والفرحة

نسّتنا الكجر والتاتشرات والطرحة؟

لمّا نحل جهاز الامن بنقول مرحى

يادوب وكتها بتبقى النفوس منشرحة

الداير يمدحو ما بلقى غير الذم

شين شفنالو ياخ غير العذاب والهم

كم مرّة انتهك أعراضنا احسب كم

كم نهب البلد كم مرّة سافك دم

شان امن الوطن، آه الوطن مفجوع

حلّوا البستلذّوا بآهة الموجوع

ويبنوا الأندية وكلّ البلد بتجوع

حل ما منّو حل، ما منّو تاني رجوع

ايدك يا حسن، قوم يا محمّد بندي

لا دايرين بيوت اشباح وموقف شندي

لا دايرين كجر، لا بلطجي، لا افندي

يتفرتق نهائي، والبداية أهندي