مستخدم:عبد الله جعفر/أشعار غير مضنّفة

مستودع للأشعار قبل تصنيفها وفهرستها.

وطني الجريح

! يوسف محي الدين [١]: ناديت عليك وطني الجريح مابين حضورك والغياب نادِه صباحاتك تزيح وحشة منافي الاغتراب من "مُشرع الحلم الفسيح" تمحى المواعيد السراب غطيني باللون المريح أو كرفة من ريحة التراب جرحك منوسر كلو قيح من عضة الغول والذئاب الباعو دينهم بالصريح والبِقرو من نفس الكتاب براوية الدم البسيح لغة الكتل والاغتصاب والكل لحظة بيستبيح دم الميارم والصحاب من عظمة قال "ما بنستريح" صابتنا حالة انجذاب !! لا فترنا من دق الصفيح لا يوم شكينا من العذاب ياللمواكب! وش مليح بالعز يدقدق كل باب زي شوكة في تاج المسيح سلمية ضد الاحتراب سلمية في الغنا والمديح بين الكنائس والقباب في تشَّة الإيد التشيح في هيجة النيل والتساب في النبقة والزاد الشحيح رغم المكايد والخراب فليسقط الباغي اللديح ويتزاخر البوم والغراب ما بيصح الا الصحيح للشهداء عهداً في الرقاب ما بنرضى بالبكا والنويح وفُراشنا لا يوم الحساب !

! عبد الله جعفر [٢]: ناديت عليك وطني الحبيب في كل غدوة وكل رواح نادِه صباحاتك تذيب وحشة وقسا وغربة ونواح من مشرع الحلم الرحيب تمحي السراب القاه راح غطّيني باللون البجيب ريحة تراب كالمسك فاح عضّات كلاب، غيلان، وديب ناسورا ينتح جرحو قاح البقروا لي نفس "الأديب" والباعوا دينهم بالصراح برواية الموت الكئيب لغة أغتصاب، دم، تاح تراح والكل بحل روح القريب في لحظة تلقاه استباح صابتنا حالة وجذبة ديب من عظمة كمّل ما استراح لا فترنا من قوم ودّي جيب لا يوم شكينا من الكفاح يا للمواكب! شي عجيب بالعز تهلّل نورا لاح سلميّة بتحارب الحروب،،، روح المكلّل بالجراح بين المساجد والصليب سلميّة في الجد والمزاح في لمسة الكف الحبيب في هيجة النيل والرداح في النبقة والحال الصعيب رغم المكايد والسلاح فليسقط الباغي الكذوب وليرحل البوم القُباح لا صواب إلّا البصيب والشهدا بنشوفهم كفاح ما بنرضى بالبكا والنحيب ما دمنا قدّامنا الصباح

بين أمانيني ومخاوفك

[٣]

بين أمانيني ومخاوفك نعرف السكّة ونروح بين أمل واعد بنادي وماضي مثخن بالجروح بشريات في الأفق لاحت وذكريات ما دار تروح صوت بيهتف لينا: حاولوا وصوت يقول: يا عمِّ روح قلب بتحدّي المصاعب وعقل مستنّي الشروح روح تفتّش ليها مأوى ووعي كايس ليه روح خوفي من يوم تلقي روحك حاضنة روحي ومافي روح!

رثاء

يا القضيت العمر صابر واصلو يوم ما قلت أي كم ح تبكيك الأزاهر والشتول الدايرة ري والشباب الراجي نصحك دابو شبّ وعودو نَي يا الحنين الفاض محبّة ويا الرشاد الخاتي غَي صفحتك باقية ف حياتنا واصلو ما ح يطولا طي كُت بحس آلامي فيكَ وكنت دايما حاسّي بي يوم اضيق بلقاكَ جنبي واصلو ما بتخلّي شَي كنت بلسم لي جروحنا وكنت مرشد لينا ضي حي علينا وآه بكينا والله لينا وووب ووي ليه بتفدينا بحياتك وانت أفيد لينا حي؟

يعني بس ح تسيب حبيبك؟

[٤]

حتّى لو فكّر يسيبك؛؛ يعني بس ح تسيب حبيبك؟ لو جفاك قال ليك شتِّت الحنين بكرة بيجيبك وان نساك قال ليك أنسى يقدر ينسى 😏؟ ياخي سيبك وان أذاك جاب ليك عاهة بكرة برجعلك طبيبك حتّى لو بان ليك قاسي برضك اتحمّل نصيبك أبقى راكز وابقى صابر وليصيبك ما يصيبك والصبر لو برضو قاسي بكية مرّات ما بتعيبك أصلو ما تفكّر تسيبو حتّى لو طلّع صليبك

أحكوا لي عنّي

[٥]

ياريت تحكوا لي عنّي عساي أقدر أكون تاني أنا الجد رُحتَ من روحي بقيت ما قادر ألقاني وَلَاْني الكنت بحلم بيو ولا الكُنتو، ولا ياني ولابقيت أعرف الأفراح ولا بتذكّر أحزاني ولا عارف حدود دنياي ولا مستوعب إمكاني ولا قادر ألاقيهم ولا لاقينّي حبّاني ولا عارفينّي هل عايش ولا عارفينّي كيف فاني ولا عارِفني عايش وين مُشَرَّد برّة أوطاني ولا دارا أقول بيتي ولا بين أسرة ترعاني بقيت ما لاقي وجداني وتعذّر تاني وجداني بعيد في عـُزلة تملاني وحيد في الدنيا وحداني عزاي في ناس بتطراني وكت ما الدنيا تنساني

طلب صداقة

[٦]

عملتا طلب صداقة زمان وراجيك تعمل acceptance مسحتو وعدتو كم مرّة بكل إصرار و insistence وعاوزك ياخي تعرفني وبحاول، كلّي persistence ولو ما بترضى بيّ صديق كفاي ان شا الله acquaintance وأخش مخصوص عشان ألقاك بلاك ما عندي existence واشرّك ليك في البوستات وأأشّر ليك من distance وأفتّش ليك تعليقات والايك ليك بالـ sentence واصلّح في الكلام واكتب عساك بس تلقى فيو substance وأقول تدّيني بس لايك بتعمل ليّ subsistence {}{واتفاعل وأكون آكتيڤ}{} والاقيك انتا passive tense ولو تعرفني كيف شاريك وكيف إحساسي بيك intense ولو تعرفني كيف راجيك زي المستنّي death sentence