عبد الله جعفر/فجر الخلاص
قصيدة ثوريّة غير مكتملة كتبها عبد الله جعفر، على وزن "ما بنسى ليلة كنّا تايهين في سمر"، ونشرها على صفحته في فيسبوك في صبيحة السادس من أبريل 2019، قبل ساعات من انطلاق مليونيّة 6 أبريل. مربّعات القصيدة من لزوم ما لا يلزم، مرتّبة على الحروف الأبجديّة.
النص
ما بنسى ليلة كنّا راجين في سهر
فجر الخلاص، أنا وانت، ثايرين كم شهر؟!
(ء)
بكرة التجمّع للجموع حدد بؤر
ونضالنا سلمي ومهما كان ماف زول ثأر
التاتشرات تمشي وتجي وتتجارى أر
وأسد البراري القاد نمورنا هناك زأر
(ب)
رغم الضرب رغم الجروح رغم الدبر
رغم الجداد بيناتنا بادلنا الخبر
رغم الطواري صمودنا زاد والكل صبر
موكبنا لي فجر الخلاص عدّى وعبر
(ت)
يا ما حزنّا نشوف شباب كفّو اتبتر
ياما صبرنا على النقاشات والهتر
ياما طلعنا مع الحشود رغم الفتر
ياما نجينا من الخطر ربّك ستّر
(ث)
قول الشهيد عبد العظيم أصبح أثر
ما استلقى في معركتو بل للموت أثر
واحنا بنسير في دربو قاصّين الأثر
خُيّرنا واخترنا المشقّة على الوثر
(ج)
يا ما صبرنا على النضال رغم الكجر
شايلين بنادق واحنا ما شايلين حجر
المدّ ايد للثورة جرّيناه جر
والخاتّي طوبتو مع النظام قلنالو جر
(ح)
وعشان يكون الحقّ ليك تعبر بحر
والساقية لسّة مدوّرة، والدنيا حر
والنصر للفاس والرجال، لاح السحر
والدوش زمان أشجانا بي شعرو وسحر
(خ)
الكل عرف معنى الوطن بيهو افتخر
واحيينا تاريخ بالنضال ياما ذخر
قرّبنا نوصل، والنظام عضمو اتنخر
عمّا قريب صنم النظام ح نشوفو خر
(د)
يا شعب مغرم بالكفاح مِتلك ندر
رغم المخاطر والرصاص سيلك هدر
"الليلة #تسقط_بس" خلاص أمرك صدر
والشعب لو دار الحياة بجيب القدر
(ذ)
الشعب أجمع أمرو وأمضاهُ ونذر
يرمي النظام لا نُبقي باطل لا نذر
ننهي الفساد ننهض كفانا من القذر
الشجرة دي بنحفر نشيلا من الجذر
(ر)
ما بنسى يوم التاتشرات ليهن صرر
من الحماس كات العيون فيهن شرر
لمّن ثبتنا ركزنا لاذن بالفرر
حبّة ثبات مرّات بتكفي من الضرر
(ز)
(س)
كم من شجاع أدهش عيون الناس أسر
الخوف خلاص بيناتنا حاجز وانكسر
والكوز بقول "الاحتجاج قلّ انحسر"
أمّا الحقيقة، الكوز في مشروعه انحسر!
(ش)
هذا النظام من أردا أنواع البشر
أخبث نفوس الحقد بيناتا انتشر
كارهة البلد كارهة الجميع مليانة شر
وبتستحل أكل الحرام بالمفتشر
(ص)
درب السلامة ولا الطريق المختصر
تغيير عديل ما بس على الواجهة اقتصر
قرّبنا نقلع حقّنا، الشعب انتصر
وهدا النظام "ميتينو" طالع واتعصر
(ض)
وبقينا نطلع في البوادي وفي الحضر
ما عندو حظ الـ للمواكب ما حضر
ولا عندو حظ البالحضور قط ما نضر
ألحق خلاص شان النظام دا بيحتضر
(ط)
ألفين سلامة اجتزنا مرحلة الخطر
وارتحنا من دعم السعوديّة وقطر
الشعب يملي شروطو في عزّة وبطر
قبل الدول تتغدّى بيو بيهن فطر!
(ظ)
(ع)
التاتشرات مِتِل الحمير قالولا عر
والأمنجيّة مِتِل كلاب ضاربة السعر
سكّوا الولاد، دقّوا البنات، قصّوا الشعر
والثورة ماضية على الطريق رغم الوعر
(غ)
(ف)
باكر نشوف حافلات تقول "موكب نَفَر"
واهلا بكلّ أهلنا جونا من السفر
الثورة دين، للبيها آمن أو كفر
والكفر بالثورات ذنِب لا يغتفر!
(ق)
ناس "الخروج" أعفونا من راعي البقر
الثورة ح تجلّي العقول دي منّ الصَقَر
راعيكم اتكتّف خلاص حسّة اتعقر
سامعين هناك حس النحاس دقّ ونقر
(ك)
عدّت شهور عشناها ما بين فر وكر
شفنا البت الحربيّة والولد الضكر
طالعين سوا، أدروب وعادل وابّكر
شفنا المنقّبة، والنضال ما محتكر
(ل)
(م)
(ن)
(هـ)
٣٠ سنة بْنتذلّ قهرانين قهر
شفنا الأمل في جيل شباب فرهد ظهر
أحيا الجميع بي ثورتو وأبدع بهر
قال لينا للحرّية ما يغلى المهر
(و)
(ي)
أنا وانت نكتب يا حبيب أحلى السير
جاورنا ناس في كلّ حي نعم الجير
لازم نصل، ناولني ايدك my dear
شان نحكي للأجيال نقول we are here