مستخدم:عبد الله جعفر/مسدار الحنك
قصاصات نصايح للشباب ابتدرتها بصورة عفويّة، وتحوّلت لمسدار، وأخذت طابع المرح في البيت الرابع. دارت جولات شعريّة تحت كلّ مربّع، يمكن الرجوع إليها بمتابعة الوصلات.
النص
أوعك تمشي لي واحدة وتقول "نتعرّف"
اتعرّف براك، شوف ليك طريقة، اتصرّف
ولمن تعرِفا اتذكّر تقول "نتشرّف"
اسمع كلمتي، وما تقول دا عمّك خرّف
وتاني بنبّهك على نقطة هامّة شديد
ما كل يوم تكرّر ليها: "مافي جديد ؟"
جيب انت الجديد يا يابا أبقى شديد
وان حنكك ضعيف احسن تشيل لي حديد
وفي الفيسبوك دحين ما تنسى عيد ميلادا
"هابي بيرث داي تُ يو" تلبّسها ليها قِلادة
بس، ما تزوّدا، وتنداح، بتبقى بلادة 🤦🏽♂️
ركّز حبّة ولّدتونا ياخي ولادة 😓😓😓
علّق مرّتين، والتالتة تعمل رايح
انضم بي فهم، ما تسوّي كلّو مدايح
اللايكات كمان، ما تبين خفيف أو سايح
افهم يااا ولد ما تسوّي لينا فضايح 🤦🏽♂️
أوعك دون إذن من وولا تعمل شير
حتّى اْن عاملا ببليك، راعي حسن السير
وان خلّيتو ذاتو الشير اظنّو اخير
افهم يااا ولد، ركّز معاي يااا طير 🤦🏽♂️
شوف الناس دحين لا تكون براك الـ "هاها"
لا تكون الخفيف، بين الخلوق الهاها
واسواها الضحك وكت الزعل، وادهاها
تضحك ليها في حاجات تكون كارهاها 🤦🏽♂️