مستخدم:عبد الله جعفر/أيّامنا

مشاهد من كلّيّة الهندسة والعمارة

شوف محاسن خُلُق المهندس الفهم و الذوق و الحماس . * * * . إنت يا برلوم أصلو جرسة لسّة ياما تشوف بكرة لسّة الـ Drawing ح تشوفو حَسّة و في المساحة ب تتخسّ خَسّة بكرة ياما تقول: أنسى أنسى شلت ملحق أو شلت خمسة .. ما بهمّك صب وللا باص .. . * * * . إنت يا برلوم لسّة دايش لسّة من الصب لسّة هارش يسألوك تقول: غايتو عايش فات معسكر، ساب بيتو، طافش قال خلاص الود قاري ناقِش في امتحانو اتذكّر طراطش .. ما بحلّك إلاّ الترس .. . * * * . يا مهندس جِنّك زُواعة ساب قرايتو و بارى الصياعة هجّ فات من هندستو باعَه فات هناك School قضّى ساعة و في علوم ماش يلقى الجماعة و ما مشى الآداب قال إشاعة .. و في المجمّع كم عندو ناس .. . * * * . يا مهندس عايش شبابو ما بِخاف الصب، قال حبابو لا بيحضر لا شاف كتابو لا لكاشر لا خشّ لابو دكّ فايز قال عندو قابو و Strength داير يبداه دابو .. لما شاف الجدول خلاص .. . * * * . يا مهندس يا مالي وقتك من هموم الناس فاضي، بختك في اللكاشر ولا مرّة شفتك و ما بتترّّس، تديهو أختك السمستر قال أصلو خستك شاتو ملحق و للبعدو تكتك .. و الله حالتو تألّف قصص .. . * * * . شوف فلان داك سكّ السياسة زولنا مخلص شايلَه الحماسة بارى حزبو و باع الدراسة المشاكل سكّاها كاسَه كلّ يوم وادّينو الحراسة و السياسة قبيل قالو ناسَه: .. ما تطرّف وما تبقى راس .. . * * * . شوف فلان داك كيفن مكسّر شوفو كيف في الكافتيريا عسكر من سجارة لصندوق و أكتر ساب قرايتو و باع السمستر لا بصوّر لا عندو دفتر زولو باصى و هو اتقصّ كستر .. زولنا كورك طقّ الجرس .. . * * * . شوف فلان داك خلاّهو زولو زولو مين؟ ياخ العندو Polo فتّش الأعذار ما رضولو شين يقول؟ ما خلّولو قولو داير يوسّط و الناس أبولو حالتو صعبة و حال ليهو حولو .. لا أكَل لا نام لا درس .. . * * * . شوف فلان البارى الضبّبة هم باصوا و صاحبنا صبّ داير يسيبُن كاس ليهو سِبّة بِقى بِمشي علوم حبّة حبّة صيدلة و أسنان و الأطبّا يوم و يومين صاحبنا حبّ .. و في المجمّع سوّالو ساس .. . * * * . يا فلان م تبطّل عوارة شوف قرايتك خلّي الشتارة السجارة وراها السجارة و كلّ يوم جايب ليك شمارة في الـ Tower للـ C’s للعمارة زولنا ماشي School يا خسارة .. شافو واحد؛ عمّك دقس .. . * * * . الملاعب نحن ب ندورَه شوف فريقنا و كيف دقّ كورة و في المجمّع شوف أحلى صورة هندسة و تشجيعَه و حضورَه و اقفة ساندة اللاعبين صبورة يا بنخسر و الناس فخورة .. يا بنرجع في ايدينّا كاس ... . * * * . يا ام عيونا ساحرة ب تجرّس و الله شوفتِك تشفي المدبرس يا البِتشرح للناس تدرّس يا البِتكتب و الناس تترّس إنت ملكة و ذوقِك بحسّس دا دلال ايه؟ دا دلال مهندس .. اللقاه ما بعدو كاس ..

سميري

الرسموك في ضميري وين سميري . * * * . الأستاذ بِدرّس و أنا داكّي و مدبرس لا قاعد أتندس و لا قادر أترّس من بُعدو متجرّس و الناس دي ب تحنّس ما برضيني إلاّ أشوف الباشمهندس . * * * . برلومة ونّاسة حسّاسة حسّاسة ما قالوا ترّاسة لو شفت كرّاسَه تحلف دي الدراسة و أنا دستوري نازل .في معمار و ناسَه. . * * * . شاكي و راسي ضارب باكي و قلبي دايب من بعد الحبايب أنا ما راسي شايب .من نور الكهارب. . * * * . يا السمحة ف طِباعَه يا الماها زوّاعة يا الماهة بيّاعة بهتف بي شجاعة أنا ماش يا جماعة هندسة الزراعة . * * * . قلبي خلاص رحلّو باراهو زي ضُلّو طار من صدري، خَََلّو لو داير أصلّو أنا عارف محلّو أنا سجّلت عمري .للكيميائي كلّو. . * * * . برلومة بي مِيّة في جمالَه هنديّة و بي ذوقَه مكسيّة و بالأخلاق غنيّة و في التعليم دريّة هيّ ف قلبي هيّ .الداخلة مدنيّة. . * * * . من قلبي حابّيك و بي روحي بفديك و من عمري بهديك و قاطع شعري فيك لو سألوك عنّي أنا ماشّي ميكانيكا . * * * . يا الزاهية ف نضارَهـ زي نور المنارة رايقة و قلبي دارَهـ موقدة في قلبي نارَهـ ما بِطفيها إلاّ أزور قسم العمارة

وصيّة للبرلوم

برلومنا داكّي و خالط قاعد يتونّس دا الــ من عزومة البارد و العصير فلّس . * * * . لا خشّ لاب لا لكشر لا لحق تندس لا باصى في التستات لا كورس ويرك ترّس في الامتحان شاف ليك الدنيا تتعكّس يا الــ كنت بس تتضاحك حسّة تبكي و بس . * * * . في كلّ يوم في ليلو بالربيت هلوس ما تخلّي قلبك جامد أوعى تتجرّس لو شلت صب ما تخجل أوعى تتحسّس ياخ أوعى بس تتضارى البورد ما بِندس . * * * . شال ليهو كوم صبّات الود خلاص دبرس لاقاهو واحد سينير صبّرو و حنّس جاب ليو قزازة بارد قعّدو و جلّس قال ليهو طوّل بالك أسّة روّق بس . * * * . قال لي انت دا استعجلت و حظّك إتنحّس حسّة استفيد من روحك؛ الدقس درّس تاني ما تستعجل و أوعى تتحمّس حبّة حبّة اتعلّم لما تتمرّس في الكورسويرك بالذات بس أوعى تتدقّس و الامتحان في القاب بتجاب و بتخلّص

مهندس

زول شاف مهندس آمَن أصلو ما شكّ قال زول عجيب و الله و عارف السِكّة . * * * . لو في السياسة مناضل كلّ يوم عكّة لو في الدراسة محنّك عارف الحبكة لو في القيافة مهندم ظابط الشكّة يا الــ للهموم فرّاق ما تفارقو الضحكة . * * * . لو شفت في الميدان الهندسة الملكة و لو شفت في التشجيع بي ’سمبلا‘ ’وكّا‘ لو في الحنك و الناس بالنسبة ليو لِكّة لا بِقعد اتكبكب لا حسّ بي ربكة . * * * . في كلّ كوم لابات لابد يكون دكّ و من كلّ كوم تستات لازم يكون زكّى الكورس ويرك باصاهو و أصلو ما سَكَّه الامتحان هو الصَمْ و الكورس ويرك فكّة . * * * . في القاب خلاص بِتوكّل و اْقرا و اْتحكّ قال المثل: ”يس ساعدوها بي جكّة“ لا زول غتيت لا ضب كسّار و بِتشكّى و ان شاللو 100 صب ما بقعد اْتبكّى

مهندس

يا مهندس حظّك تعيس متنحّس الليلة . * * * . في أولى جايي مسخّن الود خلاص متحمّس في الــ Calculus قصّوك و الناس تشيل و تحنّس . * * * . في تانية عامل سينير الود خلاص هو الريّس كلّ المواد انسترت إلاّ الرسم متعكّس . * * * . في تالتة عامل روحك الود خلاص متمرّس تيوتوريلات ما ب تحْضَر و تقول لصاحبك تندس . * * * . كلّ الأساتذة اكتشفوا من يوم بقيت بِتّرّس الكورس ويرك صبّيتو و في الامتحان متجرّس . * * * . نصّ المواد صبّيتَه بقيت تعيس و مدبرس من الربيت تتراجف و كلّ يوم بِتهلوس . * * * . الصب خلاص باصيتو في رابعة قلت تكيّس أدّوك شاكوش جامد و قاللوك كلام ما كويّس . * * * . بقيت مدمّر قاعد هناك براك متحسّس و حلفت عمرك أصلو لمّن تموت ما تعرّس . * * * . في خامسة رايق فاهم لامّي البرالمة تدرّس الجامعة ما ب تِتفارق بتمشي وين يا مهندس

{{أبيات|