قواعد الذوق الأربعون
سلسلة نصائح في الذوق العام صاغها محمد ميرغني، وعرضها على صفحته في فيسبوك، مستخدما هاشتاق #قواعد_الذوق_الأربعون
المحتوى
1/ ليس من الضروري أن تبدي رأيك في كل شيء، لاسيما إن كان قد يؤذي آخرينFB.
2/ ما تنصح زول قدام الناس أياً كان غلطو، احترم مشاعرو عشان يحترم نصيحتكFB.
ولو الغلط بسيط فالتجاوز أفضل.
3/ لمن زول تفلت منه كلمة أو يعمل حركة مُحْرِجَه قدامك ويخجل من روحه.. تظاهر بإنك كنت مشغول بشي تاني و ما سمعت ولا شفت شيFB.
حركة بسيطة لكن حتجبر كسر كبير في نفسه..
4/ لمن زول يحاول في شي كتير ويفشل ويستعين بيك فقبل تنجز الأمر تظاهر بإنه صعب (مهما كان ساهل بالنسبة ليكFB.
مثلاً لو أمك استعانت بيك تدخّل الخيط في الإبرة فتظاهر بالفشل قبل تدخّل الخيط عشان تطمنها انها لسه صغيرة ونظرها كويس.
حاجة صغيرة خالص لكن أثرها في النفس كبير.
#إحسان
5/ لمن يكون عندك زول بِحتاج خدمة منك من وقت لآخر، فإنت برضو أطلب منه حاجات بسيطة في إمكانه (حتى لو ما محتاج ليها) بس عشان ما يتحسس لمن يحتاج ليكFB.
وأنا واثق إنك لو عملت كدا لوجه الله فحيجزيك ثواب كأنك متصدق برضو.
#إحسان
6/ ما تعمل "هاها" لبوستات جادةFB.
#فيسبوك
7/ ما تعلق سلباً على شكل زول أو وزنه (أو أي شي ما بيده تغييره) أياً كانت قرابتك بيهو وأياً كان قصدك من التعليقFB.
ما دام ما عندك كلام طيب يبقى تسكت بس.
#بديهيات
8/ ما تسأل ناس متزوجين بقيتوا تلاتة ولا عشرة..ما بخصكFB..
ما تسأل الخاطب العرس متين كل شوية؛
ولا تسأل أنثى (أياً كان عمرها) ماف حاجة في السكة يابت؟ وحتقعدي كدا لمتين؟
ما قاعدة في بيت أبوك هي 😒؛
الزواج والإنجاب دي حاجات بيد الله وحده وسؤالك محرج وسخيف لكن هم حيجاملوك في الاجابة لأنهم ظريفين ما زيك 😒.
#احترام
9/ ما تنتقص من حاجة أثٌرت على مشاعر زول سواء فرح أو حزن مهما كانت الحاجة دي بسيطة في نظرك و ركّز على مشاعره ما على الأسبابFB.
مثلاً:
زول فرحان بإنه دخل الجامعة ما تنتقص ليو من الإنجاز بكلام زي ما عارف الراجيك وبتاع..
كل مرحلة عندها إنجازاتها.
زول زعلان من حاجة ما تقول ليو هسي دي حاجة تزعّل؟ وعينة الكلام الزي دا..
زول حزين من حاجة ما تتفه ليو سبب حزنه
ركّز على طمئنته وتقويته هو بدل تطّلعه ضعيف وبحزن من حاجات ما بتستحق..
احترامك للشخص بفرض عليك تحترم مشاعره وتقدّرها وما تشوف كل شي من زاويتك انت براك.
#جبر_الخواطر
10/ الريجكشن مسج أبدا ما عيب ولا حاجة محرجة إطلاقاً، المحرج والسخيف إنك تخلي الزول متعشم لفترة طويلة من الزمن ومنتظركFB..
رجاءً يا أصحاب الـ Events كلّموا الناس الما تم اختيارهم بطريقة فيها ذوق وراعوا لمشاعرهم في طريقة نقل الخبر برضو.
#عمل
11/ قدِّر المجهود وما تقيّم النتائج بسFB.
أمثلة:
- لو ابنك اجتهد لامتحان وما جاب نتيجة سمحة فقول ليو انك فخور بمحاولاته وباجتهاده والنتيجة بتتصلح لقدام.
- لو راجلك تعب نفسه عشان يجيب ليك حاجة ما تقعدي تشنّفي فيها وانت عارف انه اللون دا ما بحبه وبتاع.. قدّري لفّته الطويلة وأديهو الفيدباك بطريقة لطيفة بعد الشكر وإظهار الامتنان.
- لو مرتك عملت ليك وجبة وما عجبتك إياك تعلق الملح زايد وبتاع. أشكر ليها وقفتها الطويلة وتعبها في إعداد الوجبة دي ولو كمان أديتا بوسة في اليد مع تسلم ايدك الحلوة تكون اتجدعت واتقلبت هوبة عدييل..
وبعداك ممكن الفيدباك بطريقة لطيفة زي: "شنو يا جميل قللت السكر كدا متخيل كل الناس طاعمة زيك ولا شنو؟"
المثال الأخير ممكن يتحسب مع قواعد الحنك الأربعون 😂
الكلام الطيب دا ما بقروش والله يا جماعة ولو بقروش برضو فشريكك في الحياة بستاهلو يعني.
12/ كن جميلاً في طلبك ولا تُرهق الآخرين فتجبرهم على الموافقة لما لا يستطيعونهFB.
كيف؟
لمن تجي تطلب حاجة من زول أديه أعذار مسبقه لرفض طلبك بدون يتحسس، في ناس ما بتقدر ترفض أي طلب حتى لو ما كان في استطاعتهم، وبعداك إما يعملوا شي فوق طاقتهم أو يضطروا للاعتذار مرغمين..
فعشان توفّر عليهم وعلى روحك دائماً خليك جميل في طلبك.
أمثلة:
بدل: دايراك تمشي معاي الحتة الفلانية
قولي: لو ما طالعة مشوار أو ما عندك قراية شاغلاك فدايراك لو بتقدري تمشي معاي الحتة الفلانية ✅✅
بدل: دايرك تديني 10 ألف كاش
قول: بلقى عندك 10 ألف كاش؟ ولا مع الأزمة دي حالك زي حالنا؟ ههه (ضحكة خفيفة) ✅✅
وهكذا..
بتشوفها حاجات بسيطة لكن على نفوس الناس أثرها كبير والله. دي تعتبر بونص في الذوق لكن مع الناس الحساسين قاعدة عديل.
#خفافا #إحسان
13/ في كل ما يعتمد على الذوق: لا تستقبح ما يراه الآخرون جميلاً حتى وإن لم تحبه،،
و دَعْ ما لا يُعجبك إلى ما يعجبكFB.
مثلاً:
فنان ما عجبك ما تنتقص منه وببساطة شوف غيره وخليه للعاجبهم..
رواية/مسلسل ما عجبك حيعجب غيرك..
وجبة ما بتحبها شوف الوجبات البتحبها وخليها للبحبوها..
وهكذا..
سيء جداً إنه تنتقص وتسيء لشيء بس لأنه ما عجبك، احترم الغيرك العاجبهم الشي دا ياخ.
طبعاً السخرية اللطيفة لا تدخل ضمن الاساءة، خصوصاً في مجالات التنافس زي الرياضة مثلاً
بتحب برشلونة طبيعي تسخر من ريال مدريد ويكون عندك ذوق عادي لأنه كلنا عارفين دي لوازم تشجيع ومشاغلات وكدا..
دا غير انه السخرية بتكون في مجالك الضيق وعلى نطاق ناس بتعرفهم مسبقاً وحياخدوا كلامك على محمل السخرية فماف مشكلة..
14/ في الأمور الممكن تهز الثقة خليك مبادر وما تحوّج الطرف التاني يتخت في وضع محرجFB.
مثلاً:
داير تدي زول قروش لحساب بينكم؛ هو قد يخجل يعدّها قدامك، بادر انت وقول ليهو كدي عِد القروش دي لأني ما متأكد منها، كدا حيحس بالراحة و حيعد مطّمن..
عملت موقف معين شريكك العاطفي ممكن يفهمه غلط، وفّر عليه عناء السؤال واشرح الموقف إنت..
يعني مثلاً مشيت تتكلم بالتلفون بعيد من مرتك لسبب معين فقبل تتعبها بالشك والتفكير في انك بتخونها طوالي تعال وريها اتكلمت مع منو وليه.
صديقك شافك في موضع حق شبهة تعال وضّح ليهو إنه كان قصدك كدا وكدا..
ما تساعد الناس على الظن السيء فيك ولا تحمّل أحبابك العبء دا.
#إحسان
15/ احترم خصوصيات الناسFB.
زول ما ورّاك بمعلومة تخصه ما تمشي تفتّش وتنقّر وراها..
ما تفتّش في مقتنيات زول سواء شنطة أو دولاب أو غيرها بدون إذنه..
ما تستخدم تلفون زول أو لابتوبه بدون إذنه..
ما تعاين في رسايل ولا صور زول بدون إذنه..
(من نظر في كتاب أخيه بغير إذنه فإنما ينظر في النار).. كما ورد في الحديث الشريف و كتاب بمعنى رسالة وحالياً بتعني رسالة،تلفون أو أي شي خصوصي..
حتى في المواصلات ما تعاين لي جارك في تلفونه.
احترم رغبة الناس في كتم أسرارهم وما يخصهم ولا تسأل حتى عن أسباب..
حاجة سيدها ما أذن ليك تستخدمها ما تستخدمها.
#احترام
16/ الذوق في المكالماتFB:
ما تتصل بزول أكتر من مكالمتين،، هو مفروض مرة واحدة لكن ممكن مكالمة تانية بعد فترة متوسطة لو نسى يرد في الأولى.. إياك تتصل اكتر من كدا.
ما تتصل بزول وتسأله فاضي ولا مشغول؟ قول حاجتك وخليه يحدد هو لو فاضي أو لا.
في ناس بتكره المكالمات وعندها فوبيا رسمي منها، راسلوهم أفضل ولو اضطريتوا رسلوا مسجات توضح سبب المكالمة قبل تتصلوا.
لو زول اتصل بيك وقال داير رقم زول أو داير زول جمبك ما تديه الرقم ولا التلفون طوالي.. استأذن في الأول(دون يسمع استئذانك الزول الفي الخط) يمكن المطلوب معاه الكلام ما عنده رغبه يتكلم أو يدي رقمه.
متصل تعزّي زول اختصر وما تكتر كلامك ولا تبدأ ونسة.
متصل لي شغل معين ما تتونس كتير خليك رسمي.
ما تتصل في مواعيد متأخرة، خصوصاً لو على ناس كبار.
لو ما ردوا على اتصالك خت النية السليمة.
لمن تتصل من رقم غريب أو محتمل ما تتعرف فقول اسمك من الأول وماف داعي للأسئلة زي ما عرفتني من صوتي؟ بما انك ما محمد الأمين ولا إلبوماتك مالية السوق فطبيعي ما يعرفك من صوتك.
لو اتصلت وما ردوا عليك إياك تتصل من رقم غريب..
#احترام #خفافا
17/ لكل موقف حديث مناسب.. تعلم أن تتحدث بما يتناسب مع الموقف والظروف المحيطةFB.
مثلاً:
لقيت زول فرحان عشان اشترى تلفون جديد.. حتى لو إنت شايف التلفون دا كعب ما تجي تقول رأيك السلبي في اللحظة دي بالذات.. لأنه ما وقته.
قعدت في ونسة فيها ناس كبار يبقى كلامك يكون مناسب لمسامع الكبار، ما تجيب الخارجيات البتقولها لأصحابك وشلتك.
ركبت مواصلات أو قاعد في حتة عامة و في ناس سامعينك ما تتكلم في مشاكلك الأسرية أو الخاصة سواء بالتلفون أو مع زول.. دا ما مكان مناسب.
شخص عمل فيك معروف وأداك عربيته تقضّي بيها مشوار، حتى لو لقيت مية عيب في العربية ما تقول شي غير الشكر والامتنان.. بعدين هو أدرى بعيوب عربيته أصلاً.
زول أداك تلفونه تتكلم، ما تجي تقول تلفونك دا صوته كعب وسماعته بتشخشخ وما عارف كيف.. المقام مقام شكر.
زول بِشرح ليك في مادة تطوُّع منه ما تقول ليه لسانك ألثغ أو صوتك كدا أو تسخر منه بأي طريقة من الطرق.
بالمثل في لحظات الحزن.. مشيت عزاء ماف داعي تتونس كتير وتضحك، دا ما محل ضحك.
بت جات تتناقش معاك في شغل رسمي ما تقلب الموضوع غزل ومشاغلات، دا ما موقف مناسب حتى لو عايزها على سنة الله ورسوله.
مشيت زيارة لمريض ما تجيب سيرة الموت وخالي اتوفى بنفس المرض والكلام الزي دا.. خليك مطمن ومبشر.
القطيعة طبعاً فعل ذميم لكن حتى لو قطعتَ في زول فما تعيبه بصفة موجودة عند واحد من القاعدين معاك (ما تبقى عليك غيبة وجرح مشاعر كمان).
فكّر في كلامك قبل تقوله عموماً و دي نصيحة لنفسي قبلكم كلكم حقيقة..
#احترام #جبر خواطر
18/ لا تنسَ الفضل لحظات الخصام وتذكّر الخير والحسن دائماًFB..
"ولا تنسوا الفضل بينكم"
مثلاً:
انفصلت عن شريكك العاطفي ما تحكي عنه بسوء ولا تفشي سره ولا تضره بأي نوع من أنواع الضرر، حتى لو كان انفصالكم نهائي لا رجعة فيه وحتى لو أساء ليك هو، خليك مقدّر وممتن للحظات والمواقف الجميلة الجمعتكم وأنسى كل السيء منها.
اختلفت مع صديق مقرب ما تفشي سره ولا تعمل أي شي يمسه بسوء وخليك حافظ لمودته وعهوده.
استقلت من شركة ما تتكلم عنها بسوء بغرض تدميرها وتشويه سمعتها، قدّر اللحظات الجميلة حتى في العمل.
مشيت بلد معينة وأكرمتك ما تركز في الجوانب السيئة،خلي قلبك شغوف بالحسن والجمال وتجاهل القبيح عموماً.
#إحسان
19/ كن متعففاً خفيفاً على قلوب أحبابك ولا ترهقهم بما يعجزون عنهFB.
حاجة عارف الطرف التاني ما حيقدر يوفرها ليك ما تطلبها ولو طلبت ما تلح في طلبها..
مثلاً: أبوك/زوجك مستور الحال ما تطلب منه يشتري ليك شي غالي.
أمك/زوجتك مريضة أو تعبانة ما تطلب منها تطبخ حاجة مجهدة.
الطلب ما إلا مباشر بالمناسبة: حتى لو قلت نفسي في كدا وكدا قدامهم فدا يعتبر طلب واضح..
أصدقائك ما ترهقهم بطلبات ما بقدروا عليها..
ومن كمال الذوق كمان ما تنشر في السوشيل ميديا أو تعمل في حالاتك/ستورياتك حاجات عاجباك وتقول نفسي فيها.. دي تعتبر طلب برضو.
ومن أكتر الحاجات المؤلمة نظرة الزول لروحه لمن يحس بعجزه عن توفير احتياج زول بيحبه، ما تعيش أحبابك إحساس زي دا رجاءً 🙏
تعفف قدر المستطاع فذلك أكرم وأزكى لك وأوفر لكرامة أحبابك.
أغنانا الله وإياكم 🙏
#خفافا
20/ السخرية هي الملح الذي يجعل الطعام مُستساغاً، والمزاح هو الملاذ الذي نلجأ إليه لتهوين قسوة الواقعFB..
لكن لكل ذلك حد فتعلّم حدود المزاح ولا تتخطاها.
ما تهظر بيدك مع بت..
ما تهظر بجسمك عموماً..
الهظار مع الجنس الآخر عندو حدود وضوابط في الألفاظ والأفعال.. احترمها.
زول اتكلم معاك في موضوع جادي ما تحوله لهظار.
النظارات مافيها هظار ولو شلت نظارة زول ما تلمس العدسات.
ما تهظر مع الناس باحراجهم قدام الناس.
الأصل والقبيلة والوالدين والبلد مافيهم هظار
جملة "ما بترجع البلد تاني" دي برضو سخيفة ومستفزة وغير منطقية أصلاً، ممكن تكون منطقية لزول مشى باريس ولا واشنطن لكن السودان دا كله زي بعضه ياشباب.
ما تسخر من معاناة زول/مجموعة..(لو كنت منهم طبعا بتكون سخرية إيجابية للتهوين وكدا).
زول حكى ليك سر أو شي مضايقو إياك تشاغلو بيهو قدام الناس ولا تلمّح حتى.
في قعدات الشلل ما تخلّوا القعدة كلها مخصصة للسخرية من شخص واحد بس.
زول ما بتعرفه ما تظهر معاه كتير.
أستاذك/مديرك أو أي زول أكبر منك سناً أو مكانةً ما تبدأ الهظار معاه انت.
احترم الخصوصيات وقت المزاح وممكن نقول كنصيحة عامة قبل تهظر شوف هظارك دا حيلطّف الجو ويضحّك الناس بس ولا حيخلي آثار سلبية في نفوسهم؟ وقرر انت براك بعداك.
#خفافا