أزهري محمد علي/نحنا مافي ايدنا رصاص

قصيدة كتبها أزهري محمد علي ونشرها على صفحته على الفيسبوك بتاريخ 2018-12-30

النص

يااخي روق
اصلو صوت السلطة وسواس
وسترة تحت البدلة ظاهرة
 سترة من ذخة رصاص؟
سترة لي شنو
و نحن ما في ايدنا رصاص؟
نحن سالين الله سترة
سترة يا رب الخلاص
الزم الواطة روق
الحشود الفي الشوارع
ديل ولاد ناس
ديل نفوس والله طاهرة
و مافي بيناتا صعلوق
نحن حطمنا القيود
و انطلقنا علي البراحات
و تاني ما بحكمنا مطلوق
و نحن في ايدنا الصباحات
 البتشرق و التعشرق
 لي عدو الشعب العقوق
نحن في ايدنا القصاص
لليصعر خدو للناس
و ينتهك كل الحقوق
صنقع السما لو بتقدر
نحن في لفحي البروق
و دنقر الواطة بتشوفنا
حية بينات الشقوق
و برضو مافي ايدنا رصاص
الزم الواطة روق
دي المرارات التفور
فوق صدورنا و تغلي بركان
و تنطلق من الحلوق
و يا حلات البمبي بنبان
زاهي في شاشة الشروق
ترديهو السمحة فستان
و في بنات الثورة ما بحوق
و انت عامل فيها شيطان
قرمصيص السلطة ممحوق
و انت نايم ولا نعسان
الرقيص في الدارة ملحوق
عست عوسك سلطة سطة
و البعوس السم اليضوق
و نحن فعلا شعب اسطى
الا وقت الحارة لايوق
يوم يفج الواطة يمرق
بستشف وقت المروق
لا بترجعو بالشعارات
و لا بتحندكو بالعلوق
تاح تراح ارواحنا التروح
الله هو الشاريها من فوق
الله اكرمنا بالدين
و انت ذليت بيهو الخلوق
نحن نفلت من عقاربك
تلتهمنا مخالب السوق
قمنا شان نتعافى منك
تنطلق ساقيتنا و تسوق
تاتشرات النحس تنفك
في ترا الجزيرة واسوق
و اليقين يوم يقطع الشك
نبقى في العرش المروق
يا سلام يا علي المك
جيب معاك الليلة زروق
نسترد سودانا الزمان
من كلاب الجبهة مسروق
الدخل كوبر حبيس
و المشى القصر خازوق
انت اولى بيك لاهاي
و دمنا اولى بيهو العروق
الزم الواطة روق
و نحن مافي ايدنا رصاص