يوسف محي الدين/قصاصات
قصاصات أشعار ثوريّة كتبها يوسف محيي الدين.
النصوص
2019-01-08، بمناسبة موكب أمدرمان الأوّل الموعود في اليوم التالي:
يا البقعة أم لهيب جاني طيفك طايف
سقطت خلاص وسقط الشعار الزايف
يوم دق النحاس باكر يشوف الشايف
قيدومة النصُر في أم در أمان الخايف
أم در الأمان...... وأم در حقيبة فنّي
بي سيرتك زمان امّاتي بيك حجَّنّي
....يوم باكر بشوف الما بخيِّب ظنّي
الصقّار تحوم... ومهيرة فيكي تغنّي
فخر أم در قديم مو داب سرور وكرومة
تشهدبو الطوابي ويشهدبو شارع الدومة
قيدومة الخلاص..... يا البقعة باكر يومها
يتهنّا الخليل ........وعدوك تغلبو النومة
من ابروف بشوف جات العلايل.....يللا
من ود البصير..مكي..وسبيل خلف الله
باكر يا ام زمام........ ريقنا النشف يتبلّ
راكزين للدواس...... وكتين تفور الجُلّة
احتاج ميلادا جديدا..
وطنا مديدا..يجهل الآهات والاحزان
يعرف ما أريد
ساحة للنار..غارا ..معبدا..أنشودة للنصر
اني قد اتيت..
وكما ارتميت على طريق الروح..
قبالة الذات المجنحة الجموح..
بنيت من سعدي صروح..
ودعوت ..ثم دعوت أن يا نفس كوني لي وجاء من تباريح الطريق
فها أنا..
احتاج يرحل في شراييني الدعاش
2019-01-15، بمناسبة موكب الكلاكلة
الليلة ابكريق ........فوق الكلاكلة مكرِّج
البخمش عديل..... خَبَتيهو تب ما بصرِّج
حوِّد يا الخسيم في القيف اقيف متفرِّج
يا بلعك عديل..... يا جيت كمان متضرِّج