مستخدم:عبد الله جعفر/الزينة الرزينة

من Sudan Memory
اذهب إلى: تصفح، ابحث

"الزينة الرزينة" اسم أكنّي به عن شخصيّة ملهمة بالنسبة لي، أوحت لي بمئات الأبيات من الشعر، نشرتها على صفحتي في فيسبوك، ودارت حولها مساجلات طويلة، أعرضها في هذه الصفحة، مع التواريخ والوصلات للبوستات الأصليّة. أحاول قدر الإمكان نسخ كلّ الأبيات، مع الاسم الأوّل لصاحب كلّ مداخلة، ويمكن الرجوع للبوستات الأصليّة لمعرفة الشخصيّات المتداخلة.

المربّعات الأولى نشرت بهاشتاق #مسدار_الرفاق.

الزينة الرزينة شخصيّة حقيقيّة، وقد يأتي يومٌ للإفصاح عن اسمها؛ أمّا هذا اللقب فسببه المربّع الذي فتح الباب لجولات المساجلات.

2020-03-25

[١] عبد الله:

ما لقيت لي كلام يوصف بعزّك كيف

يا غيمة في سماي ضالّاني عزّ الصيف

يا نجمة شمال وكت الضلال والزيف

يا الخيرك بحر دفّق طلع في القيف

2020-04-09

[٢] عبد الله:

زي ما عهدي بيك مليانة طِيبة حنينة

إلّا وكت تغِبّي بتبقي ليّ ضنينة

لو دوزنتي روحك وان وزنتي رنينا

كنتي سمعتي آهة روح اخوك وأنينا

2020-05-06

[٣] عبد الله:

الدنيا بتلم .. لكن كمان فرتاقة

وتسيب الخلق بعد الفراق مشتاقة

إلاّ الفيس فتح بين القلوب نتّاقا

من لايكات ولَڤ لي مِنشنا ولي تاقا

2020-06-30

[٤] عبد الله:

ولتلك الصديقة التي تعرف نفسها أهدي هذه الأبيات:

شاحدك يا كريم خلّيها لي يا الله

أختي وصاحبتي ووالله ما بتتخلّى

حد ما قلت فيها الاقي وصفي أقلّ

احفظا يا كريم تتعلّى ما تتدلّى

[٥]:

إيّاكي البجيك في محنتي وبلواي

وليك برتاح وبحكي بْفرحتي وشكواي

في وجودك بلاقي طفل صغير جوّاي

وفي غيابك بكون في ذكرتك سلواي

مناسبة إهداء هذه الأبيات في هذا اليوم هي حوار دار قبل عام، يوم مليونيّة 30 يونيو المشهودة.


2020-12-03

[٦] عبد الله:

بسكت لمّا ألقاك ما بلاقي كلام

غير مشتاق، مراحب، كلمتين، وسلام

الّا بحس بقلبي اتعبّا خير وسلام

أمّا عن المحبّة .. يعلم العلّام!

2020-12-04

[٧] عبد الله:

حتّى بدون كلام صوتي وكلامك واصل

امّا تقولي لي سامعاكَ كمّل واصل

انتي تحضّري المسرح وامثّل فاصل

اسرح واحكي ليك، وبراكِ عارفة الحاصل

[٨]:

.. ما تشوفي شر، قط، ما تَجيكِ الحبّة

ربّنا يحفظك ويسبغ عليكِ محبّة

ويكمّل علي عقلك ويزيدك حبّة

شان تدّي الحنان بدل الحقن بالحبّة

2020-12-08

[٩] عبد الله:

ما شا الله عليك، زينة ورزانة وهيبة

يا بتّ الأصول، ستّ الفهم، يا طيبة

ربّنا يحفظك مكسيّة عافية وطيبة

ويحقّق مرادك .. والأماني الطيبة


جولة أمنية

بتعليق كتبته ردّا على هذا المربّع، افتتحت أمنية عزّ الدين جولة طويلة من السجال، جمعتها في بوست منفصل


[١٠] أمنية:

أكيد حاقاهو شكرك و مستحقة كلامك

و حتما هي ذوق شان حركت اقلامك

تحرك يا كيوبيد و ارمي لينا سهامك

بعد اللطف و الذكا نشهد عليهو هيامك


[١١] عبد الله:

البيناتنا أكبر من كيوبيد وسهمو

واعظم من خيال البالجمال بتوهموا

وابعد من منال البالغرام بتّهموا

واعمق من طلاسم مستحيل يتفهموا

[١٢] أمنية:

حاشاهو الغرام ما كان هو في يوم تهمة

وشن طعمو الجمال و الناس هي ما منسجمة

الباقية بتكون كان اصلو ليك منقسمة

مجرد امنيات ماف داعي ليها الهجمة

[١٣] عبد الله:

ماني البنخلع، والله، ما مهجوم

وماني البتعصر، ويقلب دفاعو هجوم

وماني البالغرام تشهد عليه نجوم

بس بكتب بعبّر ما بقيف موجوم

[١٤] حاتم:

شن طعم الكتابة غير في ام قواما فاير

و من الفيها ما بتزح إن كان يزح الداير

يا عبد الله نضمك احسن تتموا دواير

لو مابتتهجم ومن غرامها دمك فاير

[١٥] عبد الله:

ما مفتون قواما ولا وِجَيها الناير

إلا بحب ملاك قدّامو واقف حاير

انسانا فريد انا غير رضاو ما داير

الذوق والفهم دوّب كياني عصاير

[١٦] أمنية:

كان ما اخاف اكضب النجوم حامداااكا

النكر العشق قبلك تراهو هدااكا

ماني موصفاهو بتشوفو انت براكا

غايتو منايا ليك الخير دوام يبراكا


[١٧] عبد الله:

ما ناكر العشق .. بس فارزو في تفريزي

ما حب روميو بل زي رومي والتبريزي

ما مشروط بشَي؛ بلقاه فيني غريزي

ساكن روحي جوّة ف نسجتي وتطريزي

عبد الله: رايكم شنو في المربّع الأخير؟

أمنية: المربع الأخير أنا عاوزة أعمل فيهو دبل لايك 🤩

بدر: البيت الاخير جميل جدا لكن جوة بتدي احساس النسيج بس التطريز خارجي فما في داعي ليها؛ وانتا يا اخوي وكت جيت درب العرفان خلي جوة وبرا دي كلو واحد؛ تحياتي.

سليمان: "ساكن روحي متلبب نسيج تطريزي"؛ عشان "ف نسيج" لغة اهل الخرطوم 😂😂؛

وإنت المبدع سابق عميق تفكيرنا

سيد النمة حردلونا إنت عُكيرنا

نرار أبو الحسن: المربع جميل يا عبدالله ، و انك تدخل جلال الدين الرومي وشمس التبريزي (رموز المحبه) فيهو ادتو ابعاد اجمل. تحفظي علي الكلمات اللي لازم نقراها بي طريقه محدده عشان الوزن يظبط؛ زي (بشي) اللي هي كانت (بي شي)؛ و (ف نسجتي) اللي هي كانت (في نسجتي). انا رايي انو الحاجه دي نتحاشاها لو امكن لانها بتصعب قراية النص للناس التانيين ، طبعا لي صاحبو مابيكون في اشكال. استمتعت جدا بي حوار المربعات الجميل ده خاصة مربعات.


[١٨]

حامداني النجوم؟! قولي النجوم حاسداكا

في قمري البضويّ وملكتي الكنداكة

دي الاعيت لسان الفُصحا والرنداكة

ما سايل بلاها ف ديكْ وديكَ وداكَ

😌😌😌

[١٩] حاتم:

ياكا العاقل الما بتغشك زايلة

وما بتننجر ورا ام بدرتا كايلة

سمي الضامرا ونحنا بنعدل المايلة

ما تخاف "الشلب" خلي الغتاتة الهايلة 😀

[٢٠] عبد الله:

القص والشلِب ديل في الهوى المشروط

ما في حب سرف خلّى القلب مشروط

مكتوب في الأزل جوّة العضم مخروط

هي البؤرة وبمثّل مقطع المخروط

[٢١] أمنية:

وصفت الغرام بالسنتي ملي و بوصة

و حالتك قلت ماها (علاقتن) مخصوصة

دحين يا صاحب الحق نفسك المحروسة

باقيلي خلاااس محروستك مقروصة 🙊

[٢٢] عبد الله:

وصّفت الجمال في البالكرم مخصوصة

وصّفت القليل من صفحتا المنصوصة

في سفر الكرام مكتملة ما مقصوصة

من جات سيرتا جاتني الحروف مرصوصة

[٢٣] حاتم:

انضم فيها بالشعر الفصيح وابكيلا

وجر النم علي ست الضفاير احكيلا

اسال مجرب كاتلاهو العيونا كحيلة

ااااه من خشيما و عجوة القنديلا

🙈🙈 استغفر الله العظيم 😂


[٢٤] عبد الله:

شين همّاني بالراسمالا جيد وضفيرة

جنب ستّ الفهم، والحكمة ليها سفيرة

والحب والكرم والطيبة مالية حفيرا

دي الجنّة ام قصُر وانا باقي ليها غفيرا

[٢٥] حاتم:

راسمالا مو بس جيدا وبسيما اللامع

ولا رمان صديرا و القوام الفادع

دين وعقل تحلف هي الامام الشافع

بس من غشامتك ما قريت للرافع

[٢٦] عبد الله:

ما بطرا الجمال، وان كان جمالا براهُ

وصلت حدّو ما خلّت لغيرا وراهُ

والدين في سكات ما دايرة حدّ يراهُ

والاصل الاصيل، دا الهيلا، ما بطراه


[٢٧] حسام:

مرات دون سبب تلقاها جات في البال

تتكشم براك زي سرحة الجوال

تقول اكتبلها و اشجيها بي الاشعار

تطلع تلات كلمات: كيفكم و كيف الحال 😂

فيما يبدو في إشارة لمربّع #2020-12-03


[٢٨] حسام:

قولك صح مناسب ترعة وقابلت تربال

مابين بحة لهيجا وصفقة الخلخال

دا الخلاني شارد زي طلب ترحال

بين مسكول غراما ورنة الجوال

[٢٩] عبد الله:

"جات في البال" دي ما للاصلو ساكن بالك

الراعيكَ بي حنّيتو ما بيابالك

البسند قفاك، رابط عليه حبالك

الدايما معاكَ، وديمة ليك؛ عقبالك!

[٣٠] عمر:

ابشر ياعُبَدْ قولك سمح مهضوم

بندول صفحتك بعدل مزاجنا عموم

دوتي نغشاك ننبهر وبناخد المعلوم

يانافذ الفكر تفخر بك جدة والخرتوم

[٣١]

مابدور انجر علا الغرام فيك باين

رصيت العشق طوبك مكن وكماين

دا الخلاك تنشد تدوبي يا انشتاين

ادينا الشمار قبال نفتو مكاين

[٣٢] عبد الله:

ادّيك الشمار، طوّالي، واعمل شير

بحكيلك حكاية الملكة ستّ الخير

السمحة الأصيلة الفايضة طيبة وcare

البتضحّي بي روحا وبتدّي الغير

[٣٣] سليمان:

تمو شمارك ادينا الاسم يا بير

اسمها تقوى وللا سلافة وللا عبير


[٣٤] عمر:

اصلا من زمن عاديك مفتاح خير

في عز النضال ياعز نضالك غير

يوم فرحك يجي بركز واكمل البشير

صقرية بعرضلك واغنيلك الخدير



[٣٥] مهنّد:

أسمعوا يا صحاب الليلة عندي قصيدة

بطرب لي سماعا وقافيتا وترديدا

السبب العلي خلاني داااايما أعيدا

هايم قلبي مكتول في عيون الصيدة

مفتون بي جمالها ياخي فتنة شديدة

وبي نظرات عيونها الشايلة رقة وريدة

غرقان أنا يا رفاق غرقا بلا تحديدا

محكوم في غراما بي سجن تأبيدة

[٣٦] عمر:

ماك وحدك متوك ياصديق بالريدة

ممكونين كتاااار ومردمين طرق وعصيدة

صرح ساي العشق مابدورلو زول تلبيدة

من تنضم براااك ويلفاك سوط فوق للحبال ومسيدا

[٣٧] مهنّد:

صادق يا رفيق الريد ضحاياو كتروا

غرقوا في طريقو و في فيافيو ودروا

في عشق البنات طار العقل من ذكرو

مفتون بالمحاسن لامن يلازم قبرو

[٣٨] عمر:

الضحايا كتاااار جوا الفريق والغابة

جواهم لهيب فوق القلوب تقابة

يلسع في الحشى زي لسعة الدنقابا

دا الخلا الخلوق ديك ركبت الكركابا



أم عبّودي: اقطع ليكم الشعر الجميل دا و اطلب منكم تدعوا لي بالشفاء.. فرقتوا علي كنت مدبرسة.


[٣٩] عمر:

يغشاك بالشفاء ربي الكريم بالرحمة

ويديك من النعيم لي حد رضاك والزحمة

نسمع بك نصييحة وصوتك يجيب اللخمة

فرحانين عيالك يضربو في الطبيخ واللحمة

[٤٠] مهنّد:

كفارة وسلامتك من كل كربة وشينة

تصبحي بالعوافي مليانة صحة و دينا

تكرمي للضيوف و تخدمي يمة ونينا

يارب يا كريم تشفيها هي وتشفينا



[٤١] علي:

يا ناكر العشق صرحبو لي معشوقك

ما تعلم قلبك الهد باكر يقول وا شوقك

عديل امشيلو والفاها بيعة سوقك

كلها كمها باكر تفوت وينجر واسوقك

[٤٢] عبد الله:

ما بنكر غرام إنسانة بيها بفاخر

اتملا قلبي بيها وبي محبّتا ذاخر

الّا من الشمار بلقاني بضحك ساخر

البيناتنا "ريدْة اطفال"! اجيك من آخر

[٤٣] علي:

غرام وريدة أطفال يا صاحبي ما بتفرقن

املا قلبك بالهوى وبالغرام اتيقن

بوح بي مشاعرك خلي كلماتك يمرقن

كليمات الريد وكتين يكتموهن بحرقن

[٤٤] عبد الله:

ما كاتم، بقول، واكتب، تراني، واصرّح

أصلو الريد بدايتو بكون خفيف وبفرّح

إلّا وكت يزيد تلقاه ببدا يجرّح

أمّا لمن يفيض بفصد عديل وبشرّح



[٤٥] مصطفى:

من وصف الغرام الليلة نحن شبعنا

و أمنية طن دهب بغناها نحن طربنا


[٤٦] نزار:

من تالا الصحاب جاتنا المحبه اكيده

والناس الحنان شايلين (صداقه) و ريده

ديل نوار عيونا وبهجتها وتغريدا

يسلموا كلهم صاحبات حياتنا وعيدا



[٤٧] علي:

حاقاهو الشكر واستاهلت كل حرفو

ست الذوق شبه الخدار في جرفو

فيها عطرا خلا الخلايق يكرفو

الفزعة آآ ناس... ناس عبد الله ما ينحرفو

[٤٨] عبد الله:

بتعزّ الصديق وتقيف معاو في ظرفو

وتراعي البعيد والحتّى ما بتعرفو

معدنا جد أصيل في التبر كانت صرفو

شوف بس وصفي ليها الناس تكيل وتغرفو!

[٤٩] علي:

بت عز معززة وفي البنوت سموها عزيزة

تفقد للقريب... وللبعيد ما اتفقد تركيزا

بعد المسافة مو هاميها حتى لو بي فيزا

تلقاها جمبك حتى ان رحلت الجيزة

[٥٠] عبد الله:

بنسج في الحروف والغيها مرّة واجيزا

أعيت كل قصايدي وكمّلت تعجيزا

بس خلّيني اقولّك في عبارة وجيزة

في أعجب بنات بتساوي هرم الجيزة


[٥١] إيمان:

يا ها الزينة وزينة الخلا القدالة

راجح عقلها الخلاك تشيد بو مقالها

(طفلة) ريدك و (الوقار) كساها الهامة

ردتها يا العبيد و الريدة جد عزالة

غالبا "الهامة" كانت "الهالة"، خطأ مطبعي.


[٥٢] عبد الله:

حافّيها الوقار حَوَلينا بتشوف هالة

حابّيها الجميع، اتراب كبار وجهالة

تسمع لي كلامك باهتمام ومهالة

قدّام حكمتا، بلقاني كلّي جهالة



[٥٣] عبد الرحيم:

الخلت عيونا الغمده مابتشوفه

لينه مفدعه وايضا تلاته حروفه

لجيج اللؤلؤ اليمني وحرير الكوفه

تتفوق عليهْ الجابت الملوك مكسوفة


[٥٤] سليمان

هذي الحرّكت شجنك ؤجابت زيتك

تستاهل تكون يا بيري ملكة بيتك

بس يا تومي من فضلك رجاءً اريتك

ما تحرمنا من شنَّك ؤوصلة خيتك

2020-12-09

[٥٥] محمّد فتّاح

القلب ان عشق صدقني اجلو قريب

وجعجيع الكلام ما بدسدس الجقليب

اركز للسهر والجرسة واللهليب

والصقر ان وقع كتر البتابت عيب

[٥٦] عبد الله:

ما عارف البكون عاد ما علمت الغيب

إلا الجرسة مااظن تبقى بعد الشيب

ما تتعب كتير بين زرزرة وهنضيب

ما بخجل أحب إنسانة خاتية العيب

جولة عشاري

افتتح عشاري جولة جديدة من السجال بالرد في تعليق على مربّع الأمس، جاءت بنكهة مختلفة، جمعتها في بوست منفصل

[٥٧] عشاري:

عبد الله الفصيح الليلة جد بتلو لو

وكلامكم صريح لكن كلامو ملو لو

هيمان للكتاش بالحب قليبو مشوشو

نادوها المطافي بالموية تعمل شوو 😆

عبد المجيد: "بالموية تعمل شو شو" مش كدا اظبط 😎

عشاري:

الموية البتطفي كتيرة ما مقطوعة

والوزنة الصحيحة مابتنجد الموجوعة

عبّاس: لولوة شديدة بس حلوة هههههها

عبد الرحمن: بالنسبة ل عمر (البنا) عشاري وكده 😂👍


[٥٨] عبد المجيد لعشاري:

عجبنا نضمك يا حبيب سويتو

ووزنك للكلام زي العقد رصيتو

يا ود العشاري كلامي ليك نميتو

والما عاجبو قولك نحن بنطلع زيتو 😁

[٥٩] عبد الله 👀:

جاييك يا عشاري شويّة وافضاليكا

[٦٠] أمنية:

عاد يا ود عشاري كلامك ات ماك قدرو

الدكتور مرتب و قصدو هو البيخبرو

راسي و ضو قبيلة و بي جلالة قدرو

اصبروا ياخي يمكن (منّو) تطلع قدرو 🙊

[٦١]

قال ليك جاي عليكَ وهسّه موفاضيلك

وطبعا انت عارفو و ما بتدور احكيلك

اوعك تنبهر او يعجبك تهليلك

و اسمع من صليح جهز عديل منديلك 🙈

[٦٢] عشاري 😌:

خليهو اليجي ويجيب كديستو معاهو

نحن الدواس خابرين طريق ممشاهو

عبد الله الصديق لو جانا مابناباهو

عبد الله العدو جبخانة تب نملاهو

[٦٣] أمنية:

روحك يا عمر عليكا ذاد تحريقا

يا ولدي المشاكل اخيرلك اختي طريقا

غايتو ان كان بقت عرفتنا بيكا لصيقة

ما كنا بنسيبك لي معجباتو (حريقة)

[٦٤] عشاري:

البال الطويل والله نحن اسيادو

والصبر الجميل لو زول انحن احفادو

لكن ياجماعة تحذيري ما تتمادو

بنشوف الشر عديل وندق خيم في قصادو

[٦٥] أمنية:

و داك مو زول دواس او حجة او كبسيبة

خليهو في حياتو اناقتها و ترتيبها

واسيهن حروفك قعدن في عليبة

او نتصدر ليه مارقين للتلاف و الريبة 😂😂

[٦٦] محمّد احمد:

راجين الفصيح نسمع نشوف شن فهمو

بتلولو صحى! و وارد كلامكم قهمو

إلا تقول على كملت كنانتو و سهمو

ما غلطان كمان كان ود عشارى اتهمو

[٦٧] ياسر:

زي خيمة الجماعة يوم الجريمة اياها

احسن تجمعها قبل عبد الله يطاها

عشان ما تبقى قصة زي ود دكين وطه

خليك في الجميلة اليومي زايده بهاها

[٦٨] عشاري:

واعدنا انو يجينا لكن بكون بهناك

اصلو البحب ياناس في لحظة بس بنساك



عبد الله: يوسف، نوراني، سليمان، بدر، عمّار، البنّا، سميرة، جرّوا بنابركم، الشغل دا جامد 😹

محمّد احمد: هههههههه؛ تاقيت الخلق من اليمن للشام!

[٦٩] عبد الله:

عبد الله ان كتب في الغالية ما بتّأتأ

وبجيب الحروف متل الدرر تتلألأ

ان قالت بنَكْتب، وان هي قالت لأ، لأ!

الا بشوف عشاري الحاني راسو وطأطأ

[٧٠]

عبد الله الكلس حاشاه ما بتكبكب

الكمّل حوامة الجامعة ما بتضبضب

الشايل التقيل شات الملاحق صب صب

قال ليهن كدي، وباصاها رب رب رب رب

[٧١]

قلتا كلامي واضح ما عملتو مغتغت

انساب بارتياح لا فيو نشاز لا رترت

الهيمان بكون، شدّة قليبو مفتفت

يتراجف براه، ضارباه حمّى وكتكت

[٧٢]

آ عبد المجيد حاشانا ما بنتمجمج

ما متل العشاري ان شافلو خدّا وجوج

اتلخبت كلامو ودمعو سايل طج طج

اتكايت وقع دقّ الارض واتّجتج

[٧٣]

شكرا أمنية وفعلا كلامك جد جد

القول في الرزينة الزينة قلتو مهدهد

إلّا بشوف عشاري كلامو كلّو مشدشد

قايلو ركن نقاش الود خلآص قد قد

[٧٤]

مرحب، حُمّداحمد؛ جايي ما بتجرجر

من القلتو شيل موية ملح واتغرغر

مليانة الكنانة، وما أنا البتزرزر

امّا نشوف عشاري خبارو ساكت فرفر



[٧٥] أمنية:

عاد جيهتو تب و يستاهل اصلو الجيهة

اتفاصح شدييييد و ما تركلنا جيهة

ما جايباني لي قولة النصيحة نديهة

و ما بشكرلي زول بي حاجة مو حاقيها

[٧٦] عبد الله:

أثبت يا عشاري استنّى ما تتزحزح

اركز للبطان الجايي لا تتوحوح

استجدي القوافي الليلة عاد واتلحلح

اغمز للشباب كان اتعصرتا اتنحنح

[٧٧] أمنية:

غايتو الليلة صاحبك الجاتو بس تختاهو

نان كلمناه ياخ عبدالله ما ترجاهو

لقي الساحات فضت فاكر رقبتو براااهو

جاهو الليلة عاد سما يوازي غداهو

[٧٨] عبد الله لعشاري:

بالك كان طويل بنظبّطو وبتمخمخ

وان صبرك جميل الليلة ما يترخرخ

خيمتك .. لمّها؛ شايف عمودا اتلخلخ

ارسالك بشوفو الليلة طشّ وشخشخ

[٧٩] أمنية:

غايتو اهبشو زولكم شايفة عرقو النقط

واتبنوه فيهو روح ما يبقي برضها رقت

الزول يمشي للدابي و عقب يتلفت

ما عاجبنا ليك سيد (الرتينة) البقت 😂

[٨٠] عبد الله:

نستمتع شويّة الزول زمن ما قزقز

اسّة الزول دا وين؟ نادوه كان بتلزلز

يمكن فوقو روح هسّع بقوم اتهزهز

الّا وكت يقوم ليو ريش عقب بتجزجز



[٨١] يوسف:

مرحبتين حباب عبد الله، مَنّو عشاري

بالنم السمح هيجتو لي اوتاري

جاييكم بَدور بينكم أجُر مسداري

في الخلّني طاشي ويوت بنقِّر طاري

[٨٢] عبد الله:

شيخ يوسف حكولك باللبت واتدسدس

الرمّى الكلام لي حُمّداحمد وسوس

اتلمّوا الخلق، والليل مليّل عسعس

قالوا عليهُ نم، لكنّو شيتا لسلس

[٨٣]

انساك من كلام شمشار وواحد كشكش

احكيلك حكاية الريدا خيّم عشعش

الخيرا بيَعُم متل النسيم الوشوش

النارا بتضو ليلك بدون تتّشتش



[٨٤] عبد الله:

يا عمر العشاري الحق تبيّن حصحص

الامر انجلى وحسّة الكلام اترصرص

انساه الشمار ناس داك جكّس وقصقص

استمتع معاي بي قصّة ما بتقصقص

[٨٥]

استغفر دحين واتوضّى قوم اتمضمض

احكيلك حكاية اليوم اجيها مرضرض

الناس شاوية لحمي ورامية عضمي معضعض

اوّل زول بجيهُ وقلبي ببكي وفضفض

[٨٦]

مرّات ما بركّز، نوع كلامي مفطفط

أوقات تانية بسهب، والكلام يتمطمط

أحيانا تقيلة شْكاتي تنزل رط رط

أبدا ما تكشّر أو تقاطع، قط، قط



[٨٧] عشاري:

ياعبد الله هوي في الواطة خت الكورة

نكرانك كتر والسمحة ما منكورة

ياخ ماتحب ست البنات، الحلوة والامورة

لو انت لسة مجهجه ، احتمال هي حاسمة امورا؟

[٨٨] عبد الله:

ما ناكر، بريدا، وروحي تب مأسورة

دي البتطب جرح روحي وتداوي كسورا

وانا جارا الامين الما بطفّر سورا

والباراك عاد بتركّبو الماسورة!



[٨٩] يوسف:

يا عبد الله روق نارك ملهلبة شاوية

خليت العشاري يضوق قنابلاً داوية

إن نصحك دحين .. تقوم تعَصْرو ف زاوية؟

حاشاهو العوج عمر اب رتينتن ضاوية

[٩٠] عبد الله:

إت ما شفتو بس جاب السلوك والكاوية

يلحم في القصص، من راسو، عامل راوية

في شان الحنينة الللفضايل حاوية

زي منعم طلس،، الناس دي ساكت غاوية



[٩١] محمّد احمد:

عبدالله الفصيح فى قلبى ليه مكانة

وعبدالله اْن فسل كان لكنا إسمو لبانة

ما اظن من عمر الشغلة فيها مهانة

بس دايرك بكون تقرى السلام ل فلانة

[٩٢] عبد الله:

ما بنابى السلام، لكن زميلك جعجع

اتفاصح قبيل، طوّل لسانو ولعلع

الا سمع نضم خلاهو ليك اتضعضع

الزول انضرب في راسو لامن شعشع



[٩٣] عبد الله:

ما بنكر بريدة، عِلّا مااظن دورة

داير ليها ود جنتل يكون من دورا

دوري زي الابو، الناس دي تتقن دورا

ما ينفع تبدّل تنقا بي كندورة

[٩٤] أمنية:

عاد بالغت في التشبيه دي ذاتا اشارة

شن جاب الشبه نوارة لي عوارة

شاور الزولة يمكن جدّها في هظارها

الا تقول عديل ما شايفة تاني دبارة



[٩٥] عشاري:

انا شدة ما سرحت وخيالي عد بعيد

اظن عبد الله عرسو ياناس قبايل عيد

في الحلبة اهلو يغنو وعريسنا راضي سعيد

في طريقو لي ماليزيا وشابكنا مافي جديد

[٩٦] عبد الله:

شكرا يا عشاري، حنوْقف التصعيد

ونشرح بي رواقة وتاني مافي وعيد

داير ليها دورا بقولا تاني واعيد

لا تكون عن يميني وعن شمالي قعيد



[٩٧] أمنية لعشاري:

باقيلي أخير اربط كفاحي معاكا

ما بتتجاري ياخ و لسانك اتبراكا

و في الشايفاهو اظن ما بيخسر الباراكا

و العجب ان بقت زولتك كمان حناكة

[٩٨] عشاري:

يامنو انت ذكية وشاطرة في التحليل

شايليها جاي بجاي تلقيها مابتشيل

صاحبنا راقد رز وامورو واضحة عديل

بالنسبة لي مفهوومة مادايرة اي دليل

[٩٩] عبد الله لأمنية:

هوي يا منّو هوي .. بالله ما تختي

ما زولة حنك، طبّظتي، لبّختي

الله ادّاني زولة بريدا زي اختي

وُجد فرحانة بي، تحكي وتقول بختي

[١٠٠] أمنية:

يا يابا الحنك ما اظنو سبة شتيمة

بل هو دليل لطافة و روح محبة هميمة

غايتو بقت عليك قصصا كتيرة قديمة

ما داير تريد لا دار تكون في تيما

[١٠١] عبد الله:

إياني البريد ومعاها عامل تيم

لمّا الدنيا تكتم ويكتر التعتيم

ولمّا الناس تفارق والقى روحي يتيم

ريدا وربدي ليها مختّمات تختيم



[١٠٢] محمّد احمد:

عبدالله الكلام كترت نظمو و وزنو

دايرين بالعديل نعرف بتفتل فى شنو

فى كوشة العديل شيبك هداك شايفنو

سيبك من عمر انا باكر بحلك منو

[١٠٣] عبد الله:

كيف ما اكتّروا .. في منبع الإلهام

المن غيرا ما بعرف لِيْ شيتا هام

الشمس المنيرة الجلّت الأفهام

والكعبة البِطوف انا قلبي بيها وهام



[١٠٤] عشاري:

نحن الصداقة بنعرفها وبنعرف نقول ياصديقة

والبت البتهبش جوة القليب ، والبت الحديقة

والبت الكمان بتحول الزمن الكتير لدقيقة

وحتى البنات الحولن كل المكان "لحريقة"

[١٠٥] عبد الله:

يا عمر العشاري اخوك بطنو غريقة

ما تسك الشمار صدّقني مافي طريقة

لا بتشمّو قدحة ولا في بلّة ريقة

ما تحاول معاي، قايلني أصلو "حريقة"؟



[١٠٦] سماح:

ماقادر يبوح غلبو صديقنا يصرّح

خلوهو يخوانّا ينم نَظِمْ ويلمّح

في ست البنات أم طبعاً جميل وسميّح

خوفو يقول نعم والناس هي ما بتريّح

[١٠٧] عبد الله:

القول الصريح أنا قلتو ما إلماح

لا خايف عواذل لا سيوف ورماح

طول ما السمحة راضية ومديّانا سماح

لا بسأل عشاري ولا برُد لسماح

[١٠٨] سماح:

عبدالله ياخ برّاحة أنا ما عمر جعجاع

نَم دوبيت نظِم ما عندي فيهن باع

إشراقة بس وشلاقة لا ليها إيد لا كراع

خفف ضغطك شوية لا تسمع الواع واع 😭

[١٠٩] عبد الله:

البارى الشمارة ولي فضولو انصاع

الياخد النصيب اْن سامحوهْ، وِاْن صاع

يا الشايقيّة عاد شايقي وبرد الصاع

وفي طول اللسان خابراني كيف رصّاع

[١١٠] سماح لعبد الله:

حبيت حواركم جدا .. جرّاني عالم النم

تاريهو بحرا هايج .. في عمقه ألف قدم

وقّف خلاص تصعيدك.. للطفك أتوسّم

حقو النقيف لا غادي.. كفى يا سماح زم زم 😔



حسام المقبول: هو كلام ساي؟ اقسم بالله ماخد ٦ صفر 😁😁

[١١١] عبد الله:

اتلوّمت جد، بالغت يا المقبول

مين اتطقّ ستّة؟ قول كلام مقبول

نحن اْسيادا ياخ فينا الشعر مجبول

ما زي ناس مشاكس داك بتاع كعبول



[١١٢] عبد الله:

داخرك للزمن في عترتي ومسعايَ

في الدرب الصعب دايرك تكوني معايَ

بعرف وقفتك يا "فلانة" ماها دعاية

مهتمّة بأخوكِ وتشمليه رعاية

أمنية: محبة تبغر و تشهيك في الاصحاب ⁦♥️



[١١٣] عبّاس:

أكان ميرود عشق وإن خوة ساي إحساسو

استمتعنا بالنم الجميل من ناسو

الزول إن كتل أدوهو كفنو مقاسو

والراس أب عيون حتما بعرفو خلاصو

[١١٤] عبد الله:

الريد من بعيد الناس بشيلا حماسو

عِلاّ سلوكو عريانة وبِضُرْبك ماسو

تلقى الزول ضرب أسداسو في أخماسو

إلّا البِخْبَرو وبصبر بفوز بي ماسو



[١١٥] عزّة:

شوقت الخلوق يعرفوها ما يحسدوها

وبغرت الصحاب زي صحبتا يلاقوها

يابخت البنية ودي الريده ما بكوسوها

تدخل في القلوب وبالحن دوام يراعوها

[١١٦] عبد الله:

كان شفتيها كيف يا عزّة لسّة غريرة

بتعزّ الصداقة وبي أخوها بريرة

الناس شايلة غيرة وفيها روح شرّيرة

والسمحة بتسامح، شايلة أنقى سريرة

[١١٧] عزّة:

لساهو الزمان لقليبا يوم ما كدر

والدنيا في عيونا زاهية باهية وانضر

ونعمت بيك كمان صاحب ياود جعفر

انا بدعوه الكريم وجيها يوم ما يبسر

[١١٨] عبد الله:

أبداً، بل كتير في الدنيا ضاقت مُر

الّا صبورة بس والله حاملة الضُر

لا يوم اشتكت ولا حتّى مرّة تصُر

ان شفتيها بس يا عزّة قولك: كُر



[١١٩] عمّار:

عبدالله هوي اركز وخلي الجرسة

مي هولك الرجفة ام شراد، لا الفنسة

اسمع قول عمر اوعاكا لا تقول لسة

الريدة العديل لا بتخفى لا بتندسّا

[١٢٠] عبد الله:

هه؛ قال رجفة قال؛ دا منو الرجف واتجرّس؟

إحن الفي الثبات وقفتنا عاد تتدرّس

الريد العديل بنخوضو ما بنتضرّس

الا حرمنا محمي وسر هوانا مترّس



[١٢١] عبّاس:

الناس يا أبو عابدة غتيتة ديمة تضاري

وبدسوا العواطف كان صديق كان حاري!

الخلانا لهفانين ننم ونجاري؛

دا الظن الكعب، سواها فيك عشاري

[١٢٢] عبد الله:

ما داسّي المحبّة وبيها دوما بجهر

الريد الجميل والخوّة احسن تظهر

البيناتنا زي ريدة الملايكة، وأطهر

ان شفتوها بس، والله حاجة بتبهر



[١٢٣] عمّار لأمنية:

زولك في العلم أول وماهو التاني

وزولك إن نَظَم ببدع قصيد ومعاني

لكن في العشق نكاااار بـ "لالا" و "ماني"

خايفين إن جفل (أمنيتو) تبقى أماني

[١٢٤] عبد الله:

هه؛ مين النكر؟ خلّيني اْعيدلك تاني

يمكن تقتنع يا اخونا كان تختاني

بتريدني وبريدا، جنّتي وبستاني

لا ناكر كلام، لا لاوي قول، لا تاني



[١٢٥] أمنية:

يمكن صح كلامك و بكره تلقي نديدا

لكن ما اظنو يريدا زي ها الريدة

الثانية البتمشي انحنا ما بنعيدا

و ازمان الغرام قاسوها بالتنهيدة

[١٢٦]

لا مديها فرقة و لا كلامك ايزي

ووازن ليها عرفتكم مع التبريزي

في كل بيت شعر (اخوك) لفظ تعجيزي

اكتل حيلك يمكن docta تبقي عزيزي

[١٢٧]

و ليه قايل الغرام هو بعيد من إحساس خوة

ما تكتر متاريسك تزيد الهوة

القلم ان كتب ليك ألف مرة أخوة

اصلك ما بتعرف الفي القليب من جوة

[١٢٨]

حنييينة و بت اصول خابراك بتعرف واجبك

و هي العين العليها امانة قايم حاجبك

ما بتقدر تقول لا تكلمك لا تكاتبك

بادر انت ياخ ما توفر اصلو العاجبك

[١٢٩] عبد الله:

أبداً، ما بتدس، بيناتنا كلّ صراحة

دي البتطبّني، وبداوي ليها جراحا

لما اكون معاها بلاقي كلّ الراحة

وامّا تكون معايا بتلقى كلّ براحا

[١٣٠]

خلّيها التحاول في الولاد وتجرّب

وتوازن براها المعطيات وتضرّب

انا بسند قفاها ومرّة مرّة بقرّب

ادّيها النُصُح وافتح عيونا وادرّب

[١٣١] أمنية:

كلام ما بيتأبي بس غير الترتيب

و حقق للسند بي انو تبقي قريب

غايتو أنا كان علي ماف داعي للتجريب

مافيش احلي من صاحب و يبقي حبيب

[١٣٢]

وياك مين تسند العاطلة و تعدل الميل

و كان وزن او حساب .. مقفلن تقفيل

تجربة المجرب حاجة مرة عديل

احسم امرك هسه و ما تحرس الليل

[١٣٣] عبد الله:

صادق في وفاي واخلاصي ليها عجيب

الدايراه هي، واحنا العلينا نجيب

إن دارت صديق تلقاني وافي نجيب

وان دارت حبيب، بسمع كلاما واجيب



[١٣٤] عزّة:

وتاني شنو الفضل للريدة من تأسيسا

الحب والصراح والراحة ليها حثيثا

كنت دواها يود ويود هي ليك جليسا

بقول دي ست البنات وانت ليها عريسا

[١٣٥]

كر تتقال للما ليه في يوم صاحب

ما ضاق العشق وبيه اصبح شاحب

كر يا ناس دا قليبو لسه بي حاجب

ما عرف الهوى ولا الروح كمان بتخاطب

[١٣٦]

عاد يا امنية دا بخت البنية وجاها

فرحنا من الصباح ودايرين نقول بشراها

الحب الوفي ومخلص دوام يبراها

الصاحب الحبيب ياهو السعد ولقاها



[١٣٧] محمّد احمد:

عبد الله الوفى ترا الليلة وضح حالو

ان دايرة الصداقة اصلا ده ياهو مجالو

وإن كايسة المحبة فى الحال بكمل مالو

الله يديم و يتمم بس اطرونا قولو تعالو



[١٣٨] صلاح أبروف:

شايف الخلوق سايقين عليكا ملامة

في شان اللحاظ دارت عليكا سهاما

سيبك منهم و ارشف سلاف في غراما

و كيتا في التباعد خمسوا الكمامة

[١٣٩] عشاري:

اب روف العجيب خالف كلام الصحة

في شان الحبيب لابخاف فتر لا قحة

[١٤٠] أبروف:

يا عشاري الصديق شايف نباهك شحا

ماك سامع هسيسا و فاتك فعايل البحة؟

كان ما تم المراد و عارض هواي انزحا

برزح فوق جمر و بلعن ابوها الصحة



[١٤١] علي ميرغني:

يا عبد الله خوي شيتك دا ما فاهمنو

كان ريد كان غرام أحسن تكتر منو

فضفض و انشرح روعة حديثك وفنو

الا كمان تحاذر قبلك في ناسا جنو

[١٤٢] عبد الله:

القصّة ابتدت، عبّر أخوك عن منّو

للطيبة الحنينة الليها عاد بتمنّو

ما قايل البنات بالغيرة حيلومنّو

واتلمّن علي،،، والباقي أسأل منّو 🤷🏽‍♂️

[١٤٣] أمنية:

و كيف نان البنات ما بتمسكن شحتافة

واصلنا الشعاع ومافينا زولا شافا

تميزها رقتها لا لايمة لا شنافة

فازت دون وصف لي عيونا ولا اكتافا

[١٤٤] عبد الله:

من عين البنات عافاها ربّي وشافى

كايسين الخبر زي فرقة الكشّافة

والمزّيكة تضرب، تكشف الكشّافة

بِلّوه الشمار وارموه في النشّافة 😝



[١٤٥] رشّود:

عبدالله الشفيف في الحارة واقف ضو

والزول الكريم ما برجي قولة سو

وكت السكات عبدالله ماسك الجو

دقاق للنحاس بي صوتو كو كرا رو

[١٤٦] عبد الله:

والطوّل لسانو الليلة ياخد كو

البنبح بعيد خليهو كان هو هو

الا الجانا جاي بلقى المزاج احلو

ياخد الفي النصيب في لحظتو وفي التو

[١٤٧] رشّود:

خليك مسامح ما تسعى ليك حرابة

انساهو الدواس وتحكيم شريعة الغابة

ما هزاك رصاص ولا هوشت من دبابة

بس عندك اقيف عشاري سم شلابة



[١٤٨] مصعب:

جيت داخل (متاقي) شفت الدرر تتناثر.

بي نما جميل عبد الله قام اتباشر.

قالو كلام سمح فكري اندلق و اتشارر.

و العينين بِقنْ كان عشرة كان اتناشر

[١٤٩]

ما بمبر عدييييل الكرسي حضّرناه

بندور النظم و النم بنتمناه

بستمتع كتييير بالبنظمو و يقراه

و الليلة العجب ابروف سمعنا غناه



[١٥٠] أبروف لعبد الله:

ات ياكا النصوح و بيكا الصحاب بتفاخر

عارف الغي قسم ،،لافيهو عيب لا مساخر

اقدل فوق عشق و اختا قولا ساخر

و من عبق الحبيب هات لينا عود و مباخر



[١٥١] عشاري:

عبد الله العريس بالله ما تتكوبر

وانجز عديل زى مادعيت لاكتوبر

لو ماكلامك داك كان المبيت في كوبر

رابطين عممنا معاك داعمين قليب اتشوبر

[١٥٢] عبد الله:

الباراك قايل يا عشاري اتطوبر

الله يحلّنا، كايس الشمار تتخوبر

من بلعب جناح خليتني لاعب ستوبر

البت بتّنا وبي خوّتنا بنتبوبر 🤷🏽‍♂️

[١٥٣] عمّار لعشاري:

هيلك الشكرة يوم اب دموماً سايلة

هيلك الكرم ما الدنيا اصلها زايلة

هيلك الخير وتمومتو جداً ساهلة

إلا رفيقك غِلِبْتْ تعْدل خطُوْتو المايلة 😏

[١٥٤] عمّار لعبد الله:

عشاري ربط عميمتو وبي وراه اتباعو

لكنو العريس جافل غريبة طباعو

صدق المن قديم قال لعلاج اوجاعو:

"القال راسو موجعو بربطولو كراعو؟" 😏


[١٥٥] عبد الله:

عشاري رمالو شتلة ولقّط الاتباع

يخطب في ركن، وورا القطيع قال باع

الباراه بار وبضاعتو ما بتتباع

ما ناقصين "ثعالب" ياخي وللا "ضباع"

عبد الله: "الثعالب" و"الضباع" دي مصطلحات طلّعها نعمان الزين جاد الله زمان في هندسة؛ وبالمرة نعزم كلّ من مجاهد، ياسر، حسن، ووليد يعزّوني شويّة 😹.


[١٥٦] مجاهد:

ابو مازن قيافة النضمو تب موشين

فازعلينك دوام وليد وود الزين

صيدك كان بعيد مابتلحقو الرجلين

نفردلك الف جناح للعديل والزين


[١٥٧] وليد:

اقرا ف كلام كبار لامن الراس بقا ينتح

كلام زي الرصاص شغالين في بعض ترح تح

ناديتني في شغلة ما عندي فيها التكتح

تاني عليك الله باب الاحراج ده لي ما تفتح

عبد الله: يااا بير إنت قايم سدّاري؛ قافية لزوم ما لا يلزم عديل؛ محتاج بس تزبط الوزن، وبتسلك؛ أحسن زول كتب هنا في رايي أمنية، وزعمت (ولا نصدّقها) إنّه دي أوّل مرّة تنظم؛ ف تعال خش في الدافوري دا لامن تسلك.

وليد: لا انا خلاص قررت اعتزل في قمة مجدي.

عبد الله: مثلا نزبّط ليك المربّع القلته:

أقرا كلام كبار الراس يقنّب ينتح

.. متل الرصاص، الشغلة تاح تاح تح تح

ناديتني في شغل ما عندي فيهو التكتح

ليه لازم الحرج لي بابو يعني بتفتح؟

حيث ".." دي بتجي في الإلقاء؛ لو دايرها قافلة فيه حشوات زي "هه" و"عاد" و"تب" و"جت" (chut)؛

وليد: ما تنظر ساي يا بير ... الأنا قلتو كان أجمل.. 🙄🙄


[١٥٨] ياسر:

يا عبد الله زيد القول و علي النمة

فوق ست البنات الخاتية من اللوم و خاتية مذمة

وكت الخلوق هجاده كايسة الجمه

تسطع نجمه ضواية و تزيل الضَّلمة



[١٥٩] نهلة لعشاري:

عاد يا عشاري الليلة...بالغتا و اتلومتا

ما عارف انحنا ما بنرضى فيهو لا كلمة لا غلطة

عبدالله اب كلاما راااكزا و موزون...

بالله ما ناقصانا خرمجة من ناس قانون



[١٦٠] محمّد احمد:

فى الجمعة الخلوق دايما تكون مجمومة

ضاربين السمك بى دربو جابلنا نومة

ناغمنى الصديق قوم الخلوق ملمومة

عبدالله (الجناح) قرب يتاقى كرومة

[١٦١] عبد الله:

إن هوشات عمر، زي قرصة الناموسة

تاقينا الشهود بي مُعجما وقاموسا

شان نلقف حبال الجغمسة الجغموسة

زي سحر المداين حين ألقى موسى



[١٦٢] عالية:

من بت الأصول ما تنتظر حبّيتك

وما تخير عشوق بين خوتك / ربّيطك

تتضاير خبارك؟ بتخافا قولة أبيتك؟!

أطرح ياخ عديل قبال نقول يا ريتك

باكر بالحلال الراسية تعمر بيتك


سالي:

عبدالله تطير عيشته

يكتب في العلوم .. تقولوا ما فاهمين

يسهب في المحبة تقولو ديل فارغين؟!؟!

اجي يا اخواني؟



[١٦٣] عالية:

فوق جدي الريل ضانّيبا قولة أريدك

سادر في العوج رغمنو العديل بي ايدك

تتاقل عليو وتقولو أرجى نديدك

الجدي إن جفل كتر البكا ولااا بفيدك

[١٦٤] عبد الله:

أغوى عشاري منّو تضل بعد تحييدا

واتلمّوا البنات اتنافسوا ف تأييدا

ليه الناس دي دار تطبظ عيونا ب إيدا

والريدة النمت حرّة بتدور تقييدا؟



[١٦٥] أمنية:

الحب جد قرار دار ليهو اتنين يبنوه

كم زول فقدو راسكم و حقو انتو تتبنوه

و في نص الرمال اوعاكم أنتو تدفنوه

و كان صح مافي شي من الاسم بتجبنوا 😁؟

عبد الله: شغل النهار تعبان عديل؛ التلاتة أبيات ما موزونة، والرابع قافيته طشّت؛

أمنية: أنا حايص لي السؤال الفي البيت الرابع ده ما اغشك 🙊😂

هادية: مِنِينة ❤️❤️❤️ طيب خلاس اسألي السؤال ساي كدا عشان نفهم 🙈🙈🙈🙈


[١٦٦] أمنية:

منوية العديييلة اللي الشمار ما سكت

و كل ما نضايرو ليك خبرك بنلقاه منكت

ريدتك ريدة ظاااهرة و لي عيونك بكت

اجيب سيرة الاسم تقولي كورتك فكت 😏


[١٦٧] عبد الله:

هاردلك منّو ليك اللعبة حسّة اتدكّت

العصفورة بِنْقُول ليها هش كان ركّت

الناس روّحت والتبتدي بتتسكّت

اسّي خلاص بنقطع في المشوا ونتنكّت

أمنية: يطررررشني كان فهمت 😂😂😂

عبد الله: نشرح ليك؛ بقول ليك hard luck ليك، خلاص اللمّة اتفرتقت وابينا نفك الإسم؛ "العصفورة" البتنقل الأخبار، من "كلّمتني العصفورة"؛ الناس روّحت (مشت) والتبتدي (البتبدا تحك الموضوع تاني) بتتسكّت (بنسكّتها)؛ البيت الأخير دا زي بعد يكون فيه لمّة كبيرة والناس تتفرّق، البفضلوا بكونوا بتسامروا، والقطيعة في الناس المشوا بتشغل حيّز كبير في الونسة؛ نتنكّت يعني ننكّت، نحكي نكت

أمنية: صعب لكن 😐او يمكن صعب علي أنا براي.


[١٦٨] أمنية:

غايتو أنا يعني و النشكر ليكم رقبتي 😎

لا زولة عوج لا كنت يوم غلاّتة

نضمي صحيح كتير لكنّي ما فلاّتة

و أكيد بنقدر الصحبة و نشوف واجباتا

و بنقول اسمو عادي و لافي أي غتاتة


[١٦٩] عبد الله:

وانا بَشكر واقول في الغالية بتّي حلاتا

الزينة الرزينة الدَينة حافظة صَلاتا

والطبع السمح واحلى الصفات اللّاتا

أمّا الخلقة ماف اتنين عديل وتلاتة

[١٧٠] أمنية:

من ما قمت ما صادفني صاحبا دسوه

و الريد اصلو ما بتقال اياهو بحسوه

في البيناتكم أنتو من سنين بترصو

بيجي واحد شفت و بنيانك اسه يقصو ⁦🙆‍♀️⁩


[١٧١] عبد الله:

يب، داسّيها من عين البنات لا تصيبا

حاسدين ريدي والله ادّاهو ليها نصيبا

كان عرفوها عاد كان سوّوا ليها نصيبة

ياهو الصاح كدا ودسّتها فكرة مُصيبة

عبد الله: حقيقة علميّة: فعلا فيه بنات غارن من كلامي عنّها.

عمّار: غارن كيف يعني 🤣؟

أمنية: جاية أسأل نفففس السؤال 🙊

عبد الله: غارن الواااحدة دي؛ غُيُرُت!


[١٧٢] عالية:

يا عبد الله أنجض وأختا المقالة النيّة

يوم الدايرة انتي.. ويوم أبوك يا بنيّة

راكز في الدواس ساحة الذخيرة الحيّة

وفي ساحة العشق شابكنا ووب وأحيَّ


[١٧٣] عبد الله:

ياني انا الكلس، ما زول غواية وغيّة

والزينة الرزينة، القلتو فيها شويّة

والبيتاتنا عامرة وباينة ليها وليّ

بتريدني وبريدا،،، وللعواذل كيّة

[١٧٤] عالية:

الراسية أم سماح عاد أنحنا أماتا

ما بنلفاها تقهر بي حبيبن فاتا

كاسيها الحيا وساترا الغرام بسكاتا

قيد الريد أخير من سرحة الشفاتا

[١٧٥] عبد الله:

الراسية ام سماح أنا عاد أبوها التاتى

وانتن يا بنّات بتضيّعوها غتاتة

القلتوها تب ما بتبقى أصلو بتاتا

انا شغّال الم وانتو بتدوروا شتاتا؟



[١٧٦] يوسف:

يا عبد الله خوي أركز واقيف للجاتك

درب الحب صعيب هضريب وحمى وحاتك

الجدية النفورة الجهجهت باكاتك

بي جاي تنستر .. وبهناك تسوي سواتك


[١٧٧] عبد الله:

الجاتني اْنْ ماْ جات والله كان بنجيلا

دي الزينة الرزينة الملكة عاد من جيلا

والخاتمة المكارم مصحفا وإنجيلا

من عين الحسود شاحد الكريم ينجيلا

عبد الله: @يوسف: رايك شنو في القافية ام خمسة حروف دي 😌؟ @البنّا: صادرناها من حمدوك عملنا ليها ريسايكل 😹

يوسف: ختري ختري.

البنّا: زدت على المعري بالنون

دينٌ وَكُفرٌ وَأَنباءٌ تُقَصُّ وَفُر

قانٌ يَنُصُّ وَتَوراةٌ وَإِنجيلُ

في كُلِّ جيلٍ أَباطيلٌ يُدانُ بِها

فَهَل تَفَرَّدَ يَوماً بِالهُدى جيلُ

وَمَن أَتاهُ سِجِلُّ السَعدِ عَن قَدَرٍ

عالٍ فَلَيسَ لَهُ بِالخُلدِ تَسجيلُ

عبد الله: النون والكسرة القبلها؛ لكن أبيات المعرّي شكلها أطول.


[١٧٨]

قبالك كتاااااااار شقوها هادي السكة

كم أسدا هصور شفناهو قاعْد اتبكّى

واحدين بي مزاج تسريحة واخر شكة

عقبا سووا فَح..ياسين معاها الجكة

[١٧٩] عبد الله:

قبلك جرّبت منّو، وعشاري اصطكّ

عاليّة وبندقيّة وغيرو حاول وحكّ

ات شكلك خبير طاف البلاد واحتكّ

إلّا بحدّثك .. انا آخري ما بتفكّ



[١٨٠] عالية:

شن فايدة حديثا ما بعدل الزول

كل الخالفك سويتو ليك عزول

يانا صحبة شورتك وما بنضن بالقول

إت مكتول هواها وياها هي البندول


[١٨١] عبد الله:

يب، بندولي، بس، ما صاح ازيد الجرعة

كم زولاً دقس، راح اندفع بي سرعة

ما شاف خطوتو، لامن وقع في الشرعة

لا شرب البحر لا جاتو موية الترعة



[١٨٢] عزّة:

ما خليت وصف ما قلتو عاد في السمحة

شحتفت الصحاب وغامراها هي الفرحة

خليتنا في خيالنا نشوفا جد بس لمحة

يا ربي القمر نزل الأرض بالطرحة

[١٨٣] عبد الله:

كلّ القلتو ما بتعدّى مِنّا لمحة

كل ما اقول وصف بلقاه ناقص وامحى

من اردب صفاتا، القلتو ما بجيب قمحة

من فوق الصفات السمحة زينة وسمحة!

[١٨٤] عالية:

إن قالك رويت؟.. قوليهو زود تاني

كاسات الغرام كاسات سلاف ومعاني

في سكرة هواك قول الله يتولاني

ومن خمر الحبيب أختاها ياخي كفاني

[١٨٥] عبد الله:

كضّاب البقول بجفاها أو تجفاني

دا البسأل علي وعليها راح يلفاني

واقف جنبها وبسهر عليها وفاني

مخلص ليها لا يوم اندرج في اكفاني



[١٨٦] عشاري:

تاقيها ست الناس شان تحسم الجوباك

سايقنا انت بفوق ومكتر الاحناك

خليها تحكي تقول ماتحكي انت براك

لاخمنا نحن بجاي وتامي الحنان بهناك

[١٨٧] مجاهد:

فراديس العشق بتمرقك الوااق واق

وان ِعشق الرهيف، بفرزو العشاق

يلاكم ياصحاب* نفعل الهاش تاق

#وين_ست_البنات سوّولا منشن وتاق

[١٨٨]

كمومية الِعشق بالمللي ماآاابتنقاس

كل لحظة ف مدار احساسو غير احساس

وهدبت الصحاب سويت لهم وسواس

وياكاتم الهوي قااااالو الِعرق دسّاس

[١٨٩] عبد الله:

لا تلخبت كمان، ست البنات دي براها

حاقّاهو الاسم، دي القاطرة دفعة وراها

سمحة خلقة واخلاق جلّ ربّي براها

ديك لسّع صغيرة، وبتّي يعني براها

[١٩٠]

قول ان دار تقول #وين_الرزينة_الزينة

ناديها ان رضت، قول اظهري وعزّينا

كان يسكت عشاري، ومنّو لا تزوزينا

الا بخاف من العين والحسد ياذينا

[١٩١] مجاهد:

س:س ست البنات لكل زول ست ريدو

لَفحت اللسم خصّيتو بس لي سيدو

غلّبت الصحاب ماآاظنو تاني يزيدو

محموم الهوي بيدور درب في وريدو

2020-12-13

دارت مساجلات صغيرة في التعليقات على البوست الجمّعت فيه جولة عشاري، جمّعت بعضها في بوست منفصل


[١٩٢] عزّة:

حال السرور الليلة نمنا حايم

اتوثق اسمنا ودخلنا في التايم لاين

عاد ست الإسم فوقا السماح مترادم

سجل يا زمان كل الشباب متضامن

[١٩٣] محمّد احمد:

خليتنا بنحس الليلة كلنا فابيولس

ناسين لى هموم الدنيا ناس لو و less

لو كان بالمراد كان جيناك جميع بالدس

تدينا الكلام دون ما نشيل ليك حس


[١٩٤] عبد الله:

فابيولص شديد والله كلّنا feeling

الزول انتشى وإحساسو وصل الـ ceiling

أجمل فرفشة وبتداوي تعمل healing

الا الفي القلب، قافلين عليهُ الـ sealing

عبد الله: "فابيولص" دي تتقري بنطق عامّي للكلمة الانجليزيّة، يعني بحروف مد ما schwa.


[١٩٥] بندي:

نتفرج نعاين في الكلام ونتبسم

عبدالله الجميل بدا بالكلام والنم

جابت ناس عشاري والجميع منجم

اخير نمسك حروفنا وقلنا ياخ ننطم

[١٩٦]

عبدالله العظيم حطم زمن لقيدو

مشينا معاو خطاوي كنا رهن لأيدو

جاريناهو كتير في نظمو للبريدو

الا غلبنا تب، ناصح، سمح بنريدو

[١٩٧]

جابت مغرزه شان ياخ ما شفناها

عارفنك ختير عينك نجيضه حداها

باكر بنعرف مين جهجهت بغلاها

زولا كان تقيل ،ثابت قبل يلقاها

[١٩٨] أبروف:

و دي (تحريشة) تانية فوق البيعة 🔥🔥 :

تاجوج و المحلق هل حديثهم اتاكا

اركن لي القليب و خلي بابو متاكا

داوم علي الاعناب اعصر خريف و شتاكا

و بي جناح الهيام لامس سفوح التاكا



[١٩٩] ميّادة:

لـ عبدالله اللطيف:

اكتب وَعبّر وقول

ماتشتغل ب زول

هي الدنيا كيف بتطِيب

غير بحلاوه القول


بس عندي ليك نصيحه واقفه لي في زور..


خوفي يجي ال من دورا

(الجنتلمان)

يبقي ليك عزول

تحرمنا من كلماتك

وريدا ليك يزول


[٢٠٠] عبد الله:

لا ريدا لي بيزول

لا ريدي، ما زايل

لا بشتغل بي زول

لا فيو انا السايل

لا خفت مرّة عذول

لا هو العذول طايل

البينّا فوووق معزول

من لمسة النايل


[٢٠١] ميّادة:

لله عليك يامان

برافو وكمان هايل

وضِح خلاص في القول

شان تعْدِل المايل

زيد من كلام معسول

وكيد العزول زايل

لايق عليها القول

وسمح النضِم خايل


هند:

مياده❤️ رهيبه ياخ. مآ تعزيني بي بيت. ان شاء الله بيت قش.


[٢٠٢] ميّادة:

جات هند الاصيله بت عز القبيله

مابقدر اوصفا كل المكارم هيلا

الذوق والاناقه واللطافه دليلا

وارثاهو الجمال يشهد عليهو كحيلا 💕



[٢٠٣] شذى:

بوست جدا ممتع وفيه نزهة جميلة

وارفات أشعاره والمحبة ظليلة

هُشنا! وقلنا لازم نجدع في دي الجنينة شِتيلة

ومن عشاري لمنّو، ست البنات ياحليلها!

شيراز: اتخيلي مربع واحد مرق الجمال دا كلو و كمان اكتشفنا ناس عندهم ملكه شعريه ما كنا عارفنها يا ربي دا الbutterfly effect البقولوا عليهو 🤔


ميسون:

دي بس المافيشة ومالية الفجة!

2020-12-14

بعض المداخلات في بوست الجولة الثالثة في اليوم السابق.

[٢٠٤] عشاري:

والله وصفك دا ماوصف اصحاب

قربت اني اقول انك بقيت كذاب

لو كل نمك دا ماحب عديل بالباب

حيكون كلامك كيف في حضرة الاحباب

[٢٠٥] عبد الله:

مين القال حرام “أحباب” علي الاصحاب؟

وديل فرز الفرز ممكن تقول لو حاب

ساكن قلبهم حافّينّي بالترحاب

وفي قلبي الكبير بيلاقوا كلّ رحاب



[٢٠٦] سارّة:

الريد آااب رويس بالروح و مو بالجتّة

ماسمعتوبو عنتر و المجينين متلهم في الحتة؟

السبب البخلي الزول هاد حيلو ياخ ينبتَّ

رمية الصيدة بحديثاً ستّة فوق للستّة

[٢٠٧] عبد الله:

الريد البِنَخْبَرُوا ما بتَعَرْفو البتّة

ما ساءلين في عنتر والملوّح حتّى

في الحب الكبير ضاربين ضروباً شتّى

تجتاز الخيال .. لي غيرنا لا تتأتّى



[٢٠٨] بندي:

قدر ما اقول اتوب وامسك حروفي علي

من مجاراتك والقالو ووب وأحي

تظهر لي حوارتكم ترمي الملامه علي

تتور فيني شوق ينتح واقول يا حي

[٢٠٩] عبد الله:

هوي يا بندي هوي والله ما بنتجارى

ما تتعب، تقوم، تمشي وتجي وتتجارى

ريدنا نصبّو صب، والناس دي ساي نجّارة

ما متل الجهال الحبّوا أقرب جارة

[٢١٠] بندي:

ووكت الليل هدا، نامو العذول في الحي

انا ببدا الملامه، والله عالم بي

يغشاني شوق شوقا قدييم فاض بي

بس بصبر واقول آخر العلاج الكي

[٢١١] عبد الله:

باين ليّ عودك شايفو لسّع ني

وجنبات القلب نشفانة راجية الري

الشوق البجيك، لا تردّو أختا اللي

والجاييك بجي، يخلّيك تضحك: هَي!

جولة فخر الدين

دارت مساجلات مطوّلة تحت عدد من المربّعات جاد بها فخر الدين.

[٢١٢] فخر الدين:

يا عبد الله اخوي صفة الغرام لا تكوسا

زي سر الله روح جوة النفوس مدسوسة

لو فاز بو السعيد أيامو يمحي عبوسا

وان صاب التعيس ينخر حشاو كالسوسة

[٢١٣] عبد الله:

شفتا الريدة، ألوانا، وقريت قاموسا

في: الريدة الحنينة الفي القلب ملموسة

والريدة الحزينة الحارّة تفصد موسا

الا الهيلا زي ريدة الخلوق لي موسى

[٢١٤] أمنية:

غايتو اظني بغرانة .. وحاسدة وسوسة 😂

من الشفتو من ريدتكم الملموسة

أصلي الضقتو من الريد هموم مدفوسة

كجنت الصنف ان عيسي او كان موسي 🥴



[٢١٥] فخر الدين:

الريد يوت بكون مدخل كهاربو النظرة

إن كانت ابتسام أو كان بقت لك حدرة

نشاب العشق يرميكا دون ما تدرى

تغرق كالذي هام في عوالم الحضرة

[٢١٦] عبد الله:

زي ريدتنا اْظن بين البشر في نُدرة

والبيناتنا سر بين العباد لا يُدري

ما نشّاب عشق؛ انشاه ربّ القُدرة

لا شابو الزمن لا شابو شايب كُدرة

[٢١٧] فخر الدين:

ريداً كاليقين ما شاب صفاهو الظن

وريداً كالسُلاف الما اندخر في دن

ألطف من خيال ملهم مستف فن

مبذول بالرضا اللا فيو أذى ولا مَن

[٢١٨] عبد الله:

ريدا في القلوب ما فيه قالَ وعن

حاضر، لا نقص، لا فيه غاب أو عن

دفّق فينا فاض ليهو النفوس أوعن

ريد ما بتحملنّو .. يا بنات أوعن

عزّة: اشرب الشاي واظبط الراس واجيك بي مزاج في يا بنات اوعن دي!

أمنية: أنا حرقني ده و مااا بخليه بس اكمل شرا الخدار و مواضيع البيوت دي.

عزّة: ااي والله بتزعل وكمان كان برد لي غايتو ضحكت ليه الله غالب.

أمنية: النبي بعدين بعد تظبطي ليه جدعة كاربة ناديني اقيف معاك 💪.

عبد الله: بعد تشتري خدارك، قبل ما تردّي، تعالي أقري القصّة دي؛ It’s based on a true story؛ فلو قلتي قبيل لفخرالدين "دا شعراً ما عندنا ليو رقبة"، قايلك بعد تقري القصّة دي (واتنين تانيات) ح تقولي دا ريداً ما عندنا ليو قلب 😹.

[٢١٩] فخر الدين:

ريد الفي جفاهو كم تمادى وأمعن

ما بسلاهو حت لو في فؤادي بيطعن

مالك روحي والقلب المسلّم أذعن

ما هماهو وصف حجاي ليو بالأرعن

[٢٢٠] عبد الله:

بتسمّيه ريد الفيهو زول بتفرعن؟

احنا الريدة فينا اْرواح يروحن يرعن

وف دينّا الجفا والصد محرّم شرعاً

أبداً ما بهم ولا يوم هي ضاقت ذرعاً

[٢٢١] ميادة:

ريدتكم بقت في ذاتا ساميه فريده

شحتفتو النفوس بالجد دي حاجه غريبه

يحفظا ربنا من العيون لاتصيبا

لاجفا لاصدود لا آهه لاتنهيده

[٢٢٢]

تحسم في الامور قت هي ليك صديقه

لكن القلوب مليااانه بالشكوك والريبه

شوف راي الصُحاب ال دايرنّا ليك حبيبه

ماتخليك مكابر عاااادي ومابتروح الهيبه 😅

[٢٢٣]

دايرنك تصرح ل ست الحسان الصيدا

وتبدع في القوافي وانت المكارم سيدا

دايرنك تعزها وتبقي ليك طبيبه

تسقيك حنها شريانا ليك ووريدا



[٢٢٤] عزّة:

دا رد لي يا بنات اوعن:

الريد في القلوب ما بنحكي بيه للناس

عامرابو الدواخل وعيونا تبرق ماس

ننظم بيه قوافي ويقولا ابونواس

ونزيد في الحكي ويغني عمر احساس



[٢٢٥] فخر الدين:

وحين تسمع حديسو تموع وليهو تميل

يدُر ضرع المحبة الحيل يموت وتحيل

وإن جافاك موايقك تنسرف وتسيل

توح وحّاً يشق صنّة هوايد الليل

[٢٢٦] عبد الله:

حاشاها الجفا، دي الطيبة ست الجيل

فيها اشوف سماحة عيسى في الانجيل

ياما سرحت فيها وياما عيني تجيل

وما لقيت ليها شَي لا يدعو للتبجيل


[٢٢٧] فخر الدين:

صدق الريد نصاحو ولو مقابلو عليل

راسخ طود إذا طور سينا مال ما بميل

حقو الشكرة و التشريفة و التبجيل

حت لو داسني بي قدمو وحوافر الخيل

أمنية: برررري بري؛ ده شعرا ما عندي ليه رقبة ⁦🙆‍♀️⁩


[٢٢٨] عبد الله:

الزينة الرزينة السمحة ما زي ديل

ما بتدوس طرف خلّيو كمان مِندَيل

وما بَرضالا ترضى الذلّة والدِلدَيل

لي زولا بريدا تجازي بالبهديل

[٢٢٩] عزّة:

تزداد المرابيع كل يوم مع التحليل

شان واضح هواك وكمان معاه دليل

وات ناكر دوام للحب ومعاك تعليل

السمحة في خيالك واشعارا وين ياجميل

[٢٣٠] عبد الله:

زي ما قلت ليك، القلتو كلّو قليل

حد ما قلتا أوصف بلقي وصفي كليل

وافر حبّها، مخضرّ ، وظلّو ظليل

وادّيت المعاي، وانساب هواها عليل



[٢٣١] فخر الدين:

تراهو الحب قَدر بتلبّب العشاق

ونار الريد لهيبا القاسي ما بنطاق

تستعذب عذابو ومرو حالي مذاق

والمحبوب بطيب لك لو يكون عولاق

[٢٣٢] عبد الله:

ما شفتوها انتو السمحة في أخلاقا

أطيب من رأيت في الناس على إطلاقا

بتقابل بخيرا الناس على عولاقا

بختي اْنا بيكِ عاد الما لقاك ما لاقى

فخر الدين: خلي بالك إنت بتمجد المحبوبة وأنا بمجد الحب!

عبد الله: بالضبط دا الانطباع الجاني؛ انت بتتكلّم عن طرف واحد، وانا بتكلّم عن إنسانة عظيمة بعرفها.


[٢٣٣] عزّة:

شن فايدة غناك في السمحة أم براقا

وياكا من القرب ما طلت لي عشاقا

عليت لي مقاما رفعت لي اخلاقا

باكر تهوى هي وتنساكم انتو رفاقا

[٢٣٤] عبد الله:

كيف تنسى الرفاق؟ دي صداقة وللا صفاقة

عاد حاشاها من كذب القلوب ونفاقا

دي الطيبة الحنينة الكابّة خير دفّاقة

ما لاقاني زول في الطيبة أصلا فاقا!



[٢٣٥] محمّد:

الريد ان وقع زي القدر كف نف

والعجب ان عشيقتك زي شمعدان ونجف

السبب البخليك يا عبدو تتراجف

انها ست جمال واخلاقها فوق الوصف

[٢٣٦] عبد الله:

أبداً ما عشق، ياخ ما تخرب الصف

دي صداقة ومحبّة جميلة لا توصف

لي زولة البقول بوصِفها ما آنصف

الخير والكرم في قدّاما تتقصّف

[٢٣٧] محمّد:

عادي الصداقة بتبقى ريد وشغف

وببقي عليك نار لو سواك خطف

لو سامع نصيحتي عليها اتخفف

واطلب ودها وما حتتاسف



[٢٣٨] فخر الدين:

قدر ما تقول تفوق تلقاهو شاغل فكرك

قدر ما تغني فوقو تحس ضآلة شكرك

تدمن ليمو يبقالك مُدامك و سُكرك

يلوحلك طيفو في ساعة صلاتك وذكرك

[٢٣٩] عبد الله:

ليه داير تفوق؟ داير تزيد مفتكرك!

القلب الحنين الدافي بيتك ووكرك

يفتح بابو ليك بالطيبة ما بي مكرك

ان غبت بيفُقْدك وان نسيت بدّكرك

[٢٤٠] فخر الدين:

حريتك هواهو وبرضو سلسل قيدك

فيهو دواك وفيهو هَناك ونشوة ريدك

تجيهو تصيدو تلقاو بي سماحو يصيدك

تكوسو سنين وتلقاو دارو جوة وريدك

أمنية @فخر الدين: نوم هوي 😂😂


[٢٤١] فخر الدين:

قالت ليَّ نوم وأنا ليلي كلو سهاد

والكرى بجفا عين القلبو حن وراد

كيفن النعاس وأنا صالي جوفي مراد

مابي يتمو لي شادني الدوام شرّاد

[٢٤٢] أمنية:

بري يا يمة ..

قبلك ووحّدك و ان شا الله ما بي حالك

الريد والسهر خلو الجسوم تتهالك

اخد العبرة من الرادو من قبالك

غير الكاتبو ربك ما في شي بيبقالك

[٢٤٣] فخر الدين:

حالاً زين وحات الغالية لو تكويني

أو بي الدل بتجفل مني وتكاويني

ريد المازجت دمي وجميع تكويني

باقي لي حياتي وكل ثوابتي وديني

[٢٤٤] أمنية:

و اتعلم تجافي الحاني قبل الجافل

و الريد صلي فرضو و ما تسيلو نوافل

راعي الراعي ودك و لي غرامك كافل

و البيرحل يجيك يلقاكا بابك قافل

[٢٤٥] فخر الدين:

الما سوى في ريدو الفروض والنافلة

عن نور الغرام أعين بَصِيرَتو قافلة

لو ما بي الحبيب نبضات فؤادك حافلة

في درب العشق فاتت عليك القافلة

[٢٤٦] أمنية:

نحن الليكا بنراعي و نحلحل كربك

و نحن الدون مقابل نحرسك و نزربك

نحارب الناس جميع واملنا نفضل قربك

وكت تجفانا حتما نحن بنفك دربك

[٢٤٧] فخر الدين:

لو جافى ونسى بيلقانا ليهو بنطرى

ولو يرمينا برضو مقامو فوق الشعرى

الناحلني شوقو وكل يوم لي يبرى

يكفيني اللي كان والريد وعطر الذكرى

[٢٤٨] أمنية:

الريد البيذل انحنا ما من ناسو

و بنقاطع عديل عاشقا برد إحساسو

ما بيفيدنا شي لا فضتو و لا ماسو

بس يرمش بعيد قطرو بيدق اجراسو

[٢٤٩] فخر الدين:

الريد كالبحر ما شفنا زولاً قاسو

ورغم اهوالو يا بت الكرام ليو ناسو

العشاق فوارس ولي المغانم داسو

حبو بلا علل ولي مقابلُم ما كاسو

[٢٥٠] أمنية:

الحب طاقة لازم توصلك شان تدي

و لازم انت تمنح شان تكوس العندي

لا بتعاطي بالدين لا بقسط ودي

قدر الباخدو من ايدك تشيل من يدي 😎

[٢٥١] هنادي لأمنية:

زمان قالت لي ياخ الريده جد كاتلاني

ومحبوبي البريدو.. متسلي بي هجراني

قلتلها برضي مكتولة ومعاكي بعاني

ومن يومها اتفقنا: البظلمني ما يبراني..

[٢٥٢] أمنية:

كنا بنحتفي بالبيدوه مهما كان

وكنا بنؤثرهم و نحصد الخذلان

اتعلمنا درسنا ماف علم مجان

من كتر الطقش نتعلم الزوغان

[٢٥٣] هنادي:

حمستونا نكتب في الوداد والصد

ومريودا مكنكش في القليب للحد

ان كان فاتنا او فتناو سنين تنعد

هل في يوم نسى المحبوب حبيبه الجد

[٢٥٤] فخر الدين:

الريد كالبحر ما شانو جزر ومد

يعتورو الخصام وبظل دوام ممتد

ومهما اتنافرو بيتحدو ساعة الجد

فطرة ربي من خلق البشر في كبد

[٢٥٥] عبد الله لهنادي:

يا داب شفت نمّك جبت ليك الرد

الريد البقولو ما الببين في الخد

ما ريد فخري داك الكلّو جذبِ وشد

أنا وايّاها عاملين زي أصابع اليد

[٢٥٦] هنادي:

وانا لي كلام عبدالله جايه اثني

ومتلافياهو قول فخري الملاهو تجني

عزة ومنّو نمّن وللعشق شهّنّي

ولي قول الشعر ونضم القوافي هدنّي



[٢٥٧] أيمن:

من وصفك البنية كاملة صفاتة تب سمحة

وتاخير زراعة الحبة ما بيحصد قمحة

دحين اطرح واملا قلبك فرحة

اصلو العشق خوفا ملخبت ترحة

وزي ماقالت القمرا جاتك بي طرحة

[٢٥٨]:

والصقر ان وقع كترت البتابت عيب

وكان لي خط ستة وصلت خليك لعيب

هيج جماهير نايمة من زمن حمد والديب

اوعك من الضفاري والصريج هنا عيب

دي الثريا يا عبدو جاتك قريب

خلينا نعرض وابشر يا يالحبيب


[٢٥٩] عبد الله:

ليه الريدة لازم تتختم بي طرحة

ليه كلّ البنات لازم نشوفن طرحة

البيناتنا حب سامي وجزاه الفرحة

والبيناتنا ريد نامي وقلوب منشرحة

"طرحة" في البيت الأوّل من "الطَرِح" أي إبداء الرغبة في الارتباط.



[٢٦٠] رشّود:

عبدالله اخوي نضمك دا فوق جرسة

وكتر النضم الناس بتحسبو فلسة

ووكتن نويت يلا فكها نحسة

ما سمعنا يوم زول كتلتو عرسة



[٢٦١] عبد الله:

فخر الدين نضم، دخّلنا في نيو ليق

عِلاّ هواه قيد وهوان وذل ما يليق

البيعدّي باب ريدتنا حُر وطليق

ما بتحجب سماو أسقف من التحليق*

*بالإشارة لهذا الجزء من هذه الرواية:

بدأت تخطو نحو الباب، وخفق قلبها بشدّة بالأمل في أن تلقاه؛

كان النور من غرفة الغفران يمتد بعيدا أمام الباب؛

خرجت ..

وجدت نفسها في فضاء، لا تحدّه أسوار، ولا تحجب سماءه سُقُف؛

نظرت مدّ الأفق؛

لم تَر شيئا؛

ثمّ نظرت نحو السماء؛

وإذا بنجم لامع ..

عرفت أنّه عرف مكانه؛

صعد هناك ليرعاها، ويرعى سائر أحبابه؛

همست بكلمات ..

ـ كم كنت ساذجة حين تمنّيت مرّة أن تكون لي وحدي؛ قلبي الصغير لا يسعك، وقلبك الكبير يسع الوجود؛

خفق النجم، كأنّه يسمع نجواها؛

ابتسمت، وقالت:

ـ دمت بخير!


[٢٦٢] عزّة:

فخر الدين سما بي حبو فوق اوهام

ومشاعر الهوى في الدنيا زي انسام

مكتول العشق مابشوف في فعلو ملام

والقلب ان هوى للعقل مافي كلام

[٢٦٣] عبد الله:

فخر الدين دا ضاق نوع المحبّة السام

الملّاه في نيران عذابو وسام

ما شاف الحبيب الضاحك البسّام

مسكين، قسمتو، وقالوا القلوب اقسام

[٢٦٤] فخر الدين:

ضقنا سموم وضقنا نداوة الأنسام

إلا الريد غريب ما بحوي وصفو كلام

إن جاد لك حبيبك بالوصال أو صام

لي الروح يوت محرِّق ولي الجسد عسام

[٢٦٥] عبد الله:

دا الريد المعسّم يعلم العلام

الريد الجميل ما تشوفو في الأفلام

بتشوفو ف قلب ما ساب حبيبو ولام

والبدوي الجروح ما بسبّب الآلام

[٢٦٦] عزّة:

سبحانو الخلق الريد معاه سلام

لعبادو الجمال في الدنيا بالانغام

والحب في القلوب بلسم لكل الام

يا رمت الوصال يا شفته في الاحلام

[٢٦٧] عبد الله:

الريد ان صدق يا عزّة مافي ملام

والقلب المنوّر ما بخشّو ضلام

والحب كلّه خير، يدريه اولو الأحلام

اترفعت صحفنا وجفّت الأقلام

[٢٦٨] عزّة:

ما كل القلوب تتلاقى دوم تتوالف

في البتريدو من جواك وليك ما آلف

وفي المن حبه ليك لي شرعو طش وخالف

سالف كاس هواك نديمو عقلو التالف



[٢٦٩] فخر الدين:

ما كان ذل وبي قيد ريدي ليهو حقيق

وكنت الضل عليهو ولو صبحتا حريق

في شان الهوى القيد توأم التحليق

والضيق والوساع واحد مع التحقيق

[٢٧٠] عبد الله:

إنت جهنّم الحمرا بتشوفا بريق؟

زي جنّتنا حاول تلقى ليها طريق

البتقولّو حُب يا دابو بلّة ريق

احفر شان تصل ريدتنا لسّة غريق



[٢٧١] فخر الدين:

العاشق كمالو فناهو في الإطلاق

وفي قلبو الصغير ياسع مدى الآفاق

لو ضاقبو الحبس حريتو في الأحداق

وردة روحو في رشفة رضاب وعناق

[٢٧٢] عبد الله:

رشفة، عيون، عناق؟ شايف خيالك ضاق

إلّا بشوفو معذور متلك الما ضاق

آفاق المحبّة الفينا ما بتنطاق

لا شفنالا حد لا عرفنا ليها نطاق

[٢٧٣] فخر الدين:

ما ضاق الخيال بس للوصول ضاق دربي

والمعنى الوسيع تحت الحروف متخبي

شن المعنى لو عقلي الحكم دون قلبي

نفسي وفي النفس درب الوصول لي ربي

[٢٧٤] عبد الله:

ان ضاق الدرب، ربّي اليبارك ويربي

وان بعد الشرق، خلّيك حداثي وغربي

وان كمل الحنك، قلّد حنان وحدربي

لا تغلب تقيف، خلّيك ملحلح وحربي



[٢٧٥] فخر الدين:

سر الحب كمن في شوفنا من نهواو

غير العالمين حسنو و بهاو و نداو

نلتمس العذر و لو سابنا ما بنسلاو

ومعتادو بنشوفو تملي روعة و وااو

[٢٧٦] عبد الله:

سرّ الحب قلب واسع كبير آواو

لا ضاق بيهُ يوم لا عاكسو ولاواو

لمّا الدنيا تقسى بلقى فيو سلواو

بستأنس بصوتو وبستمع نجواي



[٢٧٧] فخر الدين:

ما بنّال الكمال طالما الأصل من طينا

إلا الريد مع طيب طبعو تب بكفينا

موفور الجمال الشوفتو بس تشفينا

يبذل قدرتو و يكفيهو كامل فينا

[٢٧٨] عبد الله:

لله الكمال، بس لينا بالبيلينا

بنشوف الكمال في قوّتا وفي لينا

لين في القوّة خلقة القامة بانة ولينة

راس يوزن بلد .. والروح تقول فلّينة

[٢٧٩] فخر الدين:

يا الحابي الكمال عند الجمالو مكوّم

شن القول أكان لي ظرفو فيك اتلوم

الزول البريد ما بفوت رفيقو الهوّم

ولا بكوس الريال لو يوم جنيهو اتعوّم

[٢٨٠] عبد الله:

شين بتدور من الـ في ريدو سهّر وصوّم؟

انا رايد الاصيل، ان جيتلو يومي مشوّم

يدّيني الحنًان والقاه لالى ونوّم

وان حالت ظروف خلّفلي طيفو وقوّم



[٢٨١] فخر الدين:

ما لها في حسنها المتفرد الفتان شروى

وحكايات هوانا سيرة في الناس تروى

قلبها فيه من التحنان إشباعٌ و مروى

وأنا نَهِمٌ إليها لستُ أشبعُ لستُ أروى

[٢٨٢] عبد الله:

العندك كمل لامن بقيت للبروة

وحكاية هواك مفضوحة كايسة الضروة

جافيت الصفا تْهاتي ووصلت المروة

الّا وقعت بدري وما بلغت الذروة



[٢٨٣] فخر الدين:

جادت ريد محنة وجن شغف ومحبة

وما بخلت علي في يوم ونقصت حبة

بس جوع روحي ليها مع الوصال ما انطبة

والفي الريد شبع ما فات مقام الصُحبة

[٢٨٤] عبد الله:

ريدا الفيني أذّن .. قلبي طايع لبّى

لازم وِردها .. درويش ولابس الجبّة

ادّتني الطريق وقتين وصلت القبّة

كاتم سرّها وقافل عليه الضبّة



[٢٨٥] أمنية:

ساعة قمنا حبينا بنفوسا صافية

و منحنا المشاعر و الرعاية الكافية

قسمة و وقعتنا مع القلوبهم جافية

لمتنا في عواليق عدمونا القافية 🤭

[٢٨٦] عبد الله:

واحنا القمنا كايسين المحبّة الدافية

في زْقاقاً كَدِي اتلافونا ناس المافيا

واتشلعنا تب، فد لمبة فضلت، طافية

الّا لقونا ناسا رجّعولنا العافية

[٢٨٧] أمنية:

وطلعنا طبعا بتوصيات:

الزول ان غباو معناكا ما يباريكا

ما تكوسلو العذر و تخليه هو يجاريكا

و ان ما قدّرك معناتا ما شاريك

يقطع وشو ما حينفقل اصلو الريكة

[٢٨٨]

نفسك قيمها و اوزن حدودا براكا

و الشايف رقبتو عليكا ما يبراكا

بين سما و الأرض اتعلقت مرحاكة

راجياك تمتهن روحك عشان تمحاكا

[٢٨٩] أمنية @فخر الدين:

أنا من البنات و بديك كلامي نجيض

ما بنباري راجلا كان جناحو مهيض

و ما بنقدر البكاي (هناي) الريد

و بيننا و بين بعض بنسميه وهمي مريض 🙈



[٢٩٠] عزّة:

مراتب العشق للمولى أعلى مقام

ومعاني الهوى كامنه في قليبا هام

الطف يا كريم بي ارواحنا دون لجام

بصحيفة العمل املاها صلا وصام



فخر الدين لإيناس:

أووووو، ست النضم والنظم؛ تلحقيني وتنجديني جوز اللوز الفوق ديل اتشلبوني لامن قطعتا تمباك والقرين غادرني وقال لي مزاجك ما شاعري وإنت خرمان؛ المهم امسكي الوردية لامن أجيب الفزع من مرسى الفاشر 🤣


[٢٩١] عبد الله:

اللاعب جناح ما برجع يلعب باك

والفاتحينلو باب ما بنط من الشبّاك

والنور ان طفى ما بصلّحوا السبّاك

والزول البريد ما بخرم التمباك

فخر الدين @عبد الله: عليك النبي هسع إنت ما لاعب تنقا... باك ومهاجم 🤣🤣🤣.


[] أمنية:

كت منبهرة بيك خجلانة من اشعاري

و اتضاير ..اقول الكلمة و أهرب جاري

ما قايلاك مشنق منو قاطع الطاري

خسارة الريدة دي الخاواها ود عماري ⁦🤦🏼‍♀️⁩⁦🤦🏼‍♀️



[٢٩٢] إيناس:

يا ناس #العشق كترتو فيهو القول

لو درتا النظم يترآي لي مفتول

البدخل ذوقاكم ضمة تب مكتول

وماا بقدر يجاري ،،، الا زول مسطول

🏃‍♀️🏃‍♀️🏃‍♀️🏃‍♀️🏃‍♀️🏃‍♀️


[٢٩٣] عبد الله:

ما شاربين سجارة بنقو شان نتسطّل

اتسطّلنا من ريداً علّينا اتهطّل

الواحد وقف أجّل شغلتو وبطّل

الباقين كمان، فاقدين حنان، نتعطّل

[٢٩٤] فخر الدين:

سكرات الغرام بيهن دوام بنشعشع

وبنقوهو الهيام يوم الحِنينة تودع

معذور الذي برا العشق متربع

كان ظنَّ الموله طاشم أو متصقِّع

[٢٩٥] أمنية:

كر يا يمة حال العدو!

بقيت مضرب مثل للجار زمانو عليهو

و قلبي الاتهرس امثال بتضرب بيهو

عشان هادي النهايات قلبك آتباريهو

و الباري الجداد للكوشة بيوديهو 😵

[٢٩٦] إيناس:

يوم تنوي العشق ،،، ما تضيق تعال براااحة

ما بتقدر تناكف وتاني مافي فصاحة

نار الحب صعيبة ،،، وفوقا نار وحواحة

المهم ال (احه) الأخيرة دي أبت لي هههههههه 😂😂😂


فخر الدين:

فلاحة كبود يوت للقلوب سواحة


[٢٩٧] عبد الله:

عاد للزيّكم نار الغرام لوّاحة

أمّا في جنّتي، فالحب دا أجمل واحة

بستنشق عبير من روضتا الفوّاحة

وانهل من حكم مكتوبة في ألواحا

[٢٩٨] فخر الدين:

جننتا البنات بي حبك اليوتوبي

المشهد حبيبتك فيو قلوبي قلوبي

تب لا فيو شكل لا فيهو فلقة طوبي

لا ساساق ينشف عصبك العرقوبي

😁😁😁😁😁😁


[٢٩٩] عبد الله:

حدّنا في الشكل وقتين تصر هي التدفع

ادخل في حِجج، وارمي الحُجج واتشفّع

وتحنبك عديل والقاني في وش مدفع

استسلم واقول: كلّ الحلول ما بتنفع!

🥺🥺🥺



[٣٠٠] عزّة:

شن بتقولي في عبدالله ناظم وناكر

وهديك امنيه البي شرعوا قالت كافر

وفخر الدين كمان بيه مجاهر وسافر

مكتولين عشق واصبح زمانم جاير

[٣٠١] عبد الله:

نحن الحب دا جت حافظينّو ما بنذاكر

ما متل القرا الشيتات وداخل باكر

مفتاحو الصدق، ما تبقى زولاً ماكر

البصدق بعيش في حبّو حامد شاكر

[٣٠٢] عزّة:

نحن الما بنجاهر بالعشق والريد

وما بتغلبنا قولت الحب وقولت اريد

ناهلين من بحورو نعيدو حن ونزيد

الا كمان في ناس تايهين في بحر الريد

[٣٠٣] إيناس:

والله الغرام مالينا بس بندسو

ما بندور نقول ،،، وفي عيونا ديمة تحسو

حافظين للوداد ،،، ما فينا واحدا يخسو

ومليانين حنان كان صبحوا كان اتمسوا



[٣٠٤] فخر الدين:

عشقتها يوم جبينها النور تراءى وهلّ

نزل وحي الغرام في قلبي سرّو تجلّى

الحب مو فلاحة جَزَم رزق من الله

فأكثر يا المحب شكر الله عزّ و جلّ

عبد الله:

جات ظابطة مع مربّع كتبته ليها زمان:

شاحدك يا كريم خلّيها لي يا الله

أختي وصاحبتي ووالله ما بتتخلّى

حد ما قلت فيها الاقي وصفي أقلّ

احفظا يا كريم تتعلّى ما تتدلّى

2021-01-22

[٣٠٥] عبد الله:

من لعنة كيوبيد ناشنا بي نشّابو

بي شوفة ملاك ما شفنا عيباً شابو

كسّر باب قلِبنا وعُنوةً خشّابو

خلّى العقل ودّر والحواجب شابو

2021-02-07

[٣٠٦] عبد الله:

الزينة الرزينة السمحة كيف اخبارك

ربّنا يحفظك وينعم عليك ويبارك

ويفرّحنا بيك ونهنّي ليك ونبارك

وتشوفي السَعَد ماثل أمامك بارك


[٣٠٧] أمنية:

يسأل منك الخير عبدالله كيف احوالك

و هادي المرة عاد طولنا منو سؤالك

بعد الرقدة ديك للتوبها غير حالك

قلنا بتعتذر و تعلل اذبهلالك 😏

أمنية: عاملة روحي الزينة الرزينة طبعا ⁦🙋🏽‍♀️⁩


[٣٠٨] عبد الله:

هوي يا منّو هوي، ما تبقي زول سلباط

ماك عارفة الرزينة؟ وللا دا استعباط

ما تتشبكي ساي زي مجلس الضبّاط

وما تحاولي انقلاباً ينتهي بإحباط

[٣٠٩] :

غالية علينا عاد، يا منّو، ما بناباكِِ

الزينة الرزينة السمحة كيف تغباكِ؟

بتسرّ القلوب، تمسح دموع الباكي

في وشّ المحن ياها البتسند باكي

أمنية: لسه زعلانة 😢! سلباطة؟ وبستعبط؟ والاحر زي مجلس الضباط دي؛ أي واحدة مربع حتي أرضي 😌



[٣١٠] احمد بروزة:

الزينة الرزينة نظرة لي ود جعفر

الراجل خلاص اتجهجه ورقد مكسر

كل مايدوبي اسمك دايما محكر

ماتسويلو شغلة القحاتة للعسكر

[٣١١] عبد الله:

الزينة الرزينة حنيــٓــنة ما بتتنكّر

الحافظة العهود، ما ناسية شان تتذكّر

الخاتية الملام، عند الجميع تتشكّر

السمحة الاصيلة الصافية ما بتتعكّر



[٣١٢] عثمان ماهر:

الراسيه الرزينه طلعتِ زيت عبد الله

حايم بالشوارع يتخيلك و يتملّا

سألتك بالذي خلق الخلايق كلها

تحنّي عليهو ديما و تكرميو بي طلّه

[٣١٣] عبد الله:

إن شُفت الخدود ضوّت بدون تتجلّى

كان قلبك دا ودّر وللا عقلك جلّى

إلّا بدور سماحة الفي الخُلق تتجلّى

سبحان القدير الباري عزّ وجلّ

[٣١٤] عثمان:

ان جيت للجمال سبحان من سواها

او قلت الطبع يتبارك الربّاها

البت ام سماح قلبي الرهيف حبّاها

شاحد الكريم تهدا وتجيني براها

🤣🤣🤣🤣



[٣١٥] حنان:

من جابوا سيرة السمحة قلبي دق فرحة

قلت اسي ناس منو يجوا و يعطروا اللمة

نجر البمبر نتكل نتكيف بالنمة

"طبعا ما عندي اي علاقة بكتابة الشعر 😎

لكن حبيت اشارك و اعبر"



[٣١٦] أبوذر:

الزينة الرزينة الليلة حزتي السالفة

وليك الحق مدام عبد الله زاتو دموعو الزارفة

حني عليهو ولو (بنظرتن ) خاطفة

خليهو ينصلح وتنعدل حالتو الواقفة



[٣١٧] عزّة:

الزينة الرزينة رادوكي كل خلق الله

دخلتي لكل قلب واولنا كان عبدالله

انساب هواك شعرا وفي النضم اتجلى

حلفتك بي الله ادينا بس فد طله

2021-02-09

[٣١٨] عبد الله:

الزينة الرزينة السمحة كيف الحال

فرّقنا الزمان البيني بينك حال

يا ريت كنت جنبك، كنت جيت في الحال

ويا ريت المسافة قريبة بي ترحال



[٣١٩] أمنية:

عاد طولنا من اخبارها ياخ بلحيل

و خفنا يكون كمان (كبّرتَ) انت عديل

لقيت شركك قبض وشمارك انت تقيل

بيتاقوني يووومي يوسف وبهقيل



[٣٢٠] فؤادة:

انا يازول بوصلها ليك بالترحال

بس انت وصف وقول الاسم والحال

نمشي نتمها لوكان خطوبه ومال

يلا الـ🏃‍♀️🏃‍♀️🏃‍♀️قبل تجينا ام العيال 😜



[٣٢١] عزّة:

فرقنا الزمان بس عايشة في الاحساس

ريدتك في القليب بالكلمة ما بتنقاس

ما تقولي الهوا لي مروة بس وخلاص

يا الزينة الرزينة السمحة انتي اساس

2021-02-12

[٣٢٢] عبد الله:

الزينة الرزينة السمحة ست الكُل

الاشواق بحر، والريد مستّف فُل

مسّاكِ الهنا وحيّاك صباح الفُل

يغشاك السلام والخير عليكِ يطُل

2021-02-14

[٣٢٣] عبد الله:

الزينة الرزينة الغالية، إنتي العيد!

والبتهنّى بي لقياك ببقى سعيد

الخير الملاك كفّى القريب وبعيد

والحب الجواي ما بَوفي مهما اعيد

2021-02-16

[٣٢٤] عبد الله:

الزينة الرزينة السمحة جد طوّلنا

إلّا بس البعاد من ريدنا ما حوّلنا

ياما في الخيال سافرنا واتجوّلنا

في بحور المحبّة وللقلوب فوّلنا



[٣٢٥] فخر الدين:

الزينة الرزينة السمحة نور عينينا

ياريت الوصال لو أمرو في إيدينا

كم بالطيف على سكة هوانا مشينا

من بحر الغرام لي قلوبنا تب عبينا

[٣٢٦]:

ليك البهجة والصبر المعشعش لينا

يا بحر الجمال الفاض نداهو علينا

نمك إبتسام بي كاسو كم يسقينا

ما بنجادعو مهما ف بسمتك غنينا

[٣٢٧] أمنية:

مرحب بي غناك يا فردتي و يا فخري

و ما قصرت تب بل ذدت يوت في شكري

و عاد النضمي هولك لا بتكوس لا بتشري

احسن مين ينم حاشاكا ماك الوخري

حنان: نتكّل بي جاي!


[٣٢٨] فخر الدين لحنان:

جايباك روح شمار ولا الحروف وفنونا

ساقت خطوتك لي سوحنا يا حنُّونا

أنا مكتول هواها ام خدرتن ليمونا

ما شفتيها ساي في خديدا غايرة النونا

[٣٢٩] فخر الدين لأمنية:

حباب بت الكرام ست الفهم والبشرِ

بستان الورود النسمو طيب النشرِ

أخت أخوان يمين بخت الودادك يشري

نال لب الجمال شن ليهو من القشرِ

[٣٣٠] عزّة:

النضم الجميل والنم سمح متوالي

جابني على الرفاق وبالبهجة غير حالي

الا كمان سليتو . وما سألتو عن أحوالي

المينشن رجيتو ودا الكان بسر لي بالي

[٣٣١] فخر الدين:

نورك من بعيد حت في الغياب بيلالي

كان عارفك هناك كُت صحتا ليك طوالي

ما بننسى البفوتنا ويبقى جافي وسالي

كيفن ننسى زولن إسمو فينا الغالي

[٣٣٢] عزّة:

فرهدت الدواخل ورضيتا عاد آمالي

وجبرت الخواطر باللسان الحالي

ما بترضاه يوم نسياني او إهمالي

ودوزين الكلام لي سواك ما بيحلالي

[٣٣٣] أمنية لعزّة:

غايتو قدر صبرت اظن بجيب القلة 🌚

حسدتيني في مربع ساي وحات اسم الله

دحين ابن آدم المن عينو ما بتتحلا

ابلعو كلو ناشف ما تكوس ليه بلة


[٣٣٤] فخر الدين لعزّة:

حقك وماني مشحود يا ام مقاماً عالي

وأختاً لي سغيرة مقامها صنو عيالي

قولها القوق وحالها الذوق لهيجها الحالي

ولي طيب خاطرا ان زعلت بشدو رحالي

[٣٣٥] أمنية لفخر الدين:

وات يا كيمو جاهز عاد ونمك حاضر

في الجكس المربع ما بيروق لي باكر

تحنك فوق تحت لا مختشي ولاك ناكر

زي الزول يكابس في الغدا ومافاطر 🌚🌚

[٣٣٦] فخر الدين لأمنية:

إن غضب الحليم بتغادر الحنيّة

وانتي الحلم طبعك وبالمودة غنيّة

بت عز الرجال ياخ روقي صفي النيّة

وأنا أخواتي جوز عزة وكمان أمنيّة

[٣٣٧] أمنية:

تاني مربعين ويمكن أقوم اتحنك 😌

زولتك ماها ساهلة مهما كنت محنك 😎

ببين ليك عاقلة ساي مجنونة اكتر منك 😂

ويلا الفورة ألف يا متنا يا كاتلنك 🌚

[٣٣٨] عزّة لأمنية:

بري يايمه ابرا من الحسد والغيرة

عاجبني النضم وبدور تجيبو السيرة

شان انداح معاك واسكر بدون البيره

يا ست الحسان يا مَنّو ياكي اميرة

[٣٣٩] عزّة لفخر الدين:

بالحيل ياكا اخوي المو بالكبر متعالي

مزدان بالصفات السمحة بالإجمالي

وياني إخية ليك ينادوك بناتا ب خالي

شد الرحال وتعال وياها غاية آمالي



[٣٤٠] هيام:

إن طال البعاد و الزمان ما جاد

بيك أكيد مستف و قلبي ليك رياد

عقلي البيكي هام ما جاني راجع صاد

و سفري البي الخيال ما بوقفه الإرصاد

2021-02-21

[٣٤١] عبد الله:

الزينة الرزينة الما اتلقالك غير

مسّاك الهنا وحيّاك صباح الخير

أمرك؟ قولي بس، anytime و eeverywhere

من عينينا ديل، ان درتي لبن الطير

2021-02-22

[٣٤٢] عبد الله:

الزينة الرزينة اللي "أماني" سُلالة

حد ما قلتَ، اشوف كلماتي ليها قُلالة

بان طبع الملوك في هيبتا وفي جلالا

مع لِينةْ القوام، مع رِقّة مازجة دلالا

مجاراة لمربّع كتبه محمّد الحسن بن عوف على صفحته:

كل ما اقول اتوب ابليس يقول لي لا لا

وكل ما اغض طرف يظهر نجم يتلالا

البارح جزم (برجت) عيوني غزالة

خلت قلبي (قنقر مقدة) في (ملالة)


2021-02-25

[٣٤٣] عبد الله:

الزينة الرزينة الطيبة يسعد فجرك

ربّنا يحفظك لينا ويعظّم أجرك

وُفْ خير العمل يُربي ويبارك تجرك

ويريّح ضميرك حبّة بس من زجرك

عبد الله: وأحيانا تفيض بك المحبّة، فتتمنّى أن تضخّ كلّ ما بداخلك من خير، وتمنحه لمن تحب! وزي ما كتبت قبل كدا: والله الحب البعرفه لو شفتوه، لقاتلتموني عليه؛ تخيّل بس يكون عندك أحباب، لمن تتذكّرهم بتكون ما قادر تفرمل روحك من تمنّي الخير ليهم؛ ما مكفّيك كلّ الأماني الفايضة من قلبك؛ داير تدّيهم أكتر؛ ناس بيخلّوك تتمنّى لو انفجرت خير! صحيت السحر دا؛ وطريت واحدة من الناس الجميلين ديل؛ البعتبرهم من أعظم النعم في حياتي؛ فكتبت (الأبيات في المتن) حسّة لمن بكتب اتذكّرت قصيدة كتبتها في ٢٠١٨، بتصف المعنى دا: مستوى من السموّ الروحي كنت بتمنّاه، والحمد لله ماشّي ف طريقه!



[٣٤٤] عبد الله:

الزينة الرزينة الناس دي فيك مذهولة

عرفوك بالوصف، بس بالاسم مجهولة

يا الحايزة المحاسن، والمكارم هولا

يا الحاقّة اللقب، يا السمحة، يا الممهولة

[٣٤٥] مصطفى سرور:

الزينة الرزينة الما بجيبها التاق

نتاوق نعاين عملتي لينا فتاق

يا ست البنات ورينا نحنا معاك

البينكم دحين احسن تفتي براك

[٣٤٦] عمّار منصور:

الزينة الرزينة دي ما عرفناها

زمن الدسدسة انتهى من سمعناها

بس الخلاكا تلبد بيها من غير تشكو

خوفك تبقى زي مروة وتجيبلها هشكو



[٣٤٧] فخر الدين:

يا زينة الشباب صفوة بنات الحِلّة

يا المزة المبطبطة لا شحم لا قلّة

الذكا والعفاف فيك يا السميحة جبلّة

ما بدوكي ناس أب كرشة واب زنقلّة

بدوروك لي التلوب اللا فَزِر لا خِلّة

كاملين الصفات الما بتشينهم عِلّة

حارقة حشايا لا تمرقيني من الملّة

بي شاكوش هشام أو اللدر عِبدلّة



[٣٤٨] أميمة

الزينه الرزينه ال الله كمل خلقا

بالحياء والجمال مزدانه خلق وخلقه

الباهيه الوضيئه ال للقلوب مخترقه

اظهري للانام خلينا نسمو ونرقى

بشوفه الملاك اسمر عظيم الرقه



[٣٤٩] عمر الطيّب:

ست البنات و الضفاير المجدولة

ساكنه القلوب و العقول مشغولة

قنبلة و انفجرت ياخ شوف مفعولة

شالت خلوق شالت بلود بعرض بطوله

غافرين ليك جميع عند الله ما مسؤله

كبف الحساب من غير ذنب و الله ما معقولة

رب العباد سواك و خلى الخلق مذهوله



[٣٥٠] حسين:

يا الزينة الرزينة الناس دي فيك غبيانة

عرفوه الوصف، بس القصد مو فلانة

انت الأدب، والعفة (ليكي) ديانة

ومازال بالقلب،، حاجزاها (فيهو) مكانة



كتبت حنان:

إلى الزينة الرزينة الما في مثيلها

بعد التحية و السلام..

ان شاء الله تكوني بخير و أمان..

يحفظك لينا ربنا من شر الأنام..

حابة أشكرك يا زينة البنات..

يا اللي سيرتها عطرت دنيانا محبة و تحنان

كوني بخير

💚 💚



[٣٥١] عبد السلام:

كتر في بياضك واترجي الكريم يهناك

السمحة أم عجن في غفلة ماها معاك

شاحد الله الكريم تتهنأ تلقى مناك

اوعاك من تذهلل والريده مى طارياك



[٣٥٢] معتز:

الزينة الرزينة الحيرت خلاني

وصفك ليها باهر وما بتخلي ثواني

كل ما اسمعك برجع افكر تاني

هل في الريد في شيتا زي دا يا حباني!!؟ 🤔😎

2021-02-26

[٣٥٣] عبد الله:

الزينة الرزينة الملكة سمحة صفاتا

ما خلّت وصف بين الفضايل فاتا

ست الكل هي كنداكات علي شفّاتة

زي بدر السما الجنبو النجوم دي خفاتى

2021-02-27

[٣٥٤] عبد الله:

ألهج يا لسان انثر حروفك هاتا

عبّر عن قَلِب فاض بي محبّتو هاتى

بالزينة الرزينة الللوصف شلهاتة

نوصف ذوقا وللا نبوغا وللا زهاتا؟



[٣٥٥] حسبو:

كان ما خاف الله اقول دي فلانة ديك بي ذاتا

مافي وصف بقارب حتى ربع صفاتا

جميع من شافا قال والله سمحة حلاتا

درة مصونة فاقت في الجمال ندداتا!!

[٣٥٦] عبد الله:

ان قاصد تقول مروة الجميلة، دي غير

وفي الاتنين بشوف والله كلّ الخير

في مروة الوصف يا حسبو ما بكون fair

والزينة الرزينة مثالا بالجد rare

[٣٥٧] حسبو:

جمالا طبيعي ما بالجلخة والمناكير

وما قصرت يا عبد الله في التفسير

أقرا اليافطة مكتوب فيها take good care

والماذون وصل ... ما كفاية قولة خير!!

وسلامتكم وبس سامحونا في التقصير


[٣٥٨] عبد الله:

تأمُر، ونحن نتشكّل علي تشكيلها

ان دارت صديق، تشكيلي وانا بشكيلا

وان جاها العريس، انا ببقى ليها وكيلا

وان دارتني نا، بوزنها شيلتي واكيلا

[٣٥٩] حسبو:

دي بهاجرولا لي شنقول ولي قمبيلا

دي زي ريحة شنيل الفايحة فايتة فتيلا

بعد جابوا المهر ومجوهرات والشيلة

آيات النكاح يترتلن ترتيلا!!

[٣٦٠] عبد الله:

الريدة الاكيدة الفي القلوب مشتولة

جابت روحي منّ آخر ثُول منتولة

الودّر لبابي وروحي فيو مكتولة

توباً في الكتيف وضفيرة جات مفتولة

[٣٦١] عمر الطيّب:

قت و كفيت في حقها و الله خطير

و عاد للسمحة كلوا ميسر حتى لبن الطير

طارولها الخلوق تتسابق راكبة Sudanair

المولى رافع شانا فوق سحابو Stratosphere

و من نجيما الضوا و سوالو Flare

انبهر روميو و الف للكتب Voltare

علي قلوب العاشقين تتربع ملكة I declare


[٣٦٢] عمر الحاج:

قالوا سلمى وقلنا سالمة من العيوب حاشاها

قالوا ظالمة وقلنا حالمة كريم إلهي حباها

من كل الصفات الطيبة كيف خصاها

إلا من العجن هلكت قلوبنا معاها



[٣٦٣] هيام:

دروب الريدة فيها طواف و إت تتاتا

ودر في بحور غناك.. نمك و في جدعاتا

سمرية و بت بلد ديل أقل صفاتها

و وصفك قاصر ان حددت ديلا تلاتا

مكمله للأدب.. رزينة و زينة ثم حلاتا

وقليل في الخلوق تلقاها حتى سماتها

بالزين و العديل فرح قلوب أماتا

و قلبك بالمحبة سويلو غتا و سباتا



[٣٦٤] علياء:

الزينة الرزينة،روح قطارا وفاتك

ما حقيت عشم قلب البنية وحاتك

صاليها بين نارين،كتر الغرام و سكاتك

خليهو القصيد، أطراها في صلواتك

عبد الله:

يشهد الله بدعو ليها ليل ونهار؛

ربّنا يسعدها في الدارين!

[٣٦٥] علياء:

حصناها بي بركة دعاك الصيدا

من شر الموده الزايلة، من شر سيدا

ساقياك حنها يا ضي عيونا وعيدا

ولساك ما فرز ما بين معزّة وريدة؟!

[٣٦٦] يس:

صاليها بين نارين كتر الغرام وسكاتك

صاليها بين نارين كتر الغرام وسكاتك

انت لسة فاكر صمتك من دهب

انطق وصرح بي غرامك

فقد نطق أبو الهول وانتحب

يامن تحب ياليت تعلم قدر إيه هي ليك تحب!!!؟

رجياك تنطق ليك بحب

وهي من سكاتك صاليها اللهب



[٣٦٧] مصطفى سرور:

نمك كتر ااا عبد الله اخير تتصبر

في بت الرجال قلبك بشوفو مكسر

بتدور العرس كان الامور تتيسر؟

ولا غناك فوق راي تاني ما بتفسر؟

[٣٦٨]:

الزينة الرزينة عبد الله موجوع راس

كتر في الغنا وخلي الفهم للناس

كان القسمة ادت بكرة النخت الساس

والتانية ان بقت بشمتو الجلاس



[٣٦٩] عزّام:

دفِـق يا وريـد لامِـن تقول سـمِـح بلهاتا

وزيد يا عشـوق وحـتـو الـدمـوع لِساتا

مـا عـيـب الصِقير إن وقـع يزيـد بتْباتا

أنا إن فُتْ قولو العشوق هج دِيار فلاتا

عزّام:

- بلهاتا: اللهاة هي اللحمة المشرفة على الحلق في أقصى سقف الحلق، وهي كناية عن الكلام. [ لامِـن تقول سـمِـح بلهاتا] أي حتى ترضى عني وتقول [نعم] هَيْت لك.

- حتو: لغة في "حتى".

- لِساتا: لغة في "لسه" والتاء للنسبة.

- بتْباتا: يقول المثل: الصقر إن وقع كترت البتابت عيب، والبتابت والبتبتة هي الفرفرة التي تفعلها الدجاجة بعد الذبح.

- هج: هاجر. [هج ديار فلاتا] أي ترك ديار المعشوقة وغادر مغاضبًا.


2021-03-03

[٣٧٠] عبد الله:

الزينة الرزينة الملكة سمحة وهادية

بي نور الكتاب نارت هديّة وهادية

للحب ديمة باذلة وللفضايل هادية

يا ذوق يا أدب تشهدلها الأشهاد يا

[٣٧١]:

يوت اوصف جمالك وبي فضايلك بلهج

انظم فيك واعيد، لا بلحقك، لا بزهج

السارّة القلوب زي الحدائق وابهج

النايرة ف سماي زي الشمس على اوهج

2021-03-05

[٣٧٢] عبد الله:

الزينة الرزينة الريدا فاض وفتنّي

جودي عليّ من خيرك، دحين مستنّي

كل ما جاني خير بتدعّى ليك ممتنّي

وان يوم شفتي شر اللوم بشيلو واتنّي

عبد الله:ومن آيات المحبّة أن تشعر بالامتنان لمن تحبّ على كلّ خيرٍ يحصل لك، وإن لم يأت منه، وتشعر بالتقصير وتلوم نفسك على ما أصابهم، وان لم يكن ليك فيه يد!


2021-03-06

[٣٧٣] عبد الله:

الزينة الرزينة السمحة زايدة رزانة

في اللين والقوام واللون تقول بس زانة

في طبعاً جميل، طبعاً، كساها وزانا

لو بالايد اْخت حسناتي فوق ميزانا

[٣٧٤] حسبو:

بالسر ما ببوح لو أنضرب جبخانة

ومضروب حمى كل يوم ماشة زايدة سخانة

نادوا الباشتمرجي اليفتح الشفخانة

راينا تلف مع مفردتك الرنانة!!

[٣٧٥] عبد الله:

أم قلباً نقي، دونو القلوب وسخانة

في قلبي الكبير ما فضّلت لي خانة

مخلص ليها تب، حاشاه يوم ما خانا

زانت دنيتي، والدنيا في بَيَخانا

[٣٧٦] حسبو:

أهل جدة الكرام أنا مني ليكم أمانة

في شعبان دخلنا وننتظر رمضانا

حلو مر وتمر كرتونة تب مليانة

مسادير تاني مافي نرتل القرآنا!!



[٣٧٧] عزّة:

الراي !الراي عاد بدورلو قعدة وشوره

ناغمت المهندس واستاذنا والدكتورة

في الحالة البقت يوماتي زايدة خطورة

دا العاشق زهد في الدنيا خلا امورا



[٣٧٨] أمنية:

ما دايرالها شورة ولا لبطارية

حالتك كل حين زايدة و بقت خترية

خلاصة القول هي جد ما قاله عباسية

بعد غلبو الوصف تماهو بي أحييييا

2021-03-07

[٣٧٩] عبد الله:

الزينة الرزينة الملكة فوقن جت

من عين الحسود يا قلبي ضاري و غت

وان ما عينه كان والله فتّيت فت

يا الكلّ الشهود شاهدالا بتّت بت

يا الارواح حضور قدّاما وقفت دت

يا الساكنة القلوب يا الريدا بنزل رت

يا القلب الحجر جبتيو محتحت حت

يا اللامّة المحاسن والفضايل ست

وصفك عزّ مهما لساني عجّن و لت

المتلك دحين آلسمحة ما جن يت

2021-03-08

[٣٨٠] عبد الله:

من نبع الرزينة حروفي جادن وادّن

وسقتني بْدنان خمر المعارف دن دن

احيَت نار مسيد وطبولو نادن دن .. دن ..

والبسبّح سبّح .. واللي دندن دندن

عبد الله: ياريت زول يذكّرني بعد شهور، أو حبيبنا مارك ح يذكّرنا السنة الجاية ان شاء الله، نفك طلسم الأبيات دي!

شرحت في بوست لاحق في 4 أبريل



[٣٨١] حسبو:

بدت الحفلة وانوار الرتاين بقٌن

الفنان صدح وهن في السباتة ترصٌن

بيناتن رزينتي متل كهارب لندن

سلبت عقلي يا ناس ما أظن أتيقن!!

[٣٨٢] عبد الله:

ما همّاني بالسالّات لسانن نقّن

وما سائل على الحاسدات يمين ان طقّن

وماني البشتغل بالجاي وجاي بتزقّن

هيّ الزينة بس، والزعلن الاتشقّن



[٣٨٣] عبد الله:

برّيني بطلب، يا الزينة، ليكِ بجيبو

وان درت المحال يا الغالية ليكِ بجيبو

يا الاهدتني من فيض المعاني عجيبو

واختارتلي من لون المحبّة نجيبو

عبد الله: ومن آيات المحبّة الصادقة إنّك تتمنّى وتمتنّ لأن يطلب منّك من تحب طلب، يدّيك فرصة تعبّر بيها عن إخلاصك ووفاك ليه!


2021-03-11

[٣٨٤] عبد الله:

الزينة الرزينة الدُرّة بين اترابا

بتصيد مِتْلَهن،،، إلّا المحبّة ترابا

آوتني ف جنان التبر فيها ترابا

والبلقى ام نعيم شين غردو في الحترابة

2021-03-15

[٣٨٥] عبد الله:

على حبّي الكبير آالزينة ما تعترضي

فارضا علي فَرِض، يا الغالية، دون تفترضي

ريدتي وروعتك بينن تناسب طردي

ربّنا يحفظك ويدّيكِ لامن ترضي

عبد الله: الشاهد في المربّع دا القافية السماعيّة: في نص فصيح، طردي ما بتجي مع ترضي، بينما في نص بالعامّيّة السودانيّة، القافية لزوم ما لا يلزم؛ الشاهد التاني، المهم شديد، إنّه نطقنا للضاد بعيد عن الحرف الأصلي الموصوف في الكتب، والمنطوق في بوادي الجزيرة العربيّة، بحسب ما سمعت من الوالد؛ والمثال دا بيضبط الخطأ وين؛ من مقارنة مناظرة الحرفين التانيات في القافية: الطاء والتاء؛ ديل أصلا حرفين بشهبهن بعض؛ بأمارة إنّه بيدغمن\يخفن في بعض، كما في "أحطت بما لم تحط به"، و"بسطت يدك لتقتلني"؛ فالطاء نسخة غليظة من التاء؛ أها من المقابلة دي، فنحن بننطق الضاد كنسخة غليظة من الدال؛ بينما الحرفين ديل ما قراب من بعض في الأصل؛ الضاد قريبة الظاء؛ بأمارة إنّه بتتبدّل معاها، حتّى في لغتنا العامّيّة؛ زي كلمة "يضبط" الكتبتها قبل شويّة، عادي بننطقها "يظبط"؛ وممكن نعدّد أمثلة في الاتّجاه التاني، زي "ضفر"، "ضُلُف"؛ بل ممكن نمشي أبعد للذال، قريبة الظاء، ونلقى مفردة زي "أضان" محل "أذن"؛ ... المهم؛ الله يخلّي الزينة الرزينة، وينعم عليها، ويسعدها في الدارين؛ ويجزيها كلّ الخير على الإلهام البتمنحه لينا؛ قولوا آمين!



[٣٨٦] حسبو:

عشمنا كبير بأنك تعذرينا وترضي

عاشقك ضاربا سلكين ما معاهن أرضي

الناسك البيجمع بين نوافل وفرضي

بتوسل عشان يكسب حنانك وترضي!!

[٣٨٧] عبد الله:

يا العالية ف سماك، وانا لسّة كاين أرضي

بهديك المحبّة، أريتو واصلك طردي

نا "المولى الموالي"، و"ليكِ"، "لازم"، "برضي"

وآلحاسدة الرزينة الزينة عاد انقرضي


[٣٨٨] عبد الله:

في الخانة الصحيحة وصلني باصك عرضي

هيّج فيني شيطان الشعر، بي عرضي

استمتع معاي، يا حسبو، شاهد عرضي

بسعد بي حضورك، شا الله تقبل عرضي

عرضي في البيت التاني تذكير "عرضتي"، والعرضة نوع من الرقص.


[٣٨٩] حسبو:

يا جنية جودي على° قبل تنقرضي

ومن تال وادي عبقر ألهميني وبرضي

أكون شاكر وممنون إني أديت فرضي

أغادر الدنيا ممكون.. إلا راضي ومرضي


[٣٩٠] عبد الله:

الضاد سيبا،،، بندور الكلام الوردي 😹

في الزينة الرزينة الليها باقة وردي

غنّيت ليها ما سايل في كابلي ووردي

جودي عليّ كان اكوي العواذل واردي


[٣٩١] حسبو:

أمطري يا سحابة ولي جناحك أفردي

أبقي غطا الرزينة في الحرور والبردي

وانزلي باحترام أهديها باقة وردي

رسالة وبلغيها أمانة أوع تشردي

[٣٩٢] سناء:

الليله عبد الله وحسبو جابو الكلام المرضي

ونحنا في رجاك ياالزينه لازم ترضي

وتهديهم باقة حنان بلون الجوري والوردي


[٣٩٣] عبد الله يرد على حسبو:

تشرد وين، دحين قول ليها بس تنزردي

وان شفت الرزينة اشّاالله ما تتوردي

كلّ القلتو فيها وكلّ شعري وسردي

ما بلحق مقاما، الزينة جوهر فردي



[٣٩٤] حسين: جميل وايضا لو قلت:

ريدتي وروعتك بينن"تناسب طردي"

لطفك ورقتك محال "تناسِب طردي

لمتين أنا اقعد أحن واسترضي؟

ربّنا يحفظك ويدّيكِ لامن ترضي

حسين: طرد الثانية طبعا بمعنى الإبعاد 👍

عبد الله: فكّرت فيها؛ بس إحساس الطرد بشوّه جو الكلام؛ محال انا أفكّر أصلا إنّها تطرد زول!

حسبو: ممكن تخليه يلف centrifugal؛ 😂😂😂

عبد الله: أخدت زمن شان افهمها؛ فنخلّي شرح للمارّين: قوّة الطرد المركزي! على ذلك ممكن نقول ..


[٣٩٥] عبد الله:

ريدتي وروعتك بينن تناسب طردي

داير في المدار، جذبك موازن طردي

حارسك يا الاميرة، ويا هموم انطردي

بهديك السلام، ان شا الله واصلك طردي



[٣٩٦] فخر الدين:

ياني العفرت البسقيك أكان بس ترضي

وياك سوح روحي والخصب المزين أرضي

يا الزينة الرزينة الكل سلوكك مرضي

ريدك في الفؤاد أصبح نوافلي وفرضي

[٣٩٧]:

شاقني ألق بهاك فوق توبك المسطردي

وتجلي الجمال المنو عبيت طردي

ولمعة طرفك اللي غناي تناسبا طردي

لازم الباب قدُر ما عاذلي حاول طردي



[٣٩٨] عزّة:

بي حبه الكبير يا الزينة بختك ،، أرضي

زان القول شعر ابونواس وابن الفرضي

ندهوك الخلايق بالله ..بالله ما تعترضي

وفي قاموس هواك عبدالله يصبح مرضي



[٣٩٩] حسين:

شقيت بلادا ... طولها وبالعرضي

وقابلني الكتير ، بين الطلب والعرضي

بس هي من زمان، وبكرة،وليوم العرض

ست السماحة وجود ،صاينة الشرف والعرضي

2021-03-16

[٤٠٠] عبد الله:

قالوا رسمتَ ليك لوحات وقالوا بلوّن

ما عارفينّي بكتب بس وراك وبنوّن

ايّاكِ الزرعتي الهامي وانا دا بشوّن

وانتي بتنظمي الأشعار وياني بدوّن ْْ

[٤٠١] فخر الدين:

يا رب العباد سهل عليهو وهوِّن

اب قلبن سليم اللا بلوم لا بخون

ريدو الفي الشغاف مما خِلِق متكون

ساقياهو ام عيون يوت لي هواهو تمون


[٤٠٢] عبد الله:

الاسعاف هديل عرباتو بي وو وو وِن

الريد ماشّي up وانا اوطّي فيه وادوّن

ان حصّل ضرب تسمع مدافعو تدوّن

يحفر جوّة في قلب القلوب ويجوّن

"أدوّن" فعل من down، و"تدوّن" من الدانة: قذيفة المدفع.


2021-03-19

[٤٠٣] عبد الله:

الزينة الرزينة الفي القلوب كتّابة

نقفل صفحة الدنيا وبنفتح تابا

بندور فردة منّ الهاما نتغتّابى

والزينة الرزينة السمحة كيفن تابى؟

"تابا" = her tab, like in a browser.

فردة: قطعة قماش مثل الثوب.


[٤٠٤] علي:

الزينة الرزينة أنشا الله مَرَةَ التابا

كيفن يعني لي عبدالله قاعد تابا

الخبر إنتشر و الدلاليك رابة

والغبيانة رافعة قزاز وحارسة #حسابا 😏

(وفي رواية أخرى عاملة حسابا 🤣)

2021-03-22

[٤٠٥] عبد الله:

عاودني الحنين آلزينة تاني وتار

والشوق التقول طالبني فوقك تار

حرّك فيني كامن وايقظ الاوتار

محبّة، اتنين، تلاتة، تمانية، ميّة، كتار

عبد الله: يشهد الله محبّات محبّات محبّات!



[٤٠٦] عزّة:

عاودني الحنين في قليبي تاور تاني

والشوق التقول مؤجر دوام وجداني

حرك فيني كامن وبالسهر ابلاني

محبة اتنين تلاتة مية تاني وتاني


[٤٠٧] عبد الله:

عاودني الحنين للزينة تاني وتاور

الشوق العلي يا عزّة قام يتعاور

حرّك فيني كامن داب بقيت اتشاور

ارحل بي وراو قلبي الرحلّا جاور؟

الرحلّا: الرحل لها: الذي رحل لها.


[٤٠٨] عزّة:

معاودني الحنين وتلقاني ليه احن

والشوق العلي هايج، دوام ما بكن

محرك فيني كامن انادي ليه وأئن

يارب اشوفو حبيبي لو في المنام ويحن

[٤٠٩] عبد الله:

حُسّادا البنات اتلولوِن وِيْنْوِن

والعذّال توِن فوق راسي وِن وِن وِن

وان طاروا السما، وان جنّوا وان، وان، وان

انا والريد وهيّ البينّا win-win-win


[٤١٠] عزّة:

يبغروا من هواك كل الشباب ويجن

يتمنوا العشق بي متل الرزينة يمن

ينعموا بالغرام الصافي مليان حن

ويكتبوا فيه شعر موزون معاه لحن



[٤١١] علي ميرغني:

.. أصبحنا بي الرحمن و يا ستااار😳

محبوبك رقد يا الزينة كان أفتار

والحال إنكشف ما فيش حجاب وستار 🙈

زولنا الكان زمان محتاجلو لي ريستار

علي: يشهد الله تسغيلات تشغيلات

ريستار = restart



[٤١٢] أسامة الهادي:

يا الزينه الشوق والحنين طولبي

زاد الوجع والقليب بالأنين متعبي

بقيت ما عارف شرقي وين من غربي

الغربه تشمت وزايده يومي في غُلبي

[٤١٣]:

أمل اللقيا حالف ما ينور دربي

الحزن لابِد،حالف يمين يغدربي

يانسايم الرزينه تعالي خففي كُربي

أمليني فرح،في كل الخلايا إنسربي

عبد الله: اقراها مرّتين وضايرها، بتزبط؛ القافية كويسة!


عزّة:

الشوق والحنين يا الزينة طول بي

زاد وجع القليب وبالأنين متعبي

تايه بقيت ما عارفه شرقي وغربي

متغرب كمان والغربة زايدة في غلبي



[٤١٤] محمّد الناجي:

يا زينة الفريق شوقك مولع نار

ريدك زاد كتير اكتر من الأسعار

زول يواصل 🤣


عزّة:

في جوة القلوب حبك معاو اصرار

ارحمي لي عشوقك من الهوى الودار



[٤١٥] حسين:

عاودني الحنين آلزينة تاني وشدّ

والشوق التقول نارو فوقي اتشدّ

حرّك فيني ساكن،عبى القلب واتعدى

محبّة، اتنين، ومية ،واصلو ما بتعدّ

[٤١٦] عبد الله:

عاودني الحنين آلزينة تاني وردّ

والشوق التقول اتقمّص الدور ادّى

حرّك فيني كامن، فوقي "صدّ وردّى"

محبّة، اتنين، تلاتة، كتار، صداهن ردّ

[٤١٧] حسين:

زراني الحنين آلزينة قيّل وعيّد

والشوق الشديد جايبني ليكي مقيّد

حرّك فيّ السواكن والقلب فيكي مهَيّد

محبّة، اتنين، ومية،وعدو ما بتقيّد

[٤١٨] عبد الله:

تاورني الحنين يا الزينة تاني وعوّد

والشوق التقول ولّف علي واتعوّد

حرّك فيني كامن دقّ عودي وعوّد

محبّة من الحجاز من وافدين وسَعوّد

[٤١٩] حسين:

جاني الحنين يا الزينة تاني وعاد

والشوق التقول لف علي وانعاد

حرك فيني ساكن لازمني أرق، وسهاد

محبة من زمان بانت ، وما بانتلي فيها سعاد

[٤٢٠] عبد الله:

تاورني الحنين آلزينة تاني وعاد

والشوق التقول طالبني فوقك عاد

حرّك فيني كامن،،، جاوز الأبعاد

محبّة، اتنين، تلاتة، كتيرة، مين العاد؟



[٤٢١] خالد جلال:

عبد الله سو شنو حاسدنو فيك كتار

باين ريدو ليك صوت طبلة بس مزمار

الظاهر وأظن في حبو ليك محتار

أن مرت دهور الريد معاود وتااار



بوست منفصل يعود لـمربّع سابق، عبد الله:

حُسّادا البنات اتلولوِن وِيْنْوِن

والعذّال توِن فوق راسي وِن وِن وِن

وان طاروا السما، وان جنّوا وان، وان، وان

انا والريد وهيّ البينّا win-win-win

[٤٢٢] فخر الدين:

جات القافية بي صوت البنات ونّانة

و الصبيان لسانهم بس تقول زنانة

يا الزينة الرزينة الشافي فيض تحنانة

رُحماك بالذي ليك روحو يوت حنانة

[٤٢٣] عبد الله:

قلبي الليها غنّى، ودوبى، دندن، نانى

اشجيت المعاي، وارواحنا جت دنّانة

نان كيف ما بتحن أرواحنا ويندن نانا؟

للساقية السلاف من روحا في دنّانا

[٤٢٤] سليمان:

حَسَدِن عليها طفح وشقَّ كلاهِن

فتحولا المنافسة ديمة هي الماكلاهن

الزينة الرزينة علي الحِيَط تاكلاهن

كايسات للبريمِن ولليجي ويكلاهن

[٤٢٥] دفع الله البشير:

فيض من جمال تقول بحيرة تانا

عيونا بتضرب قلوبنا بجبخانة.

لراسي تاج ورويحتي معليّا شانا

فوق جمال يوسف قفزتي بيها الزانة

[٤٢٦] عزّة:

جات القافية بي شعر الشباب واصواتن

والبنوت هناك صوت الغرام اشجاهن

دي الزينة الرزينة بين البنات أحلاهن

وعبدالله العشوق نسا البنات وسلاهن

[٤٢٧] فخر الدين:

عبدالله العشوق الريد طبقلو الكية

خلى انفاسو دخانهن عطاريب شية

سبحان من جمعلو الغانيات ف بنية

زينة رزينة لادنة السيسبانة النية

[٤٢٨] عزّة:

عبدالله العشوق هام بالغرام في بنية

خلا الهندسة ونظم الشعر في إخية

يغزل كل يوم واشواقو دايما حية

زينة رزينة عاد وخلي الكلام بالنية

[٤٢٩] سليمان:

يا عزة المجيدة القومة لي بومازن

بي اليلزم لزومو شعرو دايماً وازن

للزينة الرزينة فتح تلاتة مخازن

من انواع شعرنا وجت قِبِلهِن أجازِن

[٤٣٠] عزّة لسليمان:

ياالعمرابي قول القومة لي ابومازن

دا علمنا الكلام منظوم مرتب ووازن

في الزينة الرزينة نزيد نعيد ونوازن

وننثر في الدرر نملاها سبعة مخازن

[٤٣١] سليمان:

البهر البنات جت و إلتَقَطْهو قفازِن

شال تمويل حنانهن جر عيونهن وجازن

ووكت الثورة قايمة هو البشيل عكازن

إلا الزينة كتلت حيلو بقت استاذِن

[٤٣٢] عزّة:

خلينا النضم في الزينة يبقى مجازن

ونظمنا القوافي في مديح ابو مازن

شاعر الثورة القاد المواكب وساسن

كراش البنيات من القدم ولي راسن

[٤٣٣] سليمان:

حتى اللينا كانت ومن زمان كَرَّشنا

زارو مسيد هوانا وبي هداوة كَرَشنا

جات الزينة تقدل ومن جديد أنعشنا

شلبت منو قلبو واستعدنا عفشنا

الحمد لله 😂😂😂



[٤٣٤] مصعب بشير:

باريت الفُنون واتجازَفَن فَن فَن

كملت القوافي وخَلّيتلِي فَن فَن فَن!

رَصّيتها عُقُب فَنّيتا فَن فَن فَن

مَتّعتَ الخَلِق والله fun fun fun



[٤٣٥] حسبو:

أشوف عبد الله جعفر حالتو والله تحنٌن

وفي عشق الرزينة شهيد ويوت متجنن

في غرّة جوادك شفنا مكتوب Win Win

شان سمحة ورهيبة وليك هيبة و genuine!!



[٤٣٦] أسماء عمر:

كملتي الجمال وزنتيهو كونك Fun

سُكَّـرْنا املهيج عُسالي سلوى ومَنْ

جناتنا في عيونك فردوس نعيم وعدن

يالله الكريم وأجواد علي ما بضن

تغشاني امزمام يا فلان صِبِحْ كيفنْ؟!!

اتباشر واقولا نصيييح نصاحة الجِنْ



[٤٣٧] عمر الطيّب:

عبدالله جاد بالشعر فصيح و افرنجي قول one

و بعدما زاد في القوافي سواهن fun

الكل حرن و قال I'm done

يا دابو شمر وادا اشارة the game is on

في الزينة الرزينة و هواها blame him none!



[٤٣٨] سناء أبّشر:

ماقطعنا عشمنا في الزينه ترضي تحن

درويشنا غرق ترجم يدوبي يئن

لو صعب درب الوصال اكيد ح يجن

2021-03-28

[٤٣٩] عبد الله:

الزينة الرزينة الما اتلقالا clone

تاورني الحنين، بعدك، لقاني alone

والريد العلي يا الغالية، عاد let alone

والشوق التقول طالبني فوقك loan



[٤٤٠] عزّة:

الزينة الرزينة الما اتلقالا متيل

تاورني الحنين بعدك تركني كتيل

والريد العليّ بهد جبل توتيل

الشوق معذبني ختاني ليك في فتيل

[٤٤١] عبد الله:

الزينة الرزينة الريدا فيني شَتِيل

أطنان المحبّة اتكتّلت تكتيل

والشوق والحنين تقطع حبال التيل

حصّنتك بيوسف ومجمل الترتيل

[٤٤٢] عزّة:

الزينة الرزينة الريدا فيني قبيل

فرهد للدواخل لبسني تاج اكليل

اتلموا العوازل وفينا قالو وقيل

وفيك قلت الشعر وغنا ليكي خليل

[٤٤٣] عبد الله:

خدّي بالدموع انبلبلن بلبيل

والشوق والحنين الهدّ حيلي قبيل

تاورني ورجع، وين منّك القِبّيل؟

يا نبع السلام الحيّرت نوبيل!

[٤٤٤] عزّة:

يازينة البنات يالسمحة ما زي ديل

نزلت بحر هواك وغرقت فيه بالحيل

بالريد والغرام نوم عيني باقي قليل

اصبح عقلي خالي وجسمي بالي نحيل



[٤٤٥] عمر الحسين:

يا زينة البنات المافي غيرك option

نظراتك سهام زي التقول injection

حبك في القلوب انداح وصار infection

كملتي الجمال زي التقول full option

لمتين البعاد داير معاك connection

ولا كمان اجن اعمل عديل abduction



[٤٤٦] علي عثمان:

الزينة الرزينة الما اتلقالك تاني

ريدك فيني بان وبيهو اتعرف عنواني

الظاهر قليل والريد صحي (الجواني)

يا الريدك تميمتي وسبحتي وقرآني

[٤٤٧] عبد الله:

يا زينة البنات زيّنت بيك ديواني

بنظم فيك واقول يا الغالية ما متواني

في نصّ البلد بنشد وادق صيواني

لا خايف عذول لا شلت هم شوّاني 😌😎😹

[٤٤٨] علي عثمان:

الزينة الرتينة نوَّرت بيكي زماني

بَّاقِّي نورك شلع جهر البعيد والداني

فيكي نظمت شعري ودوزنت بيك ألحاني

بانقا واب جيقة.. حتى شواني ما هماني

😂😂😂😂

2021-03-29

بوست منفصل يعود لـمربّع سابق، عبد الله:

يا زينة البنات زيّنت بيك ديواني

بنظم فيك واقول يا الغالية ما متواني

في نصّ البلد بنشد وادق صيواني

لا خايف عذول لا شلت هم شوّاني 😌😎😹

[٤٤٩] حسين:

يا زينة البنات زيّنت بيك اشعاري

بنظم فيك واقول يا الغالية ما متواري

في نصّ البلد بنشد واعلي جداري

لا خايف يمين لا شلت هم ليساري


[٤٥٠] عبد الله:

يا زينة البنات زيّنت بيكِ قصيدي

بنظم فيك واقول، يا الغالية، ياهو رصيدي

في نصّ البلد، بي جملتي وتقصيدي

ما خايف قحت والمعجا ياكلوا حصيدي

"تقصيد" هو النطق العامّي الشائع لـ"تقسيط".


[٤٥١] معتز:

يا زينة البنات زينتي كل الدارك

البرا البلد.. الجوا والفي دارك

بنظم فيك واقول..يا غالية كيف أحوالك

لو نص البلد يرضا ويكون سد مالك

برضو بشوفو هين وما بكافي جمالك


[٤٥٢] سولا:

يا زينة البنات زينت بيك أبياتي

بنظم فيك واقول ياالغالية انتي حياتي

في نص البلد بنشد وبيكي بهاتي

لا خفت من عذول لا شلت هم قحّاتي



[٤٥٣] حسين:

يا زينة البنات زينت بيك كلامي

بنظم فيك واقول يا الغالية ما متحامي

في نصّ البلد بنشد واقص احلامي

لا خايف حداثي ولا شلت هم لظلامي 😁

حسين: والحداثي هو عبد الله جعفر والظلامي هو الشواني

عبد الله: دا شرك يعني؟ نخت لايك 😹؟


[٤٥٤] عبد الله:

يا زينة البنات زيّنت بيك اقلامي

بنظم فيك وبرسل يا الرزينة سلامي

في نصّ البلد، مثّلت ليك افلامي

لا خايف عذول لا خفت فيكِ ملامي

عبد الله: وفي رواية: لا خايف قحت لا شلت هم اسلامي

مبارك: ليك كم زمن ما شلت هم

عبد الله: ما قلنا ليييك 😹



[٤٥٥] عالية:

يا زينة البنات جريتو فوقك نمي

وزاد الشوق علي يا غربة كان بتلمي

ناذر يا الكريم يوم التفرج همي

أقلد لي هشام تحلف تقول ولد أمي

2021-03-30

[٤٥٦] عبد الله:

بظهر حبّي ليك آلزينة ما دسّاس

يا الريدك حفر في باطن الإحساس

باسمنتي وحديد في قلبي ختّ الساس

واتعهّد على البنيان رعاه وساس

[٤٥٧] سولا:

بظهر حبي ليك الزينة ما متخازل

يالريدك اتدفق و بيناتنا مافي عوازل

يالساكنة القليب وبنيتي فيهو منازل

القلب قلبك وانا عن كل شِبر متنازل

😂

[٤٥٨] حسين:

بظهر حبّي ليك / آلزينة ما بخفيهو

ولو ظهرلي اعراض / فيكي الدواء البشفيهو

وان-ما لقيت دكتور... ! / بتخصصك بس-فيهو

ولو النبض واقف / وريدي بس بكفيهو!

(نحول للطب)

2021-04-03

[٤٥٩] عبد الله:

بهديك السلام، تلفاز وميديا ورادي

ما أنشد رصين، أو مبتدي، أو رادي

ما فاض بالحنان قلباً حنين أو راد

يريدك ربّي يا الريدك كتاب اورادي

عبد الله: "رادي" في البيت الثاني تسهيل لـ"رادئ"، صيغة "فاعل" من "رديء" المصرّفة على "فعيل"؛ الإشارة هنا لما أثر عن هشام الشوّاني في تلك الأيّام من كثرة استخدامه لصفة "رديء" في وصف بعض المنتوجات الأدبيّة المعاصرة.


[٤٦٠] حسبو:

بحر عبد الله فاض فات الجروف لي غادي

وحياة سيدي عبد القادر البغدادي

مصيرو الانتشار بالتلفزة والرادي

أهنيك يا رجل واهديك أغلى ودادي!!

[٤٦١] عبد الله:

فضلة خيركم انتو الزدتو لي عدّادي

حدّادي الخيال، سافرنا فيو، مدّادي

ما بعرف حدود، فيه الجميع اندادي

من جيل ناس ابويا ويابا لي ناس دادي



[٤٦٢] فخر الدين:

زينة رزينة وصفها جاوز التشخيص

وصبحت لي سماح طبع البنات تلخيص

يا الفحص الدقيق البعقبو الترخيص

ليمك عزَّ مهرك غالي ماهو رخيص

عبد الله: نان ما عصرت علينا في القافية شديد لكن 🌚!


[٤٦٣] عبد الله:

زينة رزينة جاوز وصفها المعقول

وصبحت أصل لي سمح الطباع منقول

يا الدرّة الفريدة الفيك غلبنا نقول

يا السرّ العجيب يا الطلسم المصقول

2021-05-13

[٤٦٤] عبد الله:

الزينة الرزينة ان شا الله مافي زعل

وينك؟ شا الله طيبة، ومافي عوجة نعل

فاقدينّك كتير والكل عليكِ سعل

مرّة يكضّب الشيطان ومرّة نعل

[٤٦٥] عزّة:

الزينة الرزينة مبروك عليك العيد

يتحقق مناك ويكون بخيت وسعيد

فاقدينك كتير وكايسين سلام الايد

لا طليتي بنتي لاجانا ساعي بريد



[٤٦٦] عبد الله:

يا رب يا الرزينة الجنّة ليك مضمونة

وتعود الايام بالصحّة ليك ميمونة

زاد الروح كِمِل زيدينا منّك مونة

يا شونة قلوبنا ويا هلالا ومونا

2021-07-06

[٤٦٧] عبد الله:

الزينة الرزينة السمحة كيف وازّيّك

المزّيكة تعزف ليك سلام مِزّيّك

المتلك منو؟ يا الملكة مين الزيّك؟

روحك، خلقتك، عقلك، كلامك، زيّك



[٤٦٨]، نُقل في بوست منفصل، عبد الله:

شي لله يا اللا شي بيعدل شيّك

.. ما رسّلت؟ كل ثانية أفتح اشيّك

اسرح في الخيال واقشر واشك متشيّك

الشوق والجمر يا روحي حظّك شيّك

أشيّك فعل من check، مستخدم بكثرة في لغة اليوم.



[٤٦٩] عزّة:

الزينة الرزينة السمحة كيف الحال

طولتي الغياب علك في احسن حال

المتلك منو ؟ يا الزاهية في كل حال

رقة وجمال وحضور واللسان الحال



[٤٧٠] فخر الدين:

يا الزينة الشوانا الشوق إليك إزيك

واحدة براكي ما كحل عيونا الزيك

ناعمة و ناعسةْ أمقالْ وطارف زيك

زان الزي سواك وإنتي بتزيني زيك


[٤٧١] سليمان:

زينة وبت لذينة وشهدو ليها خلائق

عاميها الحُسُن والذوق مفصل ولايق

و النعمان زمان سوالو فيها شقائق

خلت بيري حاسّاً لا ركز لو رايق



[٤٧٢] حسبو:

تاني رجعت لي زينا ونحن نسينا

لكن طيفا صبٌحنا وبيماسينا

حنٌي علينا يا حنٌو وما تسكٌينا

فتحت لينا زينا .. يا عبد الله قوم واسينا!!

[٤٧٣] حنان:

حقك علينا كان قلبنا عليك المواجع

علا نضمك سمح ما بحتاجلو مراجع

كلام موزون سلس ما محتاج يتراجع

يخش القلب يزيل منو المواجع

[٤٧٤] حسبو:

يا كنداكة ملهمة القصيد يا حنان

بت أهلي العزاز ومكرمين وحنان

مساديرك حكم وسحر معاهو بيان

دا ما قدر الله ذاتو الجانا صابنا عيان!

[٤٧٥] وفاء:

وين يا الزينه كاسيك السمح في زيك

مهره اصيله معدوم في الفريق من زيك

خلت عقلي طشه وراح يكوس الزيك

رديه السلام رديها قولْةْ ازيك



[٤٧٦] عبد الرحمن:

خليت وطني جيتك ومنكسر في حييك

خليت الهموم وسرحت كاييس ضيييك

فاقد الفرحة فاقد لي دلالك وحنك

شاحد المولي ي الزينة اليزيد في عمرك



[٤٧٧] محمّد جميل:

الزينة الرزينة كيفك لعلك طيبة

الشوق والغرام سايق عليك يا الطيبة

مين البيدانيك يا أم خصالا طيبة

جمالك كالبدر وأنفاسك زهر عابقة وطيبة



[٤٧٨] نجوى:

الزينة الجمالها يشرق و ما بدور زينة

تتبختر حلاتها في قليبي كالوزينة

مقتولك دواخلو بي حر جفاك حزينة

بي نظرة وكليمة بالله بس عزينا 😁

2021-07-10

[٤٧٩] عبد الله:

الزينة الرزينة السمحة بيك بتباهى

وافخر بيكِ فوق ستّ الحُسُن واشباها

وان ست ستّهن دونك بقت باباها

زدتي على جمالن ذوق وروح ونباهة

2021-07-11

[٤٨٠] عبد الله:

الزينة الرزينة الملكة ست الدنيا

ليك الذوق اسم والحكمة هيلك كنية

حبّك ليّ دين ورضاكِ أجمل منية

ياريت ابقى عود وتكوني إنتي الغنية

2021-07-12

[٤٨١] عبد الله:

الزينة الرزينة السمحة عِمتِ مساءً

أطيب من رأيت في الناس رجال ونساءً

ادعيلنا الكريم اتذكّرينا عسى أن

الحال ينصلح، أحوالنا بعدك ساءن

2021-07-13

[٤٨٢] عبد الله:

الزينة الرزينة السمحة ما أبهاها

في صفحة سماي هي الزهرة ماها سهاها

دي الحافظة العهود الدنيا ما بتلهاها

عارفة متين تجد ومتين بتعمل هاها


علّقت سارّة:

هاااا 😹 عاد الليلة إقتران الزهرة والمريخ والقمر


[٤٨٣] عبد الله:

اتلمّوا الهلال-مرّيخ، وجات الزُهرة

للزينة الرزينة الزايدة فوقم شُهرة

اتلّموا الكبار في شان يشوفوا المُهرة

تتحدّى الشمس، جهراً، نهاراً، ظُهرا



[٤٨٤] عبد الله:

لي عهد الوداد لاني الببدّل لاها

وقت الجد يجد في الحوبة ما بتتلاهى

لو فيهن نبيّة .. ما بتكون الّاها

وان جاز المجاز هي الللمحبّة إلٰهة



[٤٨٥] عبد الله:

مغلوط الكلام ما بنطقنبو شفاها

بي لغو الحديث فد مرّة ما فاه فاها

والقول الجميل قدّام كلاما تفاهة

دي الزينة الرزينة السمحة ياخ وكفاها

[٤٨٦] محمّد جميل:

ست البنات والأدب ديمة خاتية سفاها

بتنطق درر ونظم الحكم من فاها

يطلع أغلى من الدهب مافي من يلفاها

شاحدك يا الكريم زي ما جعلتها لي قلوبنا شفاها

ترضيها عن عبد الله ما تصدو وعنو ما تتلاهى


[٤٨٧] عزّة:

دي الفي البنات عبدالله قال ما احلاها

باسم ثغرها وكاسي الجمال محياها

نبسم عاد معاه وكتين يجيب ذكراها

بالقول الجميل ... وحلو الكلام عزاها

حنان: صدقتي من نقرا اسمها نتبسم

عبد الله: كل ريدتي ليها الشايفاها دي ما مكفّياني فيها؛ داير الدنيا كلّها تريدها معاي!

عزّة: ورينا ليها طيب هههه

حنان: ربنا يزيد المحبة و يحفظكم ❤️❤️

حسبو: 🥇🎻 أحسنت يا عزّة.



[٤٨٨] فخر الدين:

تهواها النفوس كل الخلوق نادهاها

عرفو مقاما في دروب العشق بُدَهاها

تسبي براءتا ويسكر عقولنا دهاها

سارقة قلوبنا بالحسن الفريد شادهاها

عبد الله: دا بزبط اكتر مع ديل

زايد الدال كمان، مدد!


[٤٨٩] عبد الله:

كضّاب البقول طول البعاد قسّاها

كضًاب البقول ناسياني ما خسّاها

وانا يا ناس اموت، يا اخوانّا كيف انساها؟

لا بفتر وامل من ريدا لا بتساهى



[٤٩٠] فخر الدين:

ساريات القلوب الأمحَلن بش فاها

ساعة إفجو برق البسمة بين شفاها

بي خمر الرضاب كم أثملت رُشَفاها

والروح من سقام بي ليما تلقى شفاها

ندى نور الدايم: الكلام دا ما في مصلحتها 😅



[٤٩١] الشفيع:

السمحه ست الكل بدر البدور ف سماها

عالى مقاما رب العباد بالجمال كساها

الزينه الرزينه ما احلاها ما ابهاها

الزهر الفواح عطرت الكون بشذاها



[٤٩٢] حسبو:

الزينة الرزينة السمحة ما أحلاها

إن قدلت متل ممشى الغزال ممشاها

هي ست البنات البيها كم نتباهى

يقول فيها الشعر عبد الله والله كفاها !!

2021-07-18

[٤٩٣] عبد الله:

تاورني الحنين يا الزينة تاني وهاج

والدنيا ام خوا الارواح سليتا وهاج

بلتمس القبس من نورك الوهّاج

درويش في مسيدك سالك المنهاج

[٤٩٤] نزار نادر:

درويش الرزينة الليله هاج واتبتل

في كاوست هناك الليلة مطرك هطل

كان شفتي الحكيم الليلة حالو اتبدل

كان ماسك الحنين وبين اصابعو اتسربل

[٤٩٥] محمّد جميل:

تاورلو الحنين يا اللي المحاسن تاج

من ضلام الدنيا لي ضياك محتاج

شرّف للديار من الصقيع قام قاج

عساهو يبرد جوفو وحُمّتو السهراج

2021-07-20

[٤٩٦] عبد الله:

الزينة الرزينة العيد عليك مسعود

وان شا الله الايّام بالفرحة ليكِ تعود

الخير والسلام ليهن معاكِ وعود

يا أجمل نغم، يا ريت اكونلِك عود

2021-07-24

[٤٩٧] عبد الله:

لي دار الرزينة الزينة كيف ودّعنا؟

يا قلبي الحنين والله عاد ابدعنا

وقّف يا زمن ساعات، دقايق، دعنا

في البلد الحبيب، ألم الفراق صدّعنا

[٤٩٨] حسين:

لي دار الرزينة الزينة كيف ودعنا؟

لا خوف الفراق لا دمعات عيونا ردعنا

حتى القلب ترك السفر وخدعنا

مجلوبة من "https://sudan.abdallagafar.com/index.php?title=مستخدم:عبد_الله_جعفر/الزينة_الرزينة&oldid=992"